Covid-19 zawtnak khamhnak sii dur serchuah asi te lai ding mi cu Europe ram pawl ah hman ding in British sii company, Astra Zeneca Plc le European cozah pawl karlak ah hnatlaknak an ngei. Atu bantuk hnatlaknak ah cun Oxford University nih ser chuah lio mi sii dur 400 million bawmh asi lai, zawtnak khamhnak sii tam deuh ser chuah le a miak lak lo in pek asi lai tiah company lei nih an chim. Zawtnak khamhnak sii cu a  ṭha maw ṭha lo tiah zohfelnak tuah lio lawng asi rih. Hi sii cu hman ding caah a him ko ti le coronavirus a khamh kho cang timi thawng fiang hnu ah sii dur pawl cu 2020 kum dongh lei hrawng ah phawtzamh kho asi te lai tiah ruahchan asi. 

Atu bantuk hnatlaknak cu Europe’s Inclusive Vaccines Alliance (IVA) he minṭhut mi asi. IVA cu France, Germany, Italy le Netherlands ram pawl komh in ser mi bu asi i a him mi zawtnak khamhnak sii dur pawl hmuh kho zokzok ding tawlrel tu an si. “Hi nih hin minung thong leng kan mipi pawl sin ah zawtnak khamhnak sii a phan kho lai tiah fehternak asi. Hi sii rian a ṭuan ah cun a ra lai mi ṭhal ah hin a theipar hmuh kho asi lai” tiah company lei in chief executive, Pascal Soriot nih cun a chim. Tuan deuh thil sining konglam chirhchen in hi sii cu rian a ṭuan kho ko lai timi ruahchannak ṭha ka ngei tiah ati. 

“IVA nih European Commission le a dang Europe ram pawl he hmunkhat ah rian a ṭuan ṭi lai caah Europe hmun kip um mi poh nih hi sii cu an hman kho dih cio ko lai” tiah a chim chap. “Kan sin ah Europe pek ding mi sii tlamtling tein kan ngei kho ko” i Netherlands, Germany, Italy le a dang ram pawl tiah sii phawtzamh mi thil sining cu a chim. Hi sii cu EU chungtel ram vialte caah asi lai. Ram li nih a tu sii maan a dih hnga ding mi vialte pek ding in an hnatla, sihmanhsehlaw zeizat dah a dih timi cu chim asi lo. Hi kongkau ah ram dangdang pawl zong tel ding in lam on asi tiah Italy Health Ministry lei in theih asi. 

China, Brazil, Japan le Russia zong nih hi thil he pehtlai in an hnabeisei ngai tiah company lei nih cun an chim. Hi sii he pehtlai in tuan deuh thil sining a phichuak zoh dih hnu ah avoi thumnak hman chun ding in The British Medicines and Healthcare products Regulatory Agency (MHRA) nih nawl pek asi cang tiah Soriot nih cun a chim. Cacawn ninga ni, EU Health Minister he biaruahnak an ngeih mi ah IVA nih hi kongkau he pehtlai in EU Commission he ṭuanrel ṭi ding in hnatlaknak aum tiah Germany’s Helath Ministry lei nih an ti. 

Hi sii dur pawl cu Astra Zeneca sin ah a hlankan deuh in aa cawk cia mi cozah pawl sin ah pek hmasa asi lai. Bill Gates-backed ventures le US cozah he 1.2 billion hnathlaknak tel in vawlei pum hup in zawtnak khamhnak sii dur 2 billion cu serchuah kho ding in timhtuah asi. Sii dur 100 million cu serchuah asi te lai i atu ah sii dur 2 billion cu hnatlaknak ngeih cia asi cang tiah Astra Zeneca lei nih cun an chim. 

Atu tiang ah, novel coronavirus ruang ah asi mi thawchuahnak lei zawtnak Covid-19 khamhnak sii le a damnak ding sii tiin zeihmanh hmuh le hmanding nawl pek mi aum rih lo. “Vawlei cung ram tampi nih zawtnak khamhnak sii kongkau ah hnangam an si nain Europe cu a ngei rih lo. Rianrang in chungtel ram pawl nih harsat lio caan ah EU rammi pawl caah tawlrel le bawmhchanh kho ding in kan ṭuan aherh” tiah Italian Health Minister Roberto Speranza nih cun ati. _Reuters

LEAVE A REPLY

Please enter your comment!
Please enter your name here