Bia timi cu a lian i a ngan. A luan ciami zarhhnih ah Donald Trump bia chim mi pawl nih a thi a lin lio mipi pawl cu Capitol tiang luh hnawh ding in a ṭhawng. US President 46nak si dingin January thla 20 ah biakamnak a tuah cang tu President Joe Biden zong nih US ram sining tak dirhmun a phanh ṭhan khonak ding caah bia fang pawl hmang in chim le rel asi ve. Bia ruangah US rammi pawl karlak lungruallonak a chuak caah cu bia thawng lawngin US mipi pawl funtom kho ṭhan asi lai. Cu ruahnak in Joe Biden nih January 20 President thar biakamnak puai zong ah rualremnak kong a chim. Mipi karlak funtomnak kong le thil dik humhimnak le bia dik lo cu tei ding tiah a chim.

President Abraham Lincoln chan hrawng thok in US President biakamnak caan biachimnak ah rual remnak kong hi telh pah asi tawn. Asi nain January 20 ah President Joe Biden nih chim mi tluk in voi tam nolh asi mi cu an um men lai lo. Joe Biden nih rualremnak kong nolh lengmang hau ding tiangin nihin US Democracy tluk rawhral fawi mi hi cu an um hmanh ah a tlawm ngai men lai.

Hlan lio US President biakamnak bantuk in mipi um lo nak, rianṭuan ṭhing President nih don nak zong ton lo in Capitol himnak ding caah ṭuanvo la tu pawl hna lak ah chim mi biacahnak cu thinlung thar, nun ning thar, karhlan nak thar he rian thok dingin Joe Biden nih forhfialnak a chim. Asi nain cu rian thok ding ahcun US nih hawi iang lo in a ngeih mi din felnak le zulh phung, zalonnak, zauk phung dirpi tu hram pawl le uknak tlamtling timi pawl upat hmai zahnak timi tahfung pawl sin kir ṭhan ding lam tluan asi.

President thar Joe Biden nih lak ding mi rian lak ah kha hlan US President pawl nih an rak lak mi rian he aa dang ngei te. Phung ning si lo in tawlrel sual mi ruang ah US rammi 400,000 leng a nunnak a liam leng ah mipi tampi sifak harsatnak ton asi mi Covid rai doh ding hmanh hi rian har ngai pakhat asi. Amah zong nih a chim cia bantuk in Biden nih a lak dingmi ṭuanvo hi a ngan ngaingai. Mipi pawl pawcawmnak harsat an ton mi tawlrel asi lai. US President nih a ram a ser hau, a sining muru pawl dirpi ṭhan hau. Cu vialte sersiam dih kho nak ding caah Joe Biden President a ṭuan chung caan nak hmanh in a sau deuh lai. Sihmanhsehlaw, President ṭuan caan kum 4 chung ah Joe Biden a thil ti khawhnak cu hi thil pawl tlamtling tein a tuah kho maw tuah kho lo timi nih bia a khiah hnga ding mi asi.

US ramkhel tu pawl le ramkhel rianṭuantu pawl cungah mipi nih zumh ṭhan ding caah Joe Biden nih Washington ramkhel sining ah Republican le Democrat ramkhel buhnih karlak ah rualremnak serchuah piak ṭhan a herh. Joe Biden cu doh tu pawl he zong ningcang tein rianṭuan ṭi a harh mi asi lo caah ramkhel bu hnih karlak rualremnak ser ding hi a caah thil har asi lai lo. Asi nain Joe Biden nih ramkhel bu hnih rualremnak caah kap khat lei ramkhel tu pawl nih ṭuan rel pi a herh. Atu ah Congress cu Democrat pawl nih a ku kho nain Republican pawl dir hmun nih hin Joe Biden caah biapi an si ṭhiam ṭhiam. A luan cia mi zarh hnih, Capitol chung a rak luh hnawh tu pawl kha bia dik lo tang tla le President hlun Donald Trump chim rel mi pawl aa zumh sual mi pawl an si tiah Senator (Republican) Mitch McConnell zong nih a chim cang. Cu nih a langh ter mi cu US nih a ton cuahmah mi ral fek ternak phun khat zong asi. Nain, Republican Party nih cun Donald Trump thla dem tang le dirpi mi kal tak ngai taktak cu an i harh ngai rih.

President biakamnak ah Joe Biden nih mipi uknak dirpi ṭhan ding timi kong cu tam a chim lo. Mipi uknak dirpi ṭhan ding timi ah hin President Donald Trump le Capitol luh hnawh tu pawl kha phun ning in sual phawt ding le bia ceihnak zung on ding timi kong asi. Rualremnak kong dir pi lio caan ah President hlun Donald Trump biaceih ding timi cu ral a tam ngai mi thil asi nain cu thil cu President Joe Biden nih hrial thlu dih ding asi kho lai lo dah. January 20 President thar biakamnak puai he hmun khat ah US ram cu thil ding sining ah kir ṭhan nak caah a biapi mi karhlannak thok asi cang. Joe Biden nih hruaimi Cozah thar nih mipi he pehtlainak zongah zumhnak sersiam ṭhan a herh lawng si lo in bia dawh cah lo le thawng dik lo pawl zong khenkham dingin lam kawl a herh. Dinfelnak pakhat tang ah zapi nun cio asi tiin US rammi pawl nih a ruah khawh lawng ah US ram pi cu hmai lei ah a kal chin kho lai.

President hlun Donald Trump biakamnak nih a ṭuan chung tuah ser nak pawl a langhter bantuk in Joe Biden biakamnak nih a ṭuan chung vialte sining pawl a langhter ve te lai tiah ruah chan asi. Joe Biden nih ton ding mi thil pawl hi ruah kho lo leng tiang in a lian a ngan ngei te. US ram le vawlei pumpi nih Joe Biden nih a phorh dingmi ṭuanvo pawl hlawh a tling nak ding ca tu ah thlacam piak a herh lai i ruahchan mi zong asi.

LEAVE A REPLY

Please enter your comment!
Please enter your name here