Telephone chung in thawpi chuah thawng a hun thang. Phone chawnh lio ah “chikhat tein” tiah second 30 hrawng awthawng a um lo hnu ah bia a chim pah a ṭap pah mi cu Sarabang khua um Ma War War Naing ti asi. Rian kawl a harnak Ayeyarwaddy region Danuphyu khua in Malaysia ah rian a rak ṭuannak hi kum 10 leng hrawng asi cang. Malaysia ah tlik le lek buin sining kip ton a rak si ko nain a chan chung ah atu caan tluk in thazaang der le lung retheih ton asi bal lo tiah ati. 

Malaysia um nawlngeilo um Myanmar rianṭuan tu pawl nih a mah bantuk harnak cu ton cio asi. Covid-19 ruang ah chawkhelnak pawl an ṭuan ti lo caah Malaysia rian ngeitu pawl cu an mah ram mi pawl deuh lawng rian pek ding tiah forhfial an si. Cu ruang ah Ma War War Naing tel in Malaysia phan nawlngeilo rianṭuan tu pawl rian ngei lo an si leng ah an umnak ding inn maan hmanh pek kho asi ti lo caah ṭhawl le chuah an i huah i umnak ngei lo, ei ding ngei lo dirhmun an phan. Nau pawi pawl zong nau ngeihnak maan ngei lo dir hmun an si. 

Sihmanhsehlaw Myanmar nih atu bantuk rammi pawl caah zeitin bawmh chanhnak a tuah lai timi theih asi rih lo caah Myanmar rammi thong leng cu Malaysia ram ah ruahchannak ngei lo in an um hna. “Umnak ding inn a um lo. Rian a um lo, rian a um lo tik ah inn maan pek ding a um lo, cu tik ah inn ngei pawl nih ṭhawl asi” tiah Ko Nyi Nyi Zaw nih cun a chim. Nyi Nyi Zaw cu Malaysia ah signboard pawl Wiring rianṭuan tu asi. Covid-19 zawtnak caan kar ah hin rian a ngeih lo nak thla 3 hrawng asi cang tiah ati. Hlei taang, Phungki sianginn le rianhmun pawl hmai um inn …tbk cu Myanmar rianṭuan pawl caah zaan caan dinhnak asi i chun caan ah cun hmunkip ah vakvai cio asi tiah ati. 

Malaysai ram ah nawlngei in rianṭuan tu 300,000 hrawng le nawlngei lo in rianṭuan tu pawl hi 250,000 in 300,000 karlak an um lai tiah cozah nih a ruah. An zapi tein rian ngei lo dirhmun an ton dih cio mi asi caah pakhat sining pakhat nih ngeihchiatpi dah ti lo cun zeihlei bawmh kho mi zong um asi cio lo. Covid-19 zawtnak ruang ah Malaysia ram innsaknak rian pawl ah a ṭuan mi Myanmar migrant workers 19 cu Malaysia rammi rian ngeitu nih a bengh hna leng ah Myanmar Embassy ah a rak chiahtak hna mi zong June thla thok ah khan a hun cang. 

Atu bantuk sining ruang ah rian ngeitu le agent cu Malaysia ram phung ning in biaceih an si lai tiah Myanmar Embassy in ṭuanvo ngeitu U Aung Zaw Min nih a chim. Asi nain zeitluk tiang in dah an tuah kho te lai timi theih asi rih lo. Nawlngei lo rianṭuan tu pawl kongkau he pehtlai in Myanmar cozah lei zong nih bawmh chanhnak le timhtuah cu chim lo ruahchannak thawngpang te hmanh a leng rih lo. U Aung Zaw Min nih cun “atu lio kan theih ning ah cun kir ṭhan kho ding in timhtuahnak cu aum rih lo” tiah ati. 

Hi lio caan ah hin Nepal ram nih cun a ram mi pawl sing leng cu kir ṭhan kho ding in timhtuah lio asi. Nepal news pakhat asi mi the Kthmandu Post nih cun Nepal rianṭuan 25,000 cu a ṭhip katnak lak an si cang lai tiah ati. Nikhat ah 2,500 in 3,000 kar lak an si lai tiah theih asi. “A dang cozah pawl nih atu bantuk overstay asi mi auh ṭhan ding cu cozah le cozah kar an i ceih mi aum. Myanmar cozah zong nih phung ning tein ceihmainak ngeih le tlun a duh taktak mi pawl caah cun nawlngei rianṭuan tu an va si pek an va si lo pek ah tlun khonak tawlrel piak ding asi tiah nawl kan duh hna” tiin Foundation of Education and Development (FED) in Executive Director U Htoo Chit nih ati. 

Thailand hram bunh FED cu Thailand ah Myanmar rianṭuan tu pawl kongkau ah kum caan saupi bawm chantu an si. Atu zong ah Malaysia ram um Myanmar rianṭuan tu pawl caah an si khawhtawk in tawlrel cuahmah mi an si. Atu kongkau he pehtlai in bawmh nak ding caah Myanmar State Counsellor, Magwe Region cozah le Hluttaw, Amyothar Hluttaw cu bawmh hal nak ca kuat asi cang tiah U Htoo Chit nih a chim. Malaysia le Thailand ram pawl um nawlngei rianṭuan tu pawl sihnaseh, nawlngei lo rianṭuan tu pawl sihnaseh an zapi tein cun ram ṭhangcho lo ruang le rian har ruang ah chungkhar pawcawmnak caah tiin mi khua le mi ram ah kal in rian an ṭuan nak asi. 

Nawlngei lo rianṭuan tu pawl tiah an si ko nain an nu le pa, rualchan cingla sin an kuat mi tangka pawl nih hin Myanmar ram GDP sining ah a hun lut ṭhan. Minung pakhat cio nih kum khat ah sing 10 lawng an kuat kho hna hmanh ah hi rianṭuan tu 300,000 nih kum fatin kuat mi tangka Kyats 300 billions hrawng cu ram chung ah alut ṭhan peng mi khi asi. Hi tangka pawl in hmuh mi ngunkhuai, tangka lutchuak nih hin ram caah zeitluk in dah a ṭha hnem timi cu economics kong tlawmpal theih mi hmanh nih tuak kho khi asi. 

Thailand ram phan rianṭuan tu pawl he pehtlai in cun State Counsellor nih “nawlngei in kal siseh, nawlngei lo in kal siseh kan ram mi an si poh ah cun cohlan a hau. Hi kong ah dantatnak tuah le sualphawtnak …tbk cu tuah asi lai lo. Biapi mi cu rak tlun tik ah ralṭha tin ṭuanvo ngeitu pawl thawngthanh kha asi” tiah ati. Hi bia hi Malaysia phan mi caah tah asi maw si lo timi cu aho hmanh nih chim kho asi rih lo. Malaysia um Myanmar Embassy zong cu khar asi rih i thil sining pawl chim le phuan mi zong cu zei an rel setset maw timi cu theih asi lo tiah rianṭuan tu pawl nih an chim. 

“Email in kuat tik ah email kan hmuh timi ca zong leh kan tong lo. Telephone in kan chawnh hna tik ah le chawnh kho an si lo. Embassy he naihniam mi pawl kan hal hna tik ah tlaih mi kha cohlang ko uh. An in tlaih hna ah cun thla 2 hrawng thawng ah um asi lai i mah dih cun tlun kho asi lai” ti zong in an chim tiah Malaysia, Tangkak phan Ko Aung Myint Myat nih a chim. Embassy in U Aung Zaw Min tu nih cun telephone ara mi poh cu kan leh ko hna tiah ati. “Kan sin a lut mi telephone poh poh cu kan leh ko hna. Minung pahnih lawng kan si tik ah missed call asi sual mi, a dang phone he i chawnh lio …tbk asi zong ah kan auh ṭhan colh ko hna. Kan mah lei nih leh lo mi pakhat hmanh an um lo. Thil pakhat aum mi cu Embassy hi atu lio khar asi ruang ah hotline in kan tuah piak kho hna lo caah pehtlaih a harnak zong aum” tiah ati. Amah zong nih cozah lei in hi kong hi biapi chiah in tawlrel pi a hau cang tiah a chim ve. “Atu bantuk thil asi mi cu zeimawzat biapi chiah in ṭha deuh in tawlrel pi an hau tiah kan hmuh ve ko” tiah U Aung Zaw Min nih cun ati. 

State Counsellor Daw Aung San Suu Kyi nih cun “harsatnak aum ah cun Embassy pawl pehtlai asi. Zeitin dah bawmh kho asi lai, tlun an duh. Cucu zeitin kan tuah piak kho hna lai, zumh ngamhnak he pehtlai mi asi fawn. Kei zong Foreign Affairs Minister ka si caah thluachuah tiah ka ruah ko. Cucu Embassy lei an men lo caah asi” tiah Covid-19 zawtnak caan sining he pehtlai in Thailand, South Korea, China ram pawl um Ambassador pawl he biaruahnak ah a hun lawmh len hna. Embassy pawl rian an ṭuan siseh an ṭuan lo ah siseh Malaysia phan Myanmar ram mi caah cun an mah hi ngeihchun ruahchannak pakhat te an si i bochan hlei ding an um lo. Nawlngei lo rianṭuan tu pawl Malaysia an rak rat lio ah tanglei lam tiah timi a thli tein tilawng in a rak ra mi an um bantuk in vanlawng he rak zuang in Malaysia phanh hnu ah Visa renew tuah ti lo, rian ngeitu nih passport fimpiak le broker pawl nih hlen …tbk a ruang tampi he nawlngei lo in aum mi dirhmun phanh asi.

Thailand ram phan nawlngei lo rianṭuan tu pawl he an i dannak cu tlun kal a fawi lo mi asi. Atu hrim cun airline pawl lawng si lo in a thli tein tanglei tlun kalnak vialte zong phih dih an si caah fawi tein luhchuah kho an si lo tik ah bawmtu ngei lo dirhmun ah an phanhnak hi asi. “Thai cu tlun duh zong ah ke hmanh in tlun kho asi. Malaysia ram phan mi caah cun aa dang. Tlun duh hmanh ah lam aum lo” tiah U Htoo Chit nih cun ati. Ti lam lut chuak zong biatak tein zohfel an si caah tlung kho lo in ei ding ngei lo, umnak ngei lo dirhmun bak ton asi tiah U Htoo Chit nih ati. Malaysia ram chung nawlngei lo in a lut tu pawl Myanmar ram mi pawl hi Thailand thlanglei in ramri lonh in a lut mi an si. Malaysia zong nih nawlngei lo a rak lut mi Myanmar ram mi an tlaih hna ah cun Thailand thlanglei ah an kuat tawn hna. 

Sihmanhsehlaw tu kum April thla chung ah tlaih mi lak ah Covid-19 zawtnak an ngei maw ngei lo test an si tik ah zawtnak a ngei mi 53 lak ah Myanmar ram mi 34 an i tel. Cu ruang ah ramri in a lut mi pawl cu Thailand lei nih an khamh caah cu lam zong cu zulh kho asi hoi lo. Atu bantuk harsatnak ton asi nain cozah nih hi kong he pehtlai in zei pipa tuah dawh asi rih lo. Ministry of Foreign Affairs nih chuah mi pehtlaihnak vial te chawnh an si nain Counsular and Legal Affairs Department chawnh ding timi lawng an chim. Cu department cu nawlngei lo rianṭuan tu pawl kongkau he pehtlai in Malaysia ram he pehtlai le tawlrelnak aum maw um lo timi hal asi tik ah “kan tuah lio ko” tiah a min zong chim lo mi nu pakhat nih ati. Thawng fiang le tling in cun Embassy lei in thanh asi zungzal ko tiah ati. 

Myanmar Embassy (Malaysia) nih thawngthanh mi ning in cun May 8 ah voikhat, May 20 ah voikhat tiin Malaysia ram phan Myanmar ram mi 160 cu an lak ṭhan kho hna tiah theih asi. May 8 avoi khatnak thawngthanh mi ning in cun Passport chuah ni caan zong telh chih asi caah tlun ter mi minung 100 lak ah hin overstay deuh pawl an i tel tiah ruah asi nain May 18 chuah mi thawngthanhnak ah cun Passport chuah ni caan aa tel lo. Cu caah hihi nawlngei rianṭuan tu pawl maw an si nawlngei lo rianṭuan tu pawl dah an si, Embassy he naihniam deuh mi pawl tiin maw lak an si tiin rianṭuan tu pawl an lung hring. May 11 ah khan Malaysia ram tawlrel piak nak thawng in Myanmar ram mi 391 cu Myanmar tlung kho ding in a hlei in tuaktan piak an si. Cucu Malaysia ram cozah nih tlaih mi ramdang rianṭuan tu pawl an ram in an chuah mi tawlrelnak khi asi. 

Atu bantuk Malaysia cozah nih tlaih mi umnak hmun phnah ah cun ram in chuah asi zong ah tlun khawh asi lai timi cu rianṭuan tu pawl nih ruah asi ko nain a harnak le ṭihnung mi thil pahnih an um ve hoi. Pakhat cu atu bantuk nawlngei lo rianṭuan tu pawl tlaih mi umnak Camp ah Covid-19 zawtnak a karh thluahmah hna mi le tlaih an ton tik ah an pek ding mi tangka an ngei bak lo mi asi. Ko Aung Myint Myat nih “tlaih kan ton zong ah vanlawng maan, kum ning in pek a hau mi tangka …tbk pawl an um. Cu zong pek ding aum lo caah Camp ah um thai a fawi te” tiah ati. Sihmanhsehlaw atu ning tein asi peng ah cun abu in tlaih ton law law leng ah thim ding lam aum hlei lo tiah ati. 

Nawlngei tein rian a rak ṭuanmi ca tu ah cun cankarlak harsatnak lawng asi kho men. Lockdown pawl tuah asi ti lo caah cozah nih an bawmh hrim hna a hau. U Aung Zaw Min zong nih nawlngei tein rianṭuan tu pawl cu dirkamh an si lai tiah ati. “Nawlngei tein rianṭuan a rak ra mi pawl nih cun kan pehtlai ko uh, a poi nak aum lo. Caan sining he aa tlak in kan in bawmh hna lai. Phung ning zong in a herh mi bawmhnak zeitik caan poh ah kan in tawlrel pi hna lai” tiah ati. Nawlngei lo rianṭuan tu pawl caah cun hihnu hmailei a har chin rih lai caah tuar rih a hau ko tiah ati. 

Myanmar ram bantuk Malaysia zong ah lockdown pawl tuah asi ti lo nain chawkhel sining zong cu chun zaan in a ṭhangcho colh rih ding cu asi hlei lai lo caah atu nawlngei lo rianṭuan tu pawl ca zong ah rian hmuh colh timi cu a fawi rih lai lo. Zei tiang dah tuar asi rih lai timi zong theih asi lo. Myanmar ram kir ding cu zeitik caan poh ah timhcia an si fawn. “Ruahchannak aum ti lo asi le tlaih ka tong te lai. Duhlonak ka langhter lai. Tang lei lam in ka pah chih lai. Aa rem lai timi lam poh tuah a hau” tiah rianṭuan pakhat nih cun a chim. Atu lio an tuah kho mi tu cu lungrethieh bu in hngah hi asi. Nawlngei le nawlngei lo rianṭuan aho poh si hna seh Myanmar rammi an si. State Counsellor nih cun “ram dang nih kan ram mi pawl biapi an chiahnak ding caah kan mah nih biapi kan chiah hnawh hmasa a herh. Kan ram mi pawl kan mah nih biapi kan chiah hna lo ah cun an umnak ram pawl zong nih zei an rel hna lai lo” tiah ati. 

Malaysia um Myanmar ram mi pawl caah cun an mah hi Myanmar cozah nih biapi ah a chiah hna maw chiah lo dah! An um mi hi tah cozah nih zei a rel maw timi kong ah an lung hring lulh ko. Sihmanhsehlaw Ma War War Naing tel in Malaysia phan nawlngei lo rianṭuan tu pawl nih cun cozah nih zeitik caan ah dah bawmhchanhnak a tuah te lai timi cu ruachannak nganpi he an hngah lio asi. Ma War War Naing nih “an kan lak ṭhan hnga ma timi kan i ruahchan rih ko” tiah a chim ah cun ther le phang tein a chim cuahmah rih ko.

Theihternak:-)))- The Irrawaddy chung um ning tein leh chin mi asi.

LEAVE A REPLY

Please enter your comment!
Please enter your name here