Aralaimi cacawn nithum ni, America ram Washington DC khua ah tuah ding US President a thar biakamnak puai caah humhimnak lei ṭuanvo ngeitu minung 25,000 cu ṭuanvo pek an si. Cu ṭuanvo ngeitu pawl an sining le tuanbia pawl zong FBI nih dothlatnak a tuah lio tiah theih asi. National Guard chungin dohnak hna a chuak kho men timi ṭihphannak aum caah atu bantukin dothlatnak an tuah hi asi. Ralkap lei ṭuanvo ngeitu Ryan McCarthy nih cun amah tel in a dang hruaitu pawl zong nih ṭihnung ral sining hmuh asi lo ti le dothlatnak an tuah mi zongah lunghrinnak zei hlei hmuh asi lo tiah AP news he ton lio ahcun a chim. “Washington DC khua ah ṭuanvo pek mi humhimnak lei rianṭuantu vialte an konglam hlat le zohnak cu FBI nih a tuah cuahmah lio asi i pakhat hmanh taang lo in dothlatnak tuah asi, avoi hnihnak, avoi thumnak tiah hlat an si lio” tiin Ryan McCarthy nih cun a chim. Ram hruaitu biakamnak puai hlan ah cheukhat bu pawl nih hriamnam ken in cawlcangh ding timhlamhnak an ngei tiah thawng theih asi ti zong in a chim chih. President Donald Trump tha petu pawl nih Capitol cung ah luhnawhnak an tuah hnu zarhhnihnak ah President thar biakamnak tuah asi lai caah atu bantuk humhimnak lei ralrin ding in a hlei in ṭuanvo lak le timhtuahnak ngeih asi. Capitol Hill inn hmun zongah haukulh mi sang deuh pawl chiah asi i hriamtlai lei ṭuanvo ngeitu pawl nih hngah asi.

Capitol hmai i hmun rawn zong khar asi i vawlei tang cit mi tlanglawng lam pawl zong phih asi dih. Washington DC khua laifang hmun tam nawn lawng si lo in Virginia ramkulh lei in Washington DC lei luhnak hlei pawl zong kham dih asi. Cu lawng si lo in humhimnak lei ṭuanvo ngeitu pawl lawng si lo in a dang ṭuavo ngeitu runvennak phu pawl thong leng zong Washington DC khua chungah hmunhma an lak dih tiah theih asi. Ref: VOA

LEAVE A REPLY

Please enter your comment!
Please enter your name here