“Cu hmun ah ka rak um ding asi lo” tiah General Mark A. Milley, Chairman of the Joint Chiefs of Staff nih National Defense University onnak biachimnak ah a chim chih. “Kha lio caan, pawngkam sining ah keimah ka um mi ruang ah Ralkap nih ramchung ramkhel kong ah aa thlak timi ruah le hmuhnak a chuah ter” tiah ati. Hruaitu lutlai pawl cu zeilei kap poh in zoh le hlathlai cu ton asi ko lai. Kei zong cu sining in ka luat hlei lo. Nan zapi nih rak hmuh ning khan asi ko, a luan cia zar Lafayette Square i ka hmanthlak ruang ah mipi lei nih ralkap sining ning he pehtlai in buaibai le biaelnak a chuah ter” tiah ati. 

Cu hmanthlak thlak lio ah aa tel ning cang he pehtlai in “Ralbawi pakhat nih tuah sual mi thil le hmailei ralrin ding thil asi. Atu thil sining in ralrin khonak kan ngei cio lai tiah lungthiang tein ka ruahchan” tiah ati. June 1 ah khan Lafayette dum ah duhlonak langhtertu pawl cu cozah nawl ngeitu pawl nih rumro in an ṭhawl dih hnu ah President Trump cu St. John biakinn ah hmanthlak ding in Lafayette dum lei in a kal. President he cun Defense Minister Mark Esper, General Milley le a dang cozah hruaitu pawl tamngai cu hmunkhat ah an um. 

Ralkap thuam he Milley an hmuh ve mi kongkau ah ralkap lei hruaitu lutlai pawl telh in mi tampi nih Milley le Esper cu an soisel ngai hna. Cu thil hlan ah Esper nih American khua pawl cu raldohnak hmun bantuk in a cuang ter cia cang. Sihmanhsehlaw Trump nih ralkap pawl hman in dai tein duhlonak langhtertu pawl khenkham ding kong ah Esper zong nih a dirpi ve lo. Trump nih nawl ngeihnak a ngei lo mi Minister of Defense cu a rian in phuah ding a timh cang ti asi. 

Cuve bantuk in White House cozah nih ruah cia lo mi biachimnak pakhat asi mi ah Esper nih atu bantuk hmanthlak asi ding hi ruah cia asi lo tiah cacawn nithum ni, Pentagon ah khan a chim. “Asi khawh cung in ramkhel kongkau he pehtonh lo ding ka zuam. Ramkhel kongkau ah i thlak lo ka zuam. A caan caan ah hlawh a tling nain a tling lo caan zong aum. Asinain ka tinh mi cu Ministry of Defense le ramkhel pehtlai ter lo hi asi. Atu bantuk si khawh ding in kan hruaitu pawl bang ka zuam rih ko lai” tiah ati.

Cu kong he pehtlai in kha hmun ah um ding rak ruah asi lo, hi thil a cang te lai timi zong theih asi lo tiah mah luatnak ding Minister of Defense nih a chim lio ah Milley nih atu bantuk zapi theih in a hun chim ve mi asi tiah theih asi. _Irrawaddy.

LEAVE A REPLY

Please enter your comment!
Please enter your name here