Taluk (China) ram Beijing eidin zuarnak rili chuak sa le ram sa pawl zurnak hmun cu thurhnawm ngai asi bantuk in coronavirus zong cuka hmun in i chawnh ṭhan dawh asi tiah an lunghring. Hi dawrpi pawngkam sining cu a kik leng ah ti he aa ciah peng mi thil pawl an tam caah hi pawl nih coronavirus caah hmunhma ṭha ngai dawh asi tiah cozah lei nih cacawn nili ah khan an chim. 

Thawngthanhnak ah cun a luan cia mi zarh chung bantuk Covid-19 zawtnak a hun karh ṭhan mi cu ramchung eidin zuarnak dawrpi Xinfadi pehtlainak aum tiah zumh asi. Hi dawrpi um thilri pawl fimtawlnak le thilzuarnak hmun vialte fonh ah hin pumpalulh chuihnak hmun 160 tiat hrawng in a ngan mi asi. A hnu bik hmuh mi zawtnak a ngeitu hi minung 100 leng an si caah Taluk ah zawtnak a karh chin lai tiah thin phang ngai asi. 

Cu mizaw lak ah a tam deuh cu Xinfadi dawrpi ah rianṭuan mi, rili chuak sa zuar mi le tonghtham mi, cun cawsa le tusa zuar ti deuh an si tiah theih asi. Rili chuak sa zuartu pawl hi a dang pawl nak in an zawtnak sining a lang tuan deuh tiah Chinese Center for Disease Control and Prevention in chief epidemiologist asi mi Wu Zunyou nih cacawn nili ni ah a chim.

Pawngkam a kik mi nih hin virus a nun khawhnak ding a bawmh cun ti le khua dawm ruang zong ah asi kho men tiah ruah asi. Cu ruang ah rili chuak sa pawl zuarnak hmun hi zawtnak a karh kho ding hmun hma ṭha asi tiah zohfelnak tuah hmasa mi pawl zoh in chim kho asi tiah Wu nih cun ati, ralrinnak caah asi i a dang hlathlainak zong tiah chap asi rih lai an ti. 

Beijing ah a cang mi zawtnak a karh ṭhan mi he aa pehtlai sual lai tiah phan asi caah Europe lei nih Taluk sin zuar mi salmon ngasa pawl zong lak rih lo ding in tawlrel asi. Khoika in hi zawtnak aa thok ṭhan timi theih asi rih lo nain, salmon sa cannak thilri cung zong ah virus hmuh asi caah salmon sa cu a hring in ei rih lo ding tiah ngandamnak lei ṭuanvo ngeitu pawl nih ralrinnak an pek hna. 

Hi dawrpi chung thianhlimnak lei chambaunak le eidin pawl hrim ralrin an hau caah hi kong he pehtlai in a rannak in tawlrel zokzok a hau tiah nawl ngeitu Communist Party lei nih atu zarh chung ah an chim._Reuters

Topics: COVID-19,

LEAVE A REPLY

Please enter your comment!
Please enter your name here