US avoi 46nak President Joe Biden biakamnak a tuah hlan ah Kamala Harris cu Vice President biakamnak tuah hmasa asi. A hmasa bik Vice President Nu, minak le nichuah lei ram hrinsor Vice President timi roling thil a tlinh tu asi. India le Jamaica hrinsor Mrs. Harris cu Democratic President zuamcawhnak ah aa rak i zuam hmasa. Asi nain cu zuamnak ah Mr. Biden nih a tei hna caah Mrs. Harris cu a mah he US thimnak ah lut ṭi dingmi Vice President ah a sawm. “Mipi pawl caah ṭih phan nak ngei lo in hmai fong tu” tiah Mrs. Harris cu Mr. Biden nih a kawh auh tawn. US Congress ah biakamnak tuah hlan Mrs. Harris nih kha hlan caan vialte chung thazaang chuah in rianṭuantu nu vialte cungah lawmhnak bia a chim “an mah liang cung ah ka dir” tiah a ti. January thla ni 6, US Capitol ah a cang mi thil lak ah Mr. Trump tha petu pawl Senate biaruahnak hmun in a ṭhawl tu Palek Bawi Goodman nih Mrs. Harris cu biakamnak ah him tein a chuah pi.

Kum 56 asi cang mi Mrs. Harris cu mipem India hrinsor anu le Jamaica hrinsor apa nih California ramkulh Oakland khua ah an rak hrin. Mrs. Harris cu ramchung minak Collage lak ah a ṭhat bik sianginn pakhat asi mi Howard University ah a rak kai mi asi. University a kai chung lio caan hmuh ton mi hi pawl nih a nunnak caah a ṭha bik aa sersiam caan asi tiah Mrs. Harris nih a chim tawn. A mah kokek sining muisam cuang he pehtlaiin zeitik hmanh ah lung siarem lo in aum bal lo i “American pakhat” tiah amah le amah aa ruat. Howard University ah kumli chung ca a cawn dih hnu ah California University, Hastings Collage of Law in thiamsang cawn nak adih. Cun Alameda County District Attorney’s Office ah rian aa thok. 2003 kum ah San Francisco District Attorney’s Office ah rian sang bik a rak tlaih. Cun US ram milu tambik nak California ramkulh i California’s Attorney General lutlai le ṭan lak bik tu hruaitu Nu, African hrinsor US ram mi lak ah a pakhatnak bik rak thim mi asi. Attorney General rian caanhnih deng a ṭuan dih hna ah Mrs. Harris cu Democrat Party caah arfi ceu bang rak zohthla mi le minthang ah a hun i cang. Cu sining hmanthiam nak he 2017 ah California ramkulh Senate hmun ah zuamcawhnak a rak ngei i teinak a rak hmuh lawng si lo in Senator lak ah a pahnihnak minak nu zong a hun si.

2019 kum thok ah khan Oakland khua mipi 20,000 leng hmaiah President ṭuan dingin zuamcawhnak ka ngei lai tiah thawng a rak thanh. Asi nain chimphuan ding pawl fiang le ṭha in a thanh kho lo i ngandamnak lei zohkhenhnak caah a biapi mi dirhmun langhternak kong biahal tik ah ṭha ṭhi in bialehnak a rak tuah kho lo. A ṭha bik mi zuamcawh tu cu arak si lo. Lawyer asi nak hmual cu President hmun zuamnak ah aa tel ve mi Mr. Biden cu atu le atu soisel nak pawl a rak tuah tawn cu lak ah miphun thlei dannak a dirpi tu Senator pawl le Mr. Biden a rak ṭuan nak mipi he pehtlaihnak kongkau he Mr. Biden nih chim phuan mi kong ah a soisel khun mi asi. President dirhmun ca i zuamcawhnak in 2019 December thla ah aa din. Sihmanhsehlaw Mr. Biden nih a mah he zuamcawhnak ah lut ṭi ding Vice President ah Mrs. Harris cu a sawm i “a ṭhawng bik mipi caah rian ṭuan tu” tiah a rak ti.

November thla thimnak ah Mr. Biden nih teinak a co tik caan zongah khan Mr. Biden sin telephone in lawmhpi nak a tuah mi video file pakhat zong Mrs. Harris nih a Twitter account ah a rak tar. “Kan tuah kho cang. Kan hlawh a tling cang, Joe. Nang cu US ram hruaitu President thar na si cang lai.” tiah Mrs. Harris nih lunglawm thanuam in a rak ti.

Ref: BBC

LEAVE A REPLY

Please enter your comment!
Please enter your name here