Vawlei pum hmunkip ah Covid-19 zawtnak a ngeimi 9,700,000 leng an si cang i US hi zawtnak atam bik aa chawn mi ram asi. Atu tiang ah US cun zawtnak a ngeimi 2 million leng an si cang i minung 120,000 leng an thi cang. US Health Department nih a hnu bik tuakchuah mi ning asi ah cun a taktak ah zawtnak a ngeimi hi hi 20 million tiang an si kho tiah theih asi. CDC lei in thawngthanh zoh tik zongah zawtnak a ngeimi hi a taktak cazin um mi nak in let hra hrawng an tam kho men tiah theih asi.

US ramkulh a cheu hrawng ahcun zawtnak a ngeimi an karh chap cuahmah lio. Kha hlan ah ramkulh 22 hrawng lawng ah zawtnak a ngeimi an rak karh nain atu ah cun ramkulh 27 tiang a hun phan. CDC lei zong nih zawtnak sining a lang lo mi zawtnak ngeitu tampi an um lai tiah ruah chih asi. Texas ramkulh zong ah zawtnak a ngeitu an karh thluahmah i chaklei le thlanglei ramkulh pawl zong ah nifa tein zawtnak ngeimi an karh peng. Washington University nih ruahchuah mi ahcun October thla tiang hi a thi mi an tam chin kho men i 180,000 tiang hrawng an phan men lai ti asi. US rammi zatuak 95% nih hmaihuhnak an hman tu ahcun a thimi hi 146,000 hrawng an si te kho men tiah an ti.

CDC Director Dr. Robert zong nih US ah zawtnak sining a lang mi pawl cu test tuah an si i zawtnak sining a lang lo mi pawl cu test tuah an si lo tiah ati. US milu zatuak 5% in 8% kar hi coronavirus zawtnak chawnh an si caah social distancing zulh phung pawl zulh, hmaihuhnak hman le kut thiang tein ṭawl ding forhfial lengmang asi tiah Dr. Robert nih cun a chim.

Texas ramkulh chung lockdown tuah asi ti lo hnu zawtnak aa chawnmi thong leng an si ṭhan. Aluan ciami cacawn nili ni ah Texas ah zawtnak aa chawn thar mi 5,996 an si i minung 47 a thi mi an si. California ramkulh zong ah mizaw thar 7,149 an si. Cacawn nithum nikhat chung ah US um zawtnak aa chawnmi 36,000 an si i April 24 lio a tam bik zawtnak aa chawn mi 36,426 he aa tlau theng lo khan asi.

Zawtnak an i chawnh ningcang a sang chinnak a ruang cu zumhawk asi mi ralrinnak tuah lo in le a caan a zat hlan ah ram sining pawl on ṭhannak ruang ah asi tiah sii lei thiamsang pawl nih an ti tiah theih asi.

Ref:BBC

LEAVE A REPLY

Please enter your comment!
Please enter your name here