Hakha khua ah tuah dingmi Nawi tiva dil ding kong he pehtlaiin thil sining fiang le dik mipi sin ah theihternak fiangfai in tuah hlan paoh cu Nawi dam dil kong thok hrimhrim lo dingin Chin Zaatlang Phu le sianghleirun kai sianghngakchia bu 48 nih Chin ramkulh cozah sin ah January 14, 2021 ah cakuat nak an tuah tiah theih a si.

Atu bantuk Nawi dam tuah timhmi kong he pehtlai in caan sau ah cun mipi ah thil ṭha nak in thil ṭha lo deuh tu a chuah pi sual lai ti ruang ah atu bantuk in Chin ramkulh cozah sin ah cakuat nak asi tiin cakua tu bu pawl aiawh in chimrelnak nawl ngeitu Salai Van Lian Thang nih cun a chim. “ṭhatnak lei ah caah ruahchan cu asi ko nain hi Nawi Dam saknak thawng in hmailei kum 10, kum 20 ah cun kan caah ṭhatnak lei si lo in ṭhat lo nak lei deuh tu a chuahpi sual lai tiah kan thin a phang, cu caah theih a herhmi sining le thawng fiang ṭha tein theihternak an tuah hlan lo paoh cu hi project cu thok piak lo dingin ca kan kuat nak hna asi, kan duhlo timi cu asi rih lo. Nawi Dam tuah a herh maw herh lo timi cu kan mipi cozah tiah ruah mi cozah nih atu bantuk thil tuah a timh tik ah mipi he aa ralkah mi silo in mipi he hmunkhat ah mipi aw an theih le hlat dih hnu ah an tuah lai tiah ka zumh” tiah Salai Van Lian Thang nih cun a chim.

Hakha khua vawlei a fek le a dor sining, vawlei hmun umtu ning aa thleng ningcang, 2015 kum mincimh lio caan thil sining pawl ruah le zoh chih in siseh, ram chung ram leng mifim thiam pawl nih dothlat mi sining zoh chih in siseh, Nawi Dam tuah mi ruang ah a chuak kho mi kokek sining rawhralnak le minung himnak pawngkam zeitluk in dah ṭih a nung lai timi cu ruah kho asi tiah cu cakuat ahcun telh chih asi. Cu asi caah Chin ramkulh cozah nih Nawi dam dilnak kong he pehtlaiin a biapi bik tinh mi, Initial Environmental Examination, Environmental Impact Assessment le Social Impact Assessment, Nawi Dam project design caah hman timh mi tangka zat …tbk zong mipi nih theih a herh mi sining vialte cu tling tein mipi sin ah theihternak tuah hmasa a herh tiah cu cakuat chung ah cun telh asi.

Hakha khua ah milu 50,000 leng an um i khua chung khuasa pawl 30,000 hrawng an karh cho kho ding asi caah mipi pawl din ti tlamtling tein an hmuh khawhnak ding caah Nawi Dam sak ding timi timhtuahnak cu Chin ramkulh cozah nih an tuah nak asi tiah theih asi. Hi kong he pehtlai in Chin ramkulh cozah aiawh chimrelnak nawl ngeitu Minister U Soe Htet nih “ Kan mipi he ṭha le rem tein ton biaruahnak ngeih a herh ding mi thil asi. Mipi he siseh khua mi lothlo pawl he siseh biaruah ding aum. Lothlo pawl chim bang khan zeirel lo tuk in sunghzatlak nak ding Project phun cu asi lo. Khua le ram ṭhahnem nak caah ruat buin tuah a herh mi asi. Kan mah zong nih cu Nawi Dam saknak deng hmun um lothlo pawl he ton chap ding kan ngei. Hi CSO pawl he zong ton ding kan ngei. Kan i ton tik hnu ah a herh mi chimrelnak cu ka tuah te lai” tiah a ti. Chin ramkulh cozah nih Nawi tiva dil nak ding caah ramkulh tangka hram Kyats 2,000 million tinh asi i 2021 kum ah sak hram thok ding in timhtuah asi. Nawi tiva dilnak kong he pehtlai in atu lio Nawi hmun ah cinthlak le leithuang hmun acer 40 hrawng asi i lei ngeitu pawl nih hi tidil hnga mi kong he pehtlai in duhlonak an langhter lawng si lo in State Counsellor sin zong ah August 2020 ah khan cakuat nak an rak tuah tiah theih asi.

LEAVE A REPLY

Please enter your comment!
Please enter your name here