American Marine Corps ah Sergeant rian in kum 7 chung rian a rak ṭuan tu Ma Thae U cu US ralkap thonginn ah thlak asi. Ma Thae U cu 2015 kum dongh lei ah American Marine Corps cung ah ningcang lo in nupa sinak phung buar in voihnih khel te ton asi nain Marine Corps lei ṭuanvo ngeitu upa pawl nih ningcang tein hlathlai le zohhlatnak an tuah lo caah thinlung fahnak lei le harsatnak a ton tiah Thae U hringtu pa U Aryu nih a chim.

“Hi thonginn ah an umternak hi April thla dih khan asi, a umtu le a tuahsernak pawl aa thleng i a thin tawi a fawi. A tlangval pa he hmunkhat ah an um ṭi, a tlangval pa cung zong ah thin tawinak he hruhru hranghrang in a tuah. Nam he zei he a hro cer. Cu kong he pehtlai in an pahnih cu an buai. Cun domestic violence a tuah tiin tuan deuh cu lung lei ngandamnak siizung ah an kuat. Mah dih in thonginn ah an kal pi. Thonginn ah an kuat hi June thla ah khan asi.

Lung lei ngandamnak siizung ah an chiah nak cu April thla in khan asi cang” tiah a chim. Ma Thae U cu domestic violence sualnak ruang ah ralkap thonginn chung ah April thla in chiah a rak si nain chungkhar pawl sin ah theihternak tuah zong aum lo i chungkhar he tonnak nawl zong pek asi lo tiah U Aryu nih cun a chim “Ton khawh asi lo, thonginn chung ah an chiah. Ka sin zong ah thawng an ka thanh lo, ca zong kuat asi lo, zeitin hman in pehtlai khawh asi lo. Public Defender pakhat a kan chiah piak Mr. Blair ti mi asi, Captain rank asi. Amah zong nih a ṭih ngaite, ralkap lei in Lawyer asi, Public Defender bantuk phun khi. Asinain bia kan i ruah chun i ralchia ngaimi a lo. Chuahnak nawl zong um lo, cu caah Civil Lawyer hlan kho ding kan izuam lio. Ralkap lei nih nawl an kan pek lai maw pek lai lo ti cu kan thei ve rih lo” ti asi.

Hringtu pa pakhat zong asi, chungkhar pakhat zong asi mi U Aryu nih a fanu atu bantuk tazacuai a ton le thil sining dikthlir zong hi a thei rih lo. Atu lio ah hi kong he pehtlai in American Marine Corps lei in zei cukha an chim mi cu aum rih lo. “A phunphun in kan pehtlai hna nain pehtlaih kho an si lo, phone zong an tlai lo, email zong leh an hmang lo. Cozah lei nih zeihmah an kan leh mi aum lo. Hi kong ah ṭuanvo lak, rian i khih nak an ngei lo timi a lang ngaite. Kan lung a ṭha lo, kan lung rethei. Hika rammi kan si tiah ramcung ah tlaihchannak he tiah kafa zong cu ralkap rian a lung ah aum. Keimah nih hi raklap rian ah ka luh ter mi asi.

Kum 6/7 ralkap chung aum i ka va i lawm ngai, rian he asi tiah ka hna zong ngam. Asi nain atu bantuk thil a cang tik ah ka ngeihchia. Kan rak zohcho mi thil sining pawl lingtalet in a hun cang. Cun kum upat lei cun thin lung a nuam lo, ka ngeihchia i ka lung kuai ngaite. Kafa nu te mah bantuk i tuah cu tiah…”tiin U Aryu nih cun a chim.

American ralkap chung ah nupa sinak kong he pehtlai in ningcang lo in tuah a tong mi nih phuan mi pawl hi 2018 kum he tahchun ah 2019 kum ah hin zatuak 3% a karh tiah US Department of Defense, Pentagon nih chuah mi 2019 kum report ah telh asi. American Marine Corps ah Nu ralkap zatuak 9% hrawng lawng an um tiah Department of Defense cazin pawl in theih asi.

Army, Navy, Marine Corps le Air Force pali lak ah 2019 kum chung nupa sinak ningcang lo in tuah mi kong phuannak zat ah Marine Corps hi pakhatnak changtu a tam bik an si tiah Department of Defense cazin ah langhternak tuah asi. American Marine Corps ah minung 1,000 ah 5.5 hi nupa sinnak ningcang lo in tuahser ton asi tah cu cazin in cun theih asi. Atam deuh cu ralkap chung a lut tu hi pa deuh an si. Cuca’h pa pawl an tamnak ralkap chung chimrel ning, chawnh biak ning, nawl zulh ding asi mi phung pawl cu nu ralkap pawl caah aa rem lo mi pawl zong an um khawh caah 2020 kum ah, cu pawl cu remh asi lai tiah cu report ah cun aa ṭial.
Ref: VOA

LEAVE A REPLY

Please enter your comment!
Please enter your name here