Vawlei cung a sau bik ramchung buainak he a ṭhang mi Myanmar ram cu nihin tiang zong ah daihnak lamthluan hi fawi tein panh khawh ding muithlam a leng rih lo. Tlangcung hriamtlai bu pawl sining hun zoh tik ah miphun caah zumhnak he fak tein a dir mi lamsialtu an si caah mipi nih dirpi le rianṭuan pi timi a biapi ning zong a hun lang ngaite. Myanmar ram khuasa mi miphun lak ah tlangcung miphun tam deuh hi cu hriamtlai bu aum lo ti awk tluk khi asi. Kan nih Chin miphun zong ah Chin National Front/Army cu 1988 kum thok khan miphun le ram humhimnak caah tiah rak dirh asi ve. Ramkhel biaruahnak ah Chin ram le Chin miphun caah tiah hmaikal tu an si.


Kum 2015 thok hrawng in Arakan Army le kawl ralkap karlak ah raldohnak a hun chuak thluahmah. 2019 kum thok hrawng ah raltuknak cu a hun zual chinchin. Raltuknak Rakhine ramkulh le Chin ramkulh, Paletwa peng chungah ral an hun i tuk caah ral nih a chuah pimi harsatnak zong cu mipi nih hun tuar in tluahmah asi. Chin ramkulh cung ah atu bantuk hmunhma lak in ral doh mi kong he pehtlai in Chin National Front nih Arakan Army cu Chin ramkulh chung ah hmunhma khur lo ding ralrinnak a pek tiah July 15, 2020 ah khan thawngpang a hun leng.


Hi kong he pehtlai in CNF aiawh chimrelnak nawl ngeitu Salai Htet Ni (Assistant Secretary2) le CCN Team nih biaruahnak kan ngei. Atu bantuk caan pek in biaruahnak a kan tuah piak tu Salai Htet Ni cungah lawmhnak kan ngei.


👉CCN1️⃣ Biahalnak: CNF Central Executive Committee meeting (avoi 2nak) nai te ah nan tuah tiah theih asi. Zei kong dah a bik in nan ceih mi asi?
👉Bialehnak: Avoi 2nak Central Executive Committee Meeting ah hin a tu 2020 kum chung avoi khat nak Central Committee le Central Executive Committee Meeting pawl biakhiah mi Work plan implementation kantuahmi/ kan tuah kho rih lomi pawl ceikhan nak kan ngei. A bik in CNF nih kan ngeihmi Department rian pawl kan ti lai.

👉CCN2️⃣ Biahalnak: Atu lio Paletwa peng thil sining he pehtlai in CNF nih zeitin dah a hmuh ning asi? 
👉Bialehnak: Atu lio Paletwa peng chung thil sining cu zapi thei asi. Kawl ralkap le AA ralkap kaphnih an i kah ruang ah kan mipi an thi, thah an tong, inn le lo chuak tak in khua le ram ngeilo bantuk in an tli an zam. A herh le herh lo ah thong hna an thlak. Ti le rawl lo in harsat an tong. Cu caah kutkhih in zoh sawhsawh awk an ṭha hrim ti lo. 


👉CCN3️⃣ Biahalnak: Hi kong he pehtlai in CNF le Arakan Army karlak ah chimrelnak zeital aum maw?
👉Bialehnak: Hi kong ah AA pawl he phung lam tein voi (2) chimrel ṭinak kan ngei. Asi nain kan duh mi a tlamtling lo.


👉CCN4️⃣ Biahalnak: AA lei chimrelnak nawl ngeitu nih ral a tho mi cu kawl ralkap nih tlangcung miphun pawl umnak hmun ah a rak kan doh ruang ah asi tiah a rak chim bal. Maj. Gen Tun Myat Naing zong nih CNF nih statement an chuah mi cung ah kan theihthiam ko asi nain thilsining ruang ah atu bantuk in kan lut mi asi tiah ati. Hi he pehtlai in na hmuh ning?

👉Bialehnak: Kawl ralkap hi Myanmar ram / state ralkap tiah kan pom kho/ kho lo mi cung ah ai hngat deuh rua. Kawl ralkap hi Myanmar ram pumpi ralkap tiin vawlei cung pi nih pom le thei asi. Ram pumpi ralkap nih cun duh zong/ duh lo zong/ pom zong/ pom lo zong ah ram pumpi himnak le ram security kong ah ṭuanvo kan ngei an ti ko lai. Cu dirhmun in tlangcung hriamtlaih pawl cu tapung an kan ti i kan umnak ah an  kan rat hnawh i an kan kahnak cu asi. An mah lei  kawl ralkpa lei kap in cun kan dik an ti ve ko lai. 

Cun Tun Myat Naing chim mi cung ah AA si seh, a dang kan hawi hriamtlaih bu hna siseh, i theithiam cio asi ko. An sining/ an hmunhma a bi ngai ti zong kan theithiam veko. Biahalnak pahnihnak ah ka chimmi kan mipi dir hmun kha ruah lo awk a ṭha lo. Kan mipi kong an kan ruah piak ve a hau cuta. Cu caah Statement ah War Crime timi biafang tiang kan hmanhnak asi. 


👉CCN5️⃣ Biahalnak: Chin minister pakhat asi mi U Soe Htet nih CNF hi Paletwa peng ah hmunhma rak la seh law thil sining hi atu bantuk a zual lai lo tiah a rak chim bal. Hi he pehtlai in tah CNF nih hmailei ah Paletwa peng he pehtlai in zeitin rianṭuan nan i timh?

👉Bialehnak: Minister Soe Htet hi hriamtlai asi ve bantuk in hriamtlai um tuning le thil umtu ningcang hi a thei tuk ve lai.  Paletwa ah hmun khur ding in Cozah le ralkap sin kan hal peng. Ni hin tiang a kan sianh lo. Atu cu AA nih hmunhma an lak cang. Hriam tlaih ah cun “Hmunhma humhak kho” hi a biapi tuk. Paletwa ram ah cozah nih umnak hmunhma rak kan pe seh law thil sining hi aa dang ko lai tiah ka ruah. Mipi thisen luang lo/ rethei lo tein cabuai cung raldoh hi kan duh mi asi nain atu cu AA le Kawl ralkap i kah ruang ah kan mipi thisen a luang cang.  Cu caah kan statement ning in kal phawt kan i timh ko.


👉CCN6️⃣ Biahalnak: AA nih Chin ramkulh ah hmunhma khur lo ding in CNF nih ralrinnak a pek tiah kan theih. Hi he pehtlai in zeibantuk lam in dah tawlrel nan timh?

👉Bialehnak: Kan Statement kha  AA nih a kan zulh duh lo ah cun thil a cang mi vialte hi AA le Kawl ralkap cung ah aa hngat lai. Buaibai lo tein thil ṭha chuakpi kan duh tuk ko nain kan ruah ning asi lo ah cun hriamtlaih kan si bantuk in i kahnak tiang a chuak kho mi asi ko.


👉CCN7️⃣ Biahalnak: Tlangcung hriamtlai bu pawl nan si veve caah, atu bantuk thil sining nih hin miphun pakhat le pakhat karlak ah zeibantuk thil dah a chauk kho mi asi?

👉Bialehnak: CNF siseh AA siseh mipi tha peknak  le dirpinak he miphun dohthlennak a tuah mi kan si. Kan nih CNF chinchin cu mipi nih pekmi ti le rawl, mipi chaw le va, mipi thlacamnak,  mipi dirkamhnak le mipi dohthlennak lamthluan zulh in dohthlennak a tuah mi kan si. AA cawlcang ning hi zoh lengmang tik ah miphun pakhat le pakhat kar ah buainak tiang a chuah pi lai lo ti ka chim ngam lo. A chuak sual ah cun CNF ruang ah asi lai lo. Chin le Arakan miphun cu Chinram le Arakan ram ah hlan lio piin hmunkhat tein a um ṭi mi  kan si i  miphun karlak buainak tiang a chuak ding hi cu kan duh hrim lo. 


👉CCN8️⃣ Biahalnak: CNF nih atu bantuk AA nih Chin ram ah hmunhma khur lo ding in ralrinnak a pek mi he pehtlai in cheukhat nih CNF zong AA bantuk dirhmun a phan kho ve mi asi. Atu lio AA sining ruahpiak thiam tu hi unau sinak le tlangcung hriamtlai bu pakhat le pakhat tha peknak deuh tu asi tiah an ti. Hi he pehtlai in na hmuh ning?

👉Bialehnak: CNF caah zawnruahnak question tiah ka ruah,  ka lawm. Na chimmi hi a dik ngai. Ni chuak lei kan hawi hriamtlaibu chung ah hi bantuk thil hi a um peng ve.  Mah le mah kar ah hi bantuk a chuak tik ah  kan tha zang a der lai. Cucu a ho dah ai lawm lai ti zong kan ruat. Kan hriamtlaih hawi nih zeitin an kan hmuh lai ti zong kan ruat. CNF nih Paletwa peng hi Chin ram vialte lak ah Nainganzi, Sipuazi, Luhmuhzi a tlacham bik mi hmunhma in kan hmuh caah Paletwa peng hi Special Area tiin kan i zoh mi asi. Cu lio ah Paletwa lei kan mipi nu le pa hna nih kan sin ah an ra riangmang i, rak kan khamh uh law tiin an kan nawlnak aw le an hi celh ding asi lo. A kan cawm tu kan mipi nih an cawm mi pa sin ah a nawl ṭhan timi cu nan celh cio lai lo. Cu caah na question le Paletwa peng kan mipi harsatnak hi a cuai kan thlaih i thil ṭha chuak seh ti in statement zong  kan rak chuak nak  asi. 


👉CCN9️⃣ Biahalnak: Atu bantuk Myanmar ram nitlak lei hmun ah ral a tho i hi ruang zong ah kan Chin miphun tampi harsatnak ton asi. Hi kong ah ahodah ṭuanvo a ngei bik? Zeitin dah hihi tawlrel ah a ṭha bik lai tiah na ruah?

👉Bialehnak: A bik in buainak a chuah pitu hna hi ṭuanvo an ngei bik. Cu tin ka ti ruang ah ṭuanvo kan ngei lo ka tinak asi lo. Ṭuanvo kan ngei dih. Cu caah kan nih CNF zong ṭuanvo kan ngei ve bantuk in thuk deuh in cawlcang ding kan i timh ve nak cu asi. Cun Chin State cozah siseh, Political party le Chin Civil Society hna siseh, Biaknak lei in siseh humanitarian ground lei in an ti kho tawk an cawl cang ve. Paletwa kan ram le kan chin mipi khamh ding ah lungrual tein ṭangh ṭi ding ṭuanvo kan ngei.


👉CCN🔟 Biahalnak: Mipi sin ah chim na duh bia le a dangdang?

👉Bialehnak: CCN nih atu bantuk interview nan kan tuah caah nan cung ah ka lawm. Kan zawtnak hi doctor sin ah midang nih vaa zohter sehlaw kan dam bal lai lo. Kanmah hrim nih doctor sin vaa i zohter lawng ah kan dam lai. Kan ramle kan miphun sining le si ter kan duhmi hi midang nak in kan mah lila nih kan theih bik i, kan mah hrimhrim nih kan chanchuak a hau. Cucu Chin miphun ka si ai timi poh poh ṭuanvo kan ngei cio. Ka lawm.

LEAVE A REPLY

Please enter your comment!
Please enter your name here