Atu ton lio mi Democracy Federalism Union ser ding caah harsatnak pawl cu 2008 Phung hrampi remhnak he pehtonh in lam kawl khonak lam muisam cu a cuang thluahmah cang lai tiah the State Counsellor Daw Aung San Suu Kyi nih August 13, 2020 Joint Implementation Coordination Meeting ah a chim. Naypyitaw MICC-1 ah tuah mi JICM hramthok biachimnak ah cu bia cu telh in a chim chih mi asi. Union Peace Conference he pehtlai in Cozah, Ralkap le Tlangcung Hriamtlai bu pathum fonh in nithum chung ton biaruahnak an ngei mi sining pawl he pehtlai in ceihhmai nak tuah ding caah avoi 9nak JICM cu tuah asi. Atu tan JICM ah Tlangcung Hriamtlai bu in luzik pawl, Daw Aung San Suu Kyi le Deputy Commander in Chief Vice-Senior General Soe Win tiah hruaitu pawl tlamtling tein an kai. Tlangcung hriamtlai bu lei ah CNF in Chairman Pu Zing Cung, Vice Chairman-2 Dr. Lian Hmung Sakhong le General Secretary Salai Thla Hei an kai tiah theih asi.

Ton biaruahnak adih hnu thawngthanhnak ah Cozah lei aiawh chimrelnak nawl ngeitu U Zaw Htay nih “JICM in a phichuak lak ah a ṭha ngai mi cu Phung hrampi remhnak he pehtonh in ṭuanchuah ningcang pawl aa tel mi hi asi” tiah a chim. Federal Democratic ram sersiamnak ah hram fek ding, thlen chuah ding le sehchih ding timi a dot dot in ramkhel lei in ton biaruahnak, fimthiamnak lei in pehtonhnak tuah bu in a donghnak ah cucu serchuah ding in hnatlaknak kan ngei kho tiah a chim chap. Tahchunnak ah ramkhel lei hoih in hnatlaknak pakhat kan hmuh tawn tik ah fimthiamnak lei in ceih chap asi lai i 2008 Phung hrampi chung um aa pehtlainak kongkau pawl ah khan va remh te ding in ceih asi tiah U Zaw Htay nih cun fianternak a tuah, “Phung hrampi remhnak zong aa tel chih dih tinak khi asi” tiah ati. JICM donghnak biachimnak ah Vice-Senior General Soe Win zong nih “Nihin ton biaruahnak a phichuak cu kan mipi vialte zong nih nan i lunghmuih men lai tiah ruahchannak ka ngei” tiah a chim. “Kan ram, kan miphun he aa pehtlai mi phunphai, zatlang nun le nunphung he aa tlak mi Democracy le Federal sining ah hmuitinh buin atu nak in thilṭha chuak chap ding in hmai ah nor ko uh law” tiah a hun chim chap.

Kahdaihnak a tuah tu Tlangcung Hriamtlai bu aiawh in donghnak biachimtu Col. Sai Ngern zong nih “mah pumpak le mah bu pakhat ṭhahnemnak ca lawng ah a ṭuan mi si lo in zapi he aa pehtlai mi ramkomh a ṭhatnak ding hmaithlak in ṭuan si timi lungput he biaruah asi caah atu bantuk a phichuak ṭha pawl kan hmuhnak asi” tiah ati. August 13 ah tuah mi JICM a dih in kahdaihnak fehternak caah biaruah ningcang, ara lai mi Union Peace Conference ah hnatlaknak ngeih ding mi kongkau, cu hnatlaknak cu hruaitu pawl nih UPC chung ah minsen ṭhut ding kong, hmailei pehzulh ding mi kongkau, UPC tuah ding ni caan le sining …tbk cu ceih asi leng ah NCA minṭhut rih lo tu Tlangcung Hriamtlai bu pawl an i tel tum ding kongkau pawl he pehtlai in kaphnih hnatlaknak an ngei kho. Hi chung ah hin ara lai mi avoi 4nak UPC ah NCA chung um zulhphung le tuah ding pawl ningcang tein serchuahnak kong (15), 2020 kum hnu lei a dot dot in tuah ding kongkau phun (8), Federal Principles hnatlaknak (5) cu Union Accord-3 hnatlaknak zong an i tel tiah theih asi.

Hi Union Accord-3 chung um ding pawl he pehtlai in Union Peace Dialogue Committee ton biaruahnak ah hnatlaknak ngeih asi rih lai i a chung sining dih lak tu cu theih asi rih lo. August 17 ah tuah ding mi cu UPDJC ton biaruahnak ah ramkhel lei rianṭuan bu pawl in aiawh tu pawl an kai lai ti asi. Avoi 4nak Union Peace Conference tuah nak ding caah kum 2 leng caan karlak ah an rau i ara lai mi August 19 in 21 tiang Naypyitaw ah nithum chung tuah asi lai.

Note: Hmanthlak Lian Sakhong FB, Ref:myanmarnow.

LEAVE A REPLY

Please enter your comment!
Please enter your name here