Arakan Army le ARSA pawl cu Myanmar le Bangladesh ramri ah an cawlcang deuh caah Kawl ralkap lei nih ral vennak thazaang chap deuh asi tiah chimrelnak nawl ngeitu Maj. Gen. Zaw Min Tun nih a chim. “Butitaung, Maung Taw lei ah AA le ARSA pawl an cawlcang deuh ngai, a bik in vawlei hmun hma lei ah asi” tiah Maj. Gen. ZMT nih cun a chim. Kawl ralkap lei nih Bangladesh lei deuh an cawlcang ruang ah September 13 ah Bangladesh Foreign Affairs Ministry nih Dhaka khua um Myanmar Ambassador cu au in ralrinnak bia an cah ti asi. “Ramri ah ralkap lei an karh colh mi kong he pehtlaiin Bangladesh lei nih an thin a phang. Cu he pehtlai in ṭuanvo ngeitu pawl nih Myanmar Ambassador zong ralrinnak an pek” tiah Dhaka Tribune thawnzamhnak nih a ṭial. Bangladesh he ramri aa tonnak Rakhine le Chin ramri paohpaoh ah kawlram ralkap 2,500 leng cu September 12 ah an chiah hna, atu bantuk ralkap chap mi hi AA raldoh dingah tiah Myanmar ram lei nih a chim tiin Bangladesh lei thawnghlat nak in theih asi tiah cu Dhaka Tribune nih cun a ṭial chap.

Myanmar ram cozah lei nih cu hi kong he pehtlaiin bia fiang an chim mi aum rih lo. Ralkap lei ṭuanvo ngeitu Maj. Gen. Zaw Min Tun nih cun “kan ram humhimnak caah kan tuah mi asi. Thil sining le ral thawngpang hoih in kan tuah mi asi, ram 2 karlak pehtlainak a hnorsual ding thil aum lo tiah ka hmuh” tiah ati. Kawl ralkap lei nih tilawng in pawngkam kilvennak cu tuah peng asi bantuk in Nat tiva lei zong, rili lei zong kilvennak an tuah tawn, vawlei lei tu hi atu lio hrawng ah tam deuh an tuah asi. Bangladesh lei nih atu bantuk in Myanmar Ambassador cung ah ralrin an pek mi he pehtlai in ramchung thawng la tu pawl nih tam ngai an lanhter tiah theih asi.

“Atu lio caan thawngpang kan theih mi a tam caah pawngkam kilvennak kan tuah a tam deuh ngai caah an auh mi asi kho men” tiah Maj. Gen. ZMT nih cun ati ve. Ramkhel lei kongkau hlathlaitu Dr .Aung Myo nih “ralkap lei nih atu bantuk a tuah mi cu Bangladesh ram sining va hnorsual asi lo, a chuak kho mi ral pawl ralrin cia tu khi asi caah thil fiang asi ko. Ram hnih karlak ah buaibainak aum ding asi lo” tiah ati. Bangladesh cozah nih atu bantuk Myanmar ram lei ralrinnak a pek mi hi AA le ARSA caah a tuah mi cu asi lo nain ramchung ah mipi nih an hmuh ning aa dang kho men” tiah a chim chap.

Myanmar le Bangladesh palik karlak ah kaphnih fonh in runvennak tuah tawn asi i thawngpang zong thanh asi peng rih ko. ARSA cu 2017 kum Rakhine ramkulh chaklei Bangladesh ramri ah Myanmar ram humhimnak kilveng tu hmun pawl cu an rak ral hna i cu he pehtlaiin Myanmar ram lei nih lehrulnak an tuah tik ah minung sing leng Bangladesh ram lei ah an rak zaam tiin ramdang thawnglatu pawl nih rak lengmang asi. AA cu 2015 kum thok in Rakhine ramkulh ah hmunhma an khur i Chin ramkulh Paletwa ah hmunhma an rak la hmasa. Cu dih cun Rakhine ramkulh Butitaung, Kyawtaw, Yataetaung, Ponna Kyun, Min Pyar le Myaut Oo khua pawl ah lut in hmuhma biatak tein khur khonak ding caah an cawlcang lio asi.

Source:-irrawaddy.

LEAVE A REPLY

Please enter your comment!
Please enter your name here