Cozah nih tawlrel mi covid-19 khamhnak sii cu CNF ralkap pawl le chungkhar pawl chunh piak an si lai maw si lo timi a fiang rih lo tiah Chin ramkulh cozah sin in theih asi.

Chin ramkulh cozah chimrelnak nawl ngeitu Minister U Soe Htet nih “cu kong cu kei zong ka thei set lo. Nain hmailei ahcun anmah zong telh an si ko lai. An nih zong ram mi pei an si ve cu. Kan sin ah a phan mi sii a tlawm tuk rih. Cawk mi le laksawng hmuh mi zapi fonh ah 3.5 million lawng asi rih. Hmaisa bik chunh ding timi cazin ah zeitin asi lai theih asi rih lo. Cawk chap ding zong a um rih, Myanmar ram ah milu 50 million leng kan um i cu lak ah 3.5 million caah kan ngei. Zapi caah zeitin phawt zamh asi lai timi theih asi rih lo. Tlangcung hriamtlai bu pawl zong sii chunh kho ding in ruah chih asi ko lai” tiah a chim.

Myanmar ram ah January 27 thok in ngandamnak lei rianṭuantu pawl cu Covid-19 khamnak sii chunh hram an thok i February 5 ah cun mipi pawl sii chunh hram thok an si lai tiah Ministry of Health and Sports nih thawng thanh nak an tuah.

CNF aiawh in chimrelnak nawl ngeitu Salai Thet Ni nih “atu tiang ah cozah lei in CNF hriamtlai bu sin ah Covid-19 khamhnak Sii chunh nak kong he pehtlaiin chim le thanh mi zei aum rih lo. Kan mah lei tu nih Chin ramkulh cozah asi lo le ngandamnak lei zung pakhat khat ah va kal in zeibantuk timhtuahnak an ngei timi hlat ding timhtuah lio asi. Zei thawngpang cu kan thei rih lo Camp Victoria ah cun Central Covid-19 Committee timi aum. Mizo ram lei in Camp an rak luh ah cun Quarantine ah um ter an si. Ram chung in a rak ra mi pawl an si ah cun takpum kik le lum kan check, mask hman ding tiah nawl chuah asi. Covid-19 khamhnak sii cu mipi siseh cozah siseh minung covo pakhat tiah ruah kho asi. Hriamtlai asi ruang ah zawtnak khamhnak sii i chunh lo ding timi aum lo. Mi zapi nih zawtnak khamhnak sii chunh kho ding tu kha cu tawlrel tu pawl an ṭuanvo asi” tiah a ti. Camp Victoria, CNF Headquarters ah inn 50 an um i chungkhar 200 leng an si._Zalen

LEAVE A REPLY

Please enter your comment!
Please enter your name here