National League for Democracy in Chin ramkulh aiawhtu Pyithu Hluttaw palai caah teinak hmu tu minung pahnih cu Union Election Commission sin ah report an tuah hna tiah theih asi.


Atu bantuk report tuah a tongmi Paletwa peng thimfung thlaknak in U Sein Aung le Falam peng thimfung thlaknak in Dr. Salai Riang Vel cu atu lio Pyithu Hluttaw palai pawl zong an si. U Sein Aung cu thimfung thlak lio ah thil dik lo tuahnak, ningcang lo in thimfung hmuhnak timi ruang pawl he report a ton cu asi tiah USDP leiin palai aa cuh ve mi Salai Khuai Yen nih a chim.

Thimnak ni asi hlan ni tlawmpal aa duh ah NLD lei nih thimfung thlatu ding pawl an umnak ralzaam dornak hmun ah eidin pawl phawt zamhnak, thimfungthlak ding in lemsoinak pawl tuahnak nawl onh asi ti lo mi November 7 zongah mipi lemsoinak an tuah ruangah atu bantuk in report tuah a ton hi asi tiah a chim chap.


“Thimfungthlak hmun asi lomi ralzaam pawl umnak hmun tu ahcun eidin le sa pawl pek asi lo i thimfung thlaknak hmun lawng pek timi cu aa thei ngai ko. Thimfungthlak dingin lemsoinak tuah asi timi cu hmuh fiang ngai mi thil asi” tiah Salai Khuai Yen nih cun a chim. Thimfung 9,000 leng aum nak hmun Paletwa peng, Pyithu Hluttaw palai U Sein Aung (NLD) cu thimfung 3,500 leng a hmuh i USDP palai cu thimfung 200 hrawng thlau in a tei. NLD nih eidin pawl a phawtnak ralzaam umnak hmun nih pek mi thimfung umnak Sami khua, Sang no. (2) le no. (3) ah NLD nih thimfung 300 leng tam deuh a hmuh ruang ah hi thimnak a phichuak caah biachat ti ah a cang tiah Salai Khuai Yen nih cun a puh.


Paletwa peng, Pyithu Hluttaw palai U Sein Aung tu nih cun report ca kuat a ton timi cu theih asi ko nain thil sining dikthlir cu ka thei rih lo tiah a ti. Paletwa peng, Pyithu Hluttaw palai thimnak hmun ah palai pathum nih zuamcawhnak an ngei. Chin ramkulh Hluttaw pathum komh ah thimfung thlaknak hmun 39 aum i cu lak ah NLD nih thimfung thlaknak hmun 36 tiang teinak a co. Ref: Myanmar Now

LEAVE A REPLY

Please enter your comment!
Please enter your name here