2020 kum thimnak cu duhsah in a nai thluahmah cang. Atu kum thimnak ah hin tah Chin ramkulh caah zeibantuk saduhthah dah asi, mipi leiin tah zeibantuk ṭuavo dah kan ngeih ve timi pawl he pehtlai in biaruahnak cu Chin mino chung in Nancy Dawt Chin Sung le Amisungthluai Chin zonghe caan karlak ah biaruahnak kan ngeih khawh hna.

👉CCN Biahalnak 1️⃣ 2020 kum Myanmar ram thimnak he pehtlai in Chin ramkulh caah zeibantuk phichuak khi dah va si te seh law tiah na saduhthah asi?

👉CCN Biahalnak 2️⃣ Mipi lei in tah hi thimnak he pehtlai in zeitin dah an i teltum ah a herh tiah na ruah?

👉CCN Biahalnak 3️⃣ Chin ramkulh caah zeibantuk cozah hi dah kan herh bik mi asi tiah na hmuh?

👉CCN Biahalnak 4️⃣ 2015-2020 caan chung ah aho MP khi dah mipi caah teimak in rian a ṭuan tiah na hmuh (Pyidaunsu Hluttaw ah siseh, Ramkulh Hluttaw ah siseh)?

👉Bialehnak 1️⃣ Myanmar ram phunhram ning in cun zauk phung muithlam a cuang bik nak cu kum 5 voikhat tuah mi thimnak hi asi tiin ka ruah. Cu asi bantuk in kan Chin ram ca zong ah a biapi ngaingai mi khua caan asi. Mipi nawl ngeihnak kha hmual ngei taktak in lang kho seh law Chin miphun sining aa fiang mi, Miphun dothlennak muru a thei, a fiang i a dirpi mi le mipi caah zeidah a ṭha bik in rianṭuan kho ding ah aa zum mi nih teinak cotu va si te hna seh law ti hi ka saduhthah asi.

👉Bialehnak 2️⃣ Mipi hmual kan ngeihnak hi theih i hman thiam a herh. Thimnak timi cu mipi um lo in tuah kho asi lo bantuk in Union Election Commission nih thanh mi ning asi ah cun Chin ramkulh in mipi 340,000 leng nih 2020 kum thimnak ah thimfung an thlak kho lai. 2015 kum lio ah khan cun 270,000 leng hrawng lawng an si i milu 60,000 leng kan i chap khan asi. Cu caah kum 18 a tling cang mi poh poh nih cun thimfung thlak hi rian nganbik pakhat ah kan i khinh a hau. Cu lawng si lo in zeibantuk palai le ramkhel bu dah aa zuam ding mi an si, zeitluk in dah rian an ṭuan khawh lai, zei bantuk timhtuahnak dah an ngei …tbk tete zong khi hlat le theih kho i zuam uh sih law a ṭha ngai hnga. Phundang chim ah cun thil pakhat kan cawk lai hmanh ah dikthlir in hlat le zoh dih hnu ah cawk va si kaw, Kum 5 chung Ram le Miphun caah rian a ṭuan ding mi zong cu bantuk nak niam lo in theih hngalh kho i zuam kha cu a lak si lai lo tiah ka ruah.

👉Bialehnak 3️⃣ Keimah hmuhnak in cun tuan deuh ka chim cia bang khan Chin miphun sining muru a thei i zeitin dah kan miphun kan sersiam kho lai timi aa fiang mi cozah, miphun dohthelnnak hi zeidah asi timi aa fiang mi cozah le ralṭha in hmai ah a kal ngam mi cozah, mipi mithmai le aw lawng a zoh le theih aa zuam zungzaltu cozah phun khi kan herh. Cu lawng si lo in khahlan kan Chim miphun sining, atu lio sining le hmai lei sining a hmuh cuan kho tu cozah asi a herh.

👉Bialehnak 4️⃣ Aw… Chin ramkulh lei ka chim hlan ah Myanmar ram huap in Hluttaw pawl, MP pawl an cawlcangh ning le an chim rel mi tete khi caan sining nih a ka pek ah cun theih kho ka zuam tawn ve. Cheukhat Hluttaw pawl cu an aw an a thang ngai tawn, chim le rel zong an ti kho ngai. Cu lak ah cun Rakhine in Daw Htoo May, Yangon in Dr. Thet Thet Khine (Mon / Karen in MP pakhat zong aum rih, a min ka cingken deuh vak lo) …tbk zong khi an chim rel kho ngai, an cawlcangh ning zoh tik ah an za. Mipi nih thim mi palai an si maan aum kan ti lai cu. Chin ramkulh in cun a ho setset khi dah tiin chim ding ka hmu lo. Mah balte mipi he pehtlainak le chim phuannak tete khi chan he aa tlak ning in hman le teimak kho si deuh ve seh law cu hmai lei ah cun a ho khi dah tiah chim ding an um te men ko lai.

👉Bialehnak 1️⃣ USDP le NLD nih Kum 5 veve a kan hruai cang caah 2020 thimnak ahcun Party pakhat lawng nih hruai silo in Chin Party zong cozah sernak ah itel ve seh ti hi ka saduhthah asi.

👉Bialehnak 2️⃣ Rammi sinak ah mirum le sifak kan itlukruannak cu thimnak mee (Vote) hi asi. Vote kan ngeihmi le aman ai khat dih caah kan vote alak si ter hrim loin ralring tein vote thlaknak in mipi nih tutan thimnak ahhin vote thlak palh lo tein kan itel a herh.

👉Bialehnak 3️⃣ Chin ramkulh le Chin miphun caah Federal Democracy a dirkamhmi cozah le hruaining le kalpi ding (policy le master plan) tha te a ngei mi cun eihmur le sifah a kan doh piak ngamtu kan herh bik tiah ka ruah.

👉Bialehnak 4️⃣ Pumpak in van thlir awk kai harh ngai. Kan palai pawl hi ‘A hal hal’ lei ahcun kan ti khawh ngai nain Issue le zeidang upadi sernak ahcun lunghmui ruam lo.

 

LEAVE A REPLY

Please enter your comment!
Please enter your name here