January 26, Naypyitaw ah ralkap nih tuah mi thawngthanhnak ah ram uknak hmual kan lak ṭhan lai lo ti chim kho asi lo tiah an chim dih hnu January 27 ah zulh phang pawl zulh asi lo ahcun kha hlan Phunghrampi pawl hrawh a rak si bang 2008 Phunghrampi zong hrawh kho asi tiah Senior General Min Aung Hlaing nih a chim.

National Defense Academy ṭuanvo ngeitu pawl he tonbiaruahnak ah Senior General Min Aung Hlaing nih cu ti cung a chim tiah ralkap lei thawng fiang thanh nak nih an thanh. “Phunghrampi hi zulh phung vialte i lubik “Mother Law” asi. Cu caah hihi upat i zulh a herh. Tuan deuh ka chim bang, ning cang tein kan zulh lo asi ahcun hrawh asi lai” tiah Senior General nih cun a chim. “Chimh dih mi cu Phunghrampi zong hrawh kho asi. Zulh asi lo ahcun hrawh a hau ko. Cucu Revolutionary Council chan lio zong ah 1947 Phunghrampi hrawh asi. SPDC chan ralkap uknak lio chan ah 1974 Phunghrampi cu hrawh arak si ko” tiah ati. National Defense Academy sin ah Min Aung Hlaing nih cun Video Conferencing in biachimnak ah a telh tiah ralkap lei nih hman mi Facebook ah an tar.

“Phung nih buainak a chuahpi cang ahcun tuanbia hlun pawl zong zoh chih a herh tawn. Mah duh ningin hrilhfiang ter kho asi lo. Phung le hram ah mah duh ning poh in ruah le tuah timi hi ṭhatnak nak in chiatnak lei a panh deuh” tiah a chim chih. Kum caan sau pi ralkap uknak tang ah a rak tuar mi Myanmar mipi cu atu bantuk in thimnak phichuak cohlan lo in ram uknak hmual kan lak ṭhan lai timi chimrelnak ruang ah thinphang dai lo in an um.


Atu lio 2008 Phunghrampi cu ralkap hruaitu pawl duh ningin rak ser le tuah asi i ralkap nih nawl ngeihnak tam lak te ngei. Hi thawng in ralkap luzik cu President si loin Commander in Chief asi leng ah Ministry of Defense, Ministry of Home Affairs le Minister of Border Affairs cu ralkap nih an tlaih leng ah Hluttaw hmun hma kip ah 25% cu mipi nih thim si lo in an mah tein hmun hma pek cia asi.

Cubantuk dirhmun si bu ah ram uknak hmual lak ṭhan duh ahcun lak kho asi, duhlo le lak lo kho asi tiah chimrelnak cu ralkap lei nih chim hram an thok. Avoi thumnak Hluttaw biaruahnak pawl thok hlan January 26 ah tuah mi ralkap lei thawng fiang thanh nak zong ah “ralkap nih ram uknak hmual kan lak ṭhan lai lo tiah chim kho asi lo. Phung hram pawl ning in kan zulh lai” tiah chimrelnak nawl ngeitu Major General Zaw Min Tun nih a chim. Cu lawng si lo in “ralkap nih ram uknak nawl kan lak lai ti zong chim asi lo, kan lak lai lo ti zong asi dih fawn lo” tiah a chim leng ah thimfung thlak mi palh nak kong pawl thawngthanhnak tuah mi hi Ramkhel zulhphung he aa tlak in thanh mi asi tiah a chim chap.

2020 kum thimnak ah palh mi thimfung thla tu cazin 8.6 million leng aum i zong a chim chih. “Ramkhel harsatnak le relremlonak” tiah ralkap lei nih chim asi mi thimfung thla tu cazin palh mi he pehtlai in President, Union Election Commission le Pyidaungsu Hluttaw pawl sin ah fianternak tuah ding in nawl hal an si tiah theih a si. Ralkap lei nih hal mi pawl fianternak tuah asi lo ah cun zeibantuk tuah ser nak nih dah a zulh lai timi tu cu fiang in an chim lo nain ruah cia mi thil aum tiah Major General Zaw Min Tun nih cun a chim. “ṭuanvo ngeitu pawl an rian asi. Zeidah tuah chap asi lai timi cu phung he aa kalh lo mi kip kan tuah lai”tiah a ti.

Phunghrampi ning in cun Ralkap nih a mah duh in ram uknak hmual lak kho asi lo i ramchung biapi mi thil sining aum tik ah President nawl lawng in Commander in Chief nih ningcang tein nawl a ngei kho tiah aa ṭial. 2008 Phunghrampi hrawh dih hnu lawng ah ralkap nih ram uknak hmual cu a lak kho lai timi chimrelnak a chuah duh hnu ah Min Aung Hlaing zong nih cu ti cun a chim relnak asi.

Hi kong he pehtlaiin NLD nih phung ning tein tawlrel asi lai tiah luhnak a tuah. “Kan nih cu phung ning tein tuahser mi paoh kan cohlan. Kan mah zong phung ning tein tuah kan i tim” tiah NLD thimnak lei chimrelnak nawlngeitu Dr. Myo Nyunt nih a chim._Myanmar Now

LEAVE A REPLY

Please enter your comment!
Please enter your name here