Nu caah sam timi hi a biapimi thil pakhat asi. Nu tam deuh nih cun samsau i chiah hi an duh tawn. Vawlei cung ah samsaubik nu pawl an umnak khua cu Taluk ram, Huangluo Yao timi khua asi. Cu khua ah aum mi nu pawl an sam hi pe 3 in pe 6 tiang an si tiah theih asi. Cu caah “vawlei cun samsaubik khua” tiin Guinness World Record ah khumh an si. Hi khua phanh khonak ding caah Taluk ram thlanglei khua pakhat asi mi Guilin khua in nazi pahnih hrawng motor in kal asi.

Jinsha tiva kam um Huangluo Yao khua i khuaruahhar phung ruangah 2002 kum ah ramkip khualtlawng pawl an luhchuah khonak ding caah Taluk cozah nih a tawlrel piak hna. Cu khua ah aum miphun pawl hi Qin siangpahrang chan tein khuasa mi laihlum miphun pawl an si tiah theih asi. Milu 600 hrawng an um i chungkhar in cun 80 hrawng an si. Hi khua aum mi nu pohpoh cu samṭha mi lawng te an si i nu pakhat a sam hi 2lb leng hrawng asi. Yao nu pawl cu samsau chiah an sunsak i hi phung a tlau lonak ding caah chan khat hnu chan khat pehzulh tein an um.

Cu khuasa mi nih cun samsau i chiah mi nih hin ngandamnak caah a ṭhahnem tiah an zumh. Cuca’h khua ah aum mi chungkhar 60 hrawng hi cu samsau an i chiah. Tiva kam aum mi khua asi ca zongah tiva ti he nifa tein an sam an i ṭawl tawn, zarhkhat chung i nithumnak ni asilo le nilinak ni ah cun samsaunak caah a hlei in ser mi sii phun khat in an sam cu an ṭawl tawn tiah theih asi.

Thil pakhat aum rih mi cu, va a ngei rih lo mi nungak pawl nih a sam cu midang pawl nih hmuh lo ding in fimtawl asi. Nu pakhat i a sam a hmu hmasabik mi cu a va asi te ding mi lawng asi. Cu asi caah hi khua um ngaknu pawl nih an sam cu midang hmuh kho ding in blue scarf in an khuh tawn. Yao nu pawl caah samsau cu biapi mi hmelchunhnak pakhat asi. Yao nu pawl cu an chuahka ni 100 a tlin ni le kum 18 an tlin ni lawng ah an sam tan asi tawn.

Phung pakhat rawkral lo ding in an kilven kho caah Huangluo Yao khua cu “vawlei cung samsaubik khua” tiah vawlei mi nih theih mi khua pakhat ah a hun cang.

Ref:irrawaddy, topchinatravel,outlookindia

LEAVE A REPLY

Please enter your comment!
Please enter your name here