Vawlei cungah zawtnak rai/pul hi chan khat ah voikhat tal cu arak um bal tawn tiah dothlatnak pawl siin hmuh le theih asi. Atu lio zongah kan chan chung hmuh ton bal lo mi Covid-19 timi zawtnak cu vawlei cung ramkip nih ton cio asi. Zawtnak hi thleidannak a ngei lo, mikip cung ah a tlung kho mi asi leng ah damlonak hram a rak ngei cia bal tu caah cun ṭih a nung deuh ngaimi covid-19 zawtnak asi. Coronavirus tiah WHO nih minsak asi mi SARS CoV-2 nih cun covid-19 zawtnak cu a chuah ter.US ramkip um kan miphun hawi lak ah hi zawtnak in a zaw mi zeimawzat an um len tiah theih asi ve bantuk in kan mah le si khawh tawk in bawmhchanh le thazaang pek asi cio. Cu lak ah Covid-19 zawtnak in a dam ṭhan cang mi CCN Team chungtel Pu Siang Tling he biaruahnak kan ngei kho.

👉CCN Biahalnak: Zeitin dah na zawt ningcang asi?

👉Bialehnak: Cumpi phunin ka um hmasabik. Kaa panh kholo. Rawl ka duhlo. Ka taksa an fak dih. Hiti ruah ahcun tlangrai zawt phun sawhsawh te he aa khat ko.

👉CCN Biahalnak: Covid-19 zawtnak asi timi zeitik hrawng ah dah theih asi?

👉Bialehnak: Ka zawt le cangka Sikhan ah ka piah cawlh i an ka check cawlh. Flu na silo caah Covid-19 na si kho men an ka ti i midang he cawlh in umlo ding le ralrin dingin an ka chimh. Ka zawt nili nak lawngah Covid-19 na si (positive) tiah thawng an ka thanh.

👉CCN Biahalnak: Covid-19 zawtnak asi timi na hngalh hnu ah zeitin dah na um ṭhut ningcang asi?

👉Bialehnak: Covid-19 in na zaw an ka ti le cangka ka chungkhar rian ani din dih cio. Rian herh in akan leng duh mi zong inn chung kan luh ter hna lo. Kan chungkhar tu cu fak chinchin in kani rangring hna. Hmurhuh le kuthrawlh tampi kan rak i chiah cia i a rak i rel ngaingai.

👉CCN Biahalnak: Na zawt lio caan ah zeibantuk temhtuarnak dah a har bik? 

👉CCN Bialehnak: Covid-19 zawt lio ah a har bikmi cu taksa fah hi asi ko lai dah ka ti. Cun, tha zong a dih dih. Mah ruangah an rak i thih phah nak hi asi ka zumh.

👉CCN Biahalnak: Ngandamnak lei zung nih tah zeitin an in zohkheh ningcang asi?

👉Bialehnak: Ngandam nak zung lei he kani pehtlai lo. Sikhan tu he kani pehtlai i zarhkhat voikhat chekup ka va i tuah. Ngandam nak zung nih ka dam hnu ah ph an ka chawnh i ka dam cang e ka ti awk hna.

👉CCNBiahalnak: Hi covid-19 zawtnak doh kho nak ah sii bawi pawl nih zei sii setset dah an in din ter?

👉Bialehnak: Covid-19 zawt nak dam nak caah si a um rih lo bangin Tylenol lawnglawng kan din mi asi ko. Ibuprofen hrimhrim din lo ding. Si dang pawl hna zong sibawi nih pek lo mi cu mah nawl in din hrimhrim lo ding an si. A ruang cu dam lei lo in cei deuh i tha dih in thih khawh asi.

👉CCNBiahalnak: Na rianṭuannak lei nih tah zeibantuk bawmhchanhnak tal an in pek mi aum ma?

👉Bialehnak: Kan rian ttuan nak Company nih kan dam lo chung tangka an kan pek dih ko. A mah belte a positive mi bakbak lawng an kan pek. Kan mah zawt ruangi aa din ve mi nu/va le innkhat khuasa pawl cu tangka pek an silo.

👉CCNBiahalnak: Zeitik ah dah Covid-19 in na dam thiang caan asi?

👉Bialehnak: Civid-19 zawt nak hi an kan chek in ni 14 chungah nan dam cang e an ti men hna i a zaw tthan mi an um len. Kei cu zarh 5 nak ah sikhan ah ka thi an ka lak i an chek hnu ah na dam cang an ka ti.

👉CCNBiahalnak: Na dam hnu ah tah ralrin ding …tbk an in cah mi aum ma?

👉Bialehnak: Kan dam cang hnu zongah ralrin peng a ttha. Covid-19 in voikhat a zaw i a dam cangmi cu an zaw nawlh kho tilo ti an chim mi hawi kha a si silo mi a rak si. Sibawi te nih cun nan zaw nawlh kho ko, ralrin ten um ko u an kan ti.

👉CCNBiahalnak: Hi covid-19 zawtnak in i khamh kho nak ding caah zei pawl dah zulh a hau tiah na hmuh?

👉Bialehnak: Covid-19 zawt nak in i khamh khawh nak bik dingcu ralrin hi asi ko. Inn chung i kawrh le mibu sin um lo hi kan him nak bik a siko.

👉CCNBiahalnak: Adang chim duh mi le siaherh bia aum ah cun …?

👉Bialehnak: 11. Covid-19 zawt nak i ttih tuk ding cu a silo naten ralrin taktak cu kan hau. Laimi hmurka in ka theih ngaimi bia ah “Covid-19 cu thih nak ngaingai a silo” an ti. Thih khawh tuk a rak si. A zaw mi ciocio ah kani lo dih hna lo. A positive i a zaw lo mi an tor. Fak lak i a zaw mi nih cun voi 2 nak zawt nawlh sual ding cu kan ttih tuk cang. A har i har khi si. Cun kan dam kan ti hnu zongah kan cuampuat. Zawt nak ttha lo taktak arak si.

LEAVE A REPLY

Please enter your comment!
Please enter your name here