Camp Victoria ah July 7 in 15 tiang tuah mi Chin National Front, avoi 2nak Central Executive Committee meeting dih hnu ah CNF lei in cu thawng cu a hun thang.

CEC meeting kai mi lak ah CNF aiawh in mipi sin chimrelnak nawl ngeitu Salai Htet Ni nih “AA he pehtlai in cozah ralkap he kan i ceih cia mi zeihmanh aum lo. Abik cu ral tho lo ding asi. Ral a tho lonak ding caah cun AA nih Paletwa in a chuah a hau” tiah ati. Zarhkhat chung tuah mi cu CEC meeting ahcun atu lio remdaihnak kongkau, Paletwa le Rakhine ramkulh pawl um IDPs pawl bawmhnak pek ding, Paletwa ah a cang cuahmah mi kawl ralkap le AA karlak raldohnak pawl kongkau cu ceih asi.

Atu ral ruang ah a chuak mi harsatnak pawl cu Chin mipi he hmunkhat dir in rianṭuan ṭi ding kongkau le Paletwa peng chung ah AA nih raldohnak hmun ser lo ding le Chin vawlei ah hmunhma khur lo ding kongkau pawl ceih le bia khiahnak aum tiah theih asi. Salai Htet Ni nih “Cozah nih khoika hmun poh ah zalong tein hmunhma khurnak a kan pek, asi nain Paletwa ah kan ralkap pawl hmunhma khur ding an kan on lo. Kan ralkap pawl rak um hna seh law atu bantuk thil sining tiang a phan hnga lo tiah kan ruah. Atu cu thil a hun cang caah AA hmunhma khur kho lo ding tu a ṭha bik in lam kawl le tuah kan i tim” tiah a chim.

Chin ramkulh chung ah AA hmunhma khurnak he pehlai in July 3 ah CCN le Maj. General Tun Myat Naing biaruahnak ah khan cun “Rakhine ram le Chin ram cu ramri aa peh mi kan si i ral teinak caah hril awk ṭha lo in kan luhnak asi” tiah bia lehnak a tuah. Maj. General Tun Myat Naing nih cun “Kan ral doh ningcang ah Rakhine ramkulh pakhat lawng tuah kho asi lo, nunnak le thihnak rian asi. Kan duh zong ah duh lo zong ah thihnak nunnak kong ah cun luh a hau ko. Ral pakhat a tho tik ah teinak hmuh tiang doh ding caah hihi hrial kho asi lo. Chin le Rakhine ramkulh cu aa tlai mi an si caah amah ramri, kei mah ramri tiah ṭhen i chim len asi nain a tak ahcun ni fatin nunnak sining ṭhen awk a ṭha hlei lo. Cu caah atu bantuk in kan cawlcangnak asi” tiah a ti.

CNF Chairman Pu Zing Cung nih Chin ram chung ah AA nih raldohnak caah cawlcang lo ding in ralrin peknak le cucu zulh asi lo ah cun dohnak in chuah asi lai tiah January 26 ah a chim timi thawng he pehtlai in Salai Htet Ni nih “ Ral dohnak nak in maw asi lai, ramkhel biaruahnak in dah asi lai timi cu chimawk a ṭha rih lo. Kan ramkulh ah an umlo nak ding caah cun zeitin in dah kan tuah lai, ral dohnak zong in asi kho i ramkhel kong biaruahnak zong in asi kho. A phunphun in tuah kho asi ko” tiah ati.

2016 kum ah CNF le AA hruaitu pawl tonnak ah Chin ramkulh chung ral tho lo ding in CNF nih biaruahnak an rak ngei nain AA lei nih an rak cohlang lo. Cu asi caah atu ahcun AA he biaruahnak tuah chap asi lai lo tiah Salai Htet Ni nih a chim chap. Kaladan tiva ri kip ah kawl ralkap pawl hmunhma khurnak Paletwa peng, Miletwa khua pawng Strategic Area pawng ah kawl ralkap le AA cu ral an i dohnak asi.

Note: Irrawaddy cherhchan in leh chin mi asi.

LEAVE A REPLY

Please enter your comment!
Please enter your name here