George Floyd thihnak a ruang ṭuanvo ngeitu bik Derek Chauvin cu mithat lainawng timi sining in tazacuai asi bantuk in June 3 ah khan a taang mi palek pathum zong cu tazacuai chih an si ve. A dot hnihnak mithat lainawng ding in ṭanpitu timi sining in tazacuai an si i June 4 ah avoikhatnak biaceihzung ah chuah pi an si lai. 

Derek Chauvin zong cu mithat lainawng a dot thumnak in a dot hnihnak thlen in tazacuai asi lai. Social media ah a lang mi muicawl pawl zoh ah cun May 25 ni ah khan Chauvin nih George Floyd a hnawng cu miutes 8 rau tiang a kup in a nenh chih i a dang rianṭuan hawi pahnih nih cucu an bawmh ve i a dang pakhat nih cun a dir i a zoh sawh ko.

Chauvin nih tuahser mi kong he pehtlai in Minnesota ramkulh phung ning in cun timh ciammam tein mithah le ruah lo in mithah sual timi phun hnih aa ṭhen kho. Hi a tuah sernak a fiang taktak ko ti asi ah cun kum 25 le cheu hrawng thawng ah um ding cu asilole kum 12 le cheu hrawng sual maan pek asi te men lai. Hi biaceihnak he pehtlai cun Chauvin lei in Lawyer Eric Nelson nih ṭuanvo lak piak ding asi lai i palek lei biachimtu pawl nih cu biaceihnak ni he pehtlai in zei hlei an chim mi aum lo. Hi kong he pehtlai in tawlrel tu ding Minnesota Attorney General Ellison nih cun “tazacuai asi mi a dot hnihnak mithat lainawngnak sining he pehtlai in a herh mi thilsining langhternak pawl a tling cang ko tiin ka zumh” tiah ati. 

A dang palek pawl zong tazacuai an si chih mi kong he pehtlai in Ellison nih “Mr. Floyd le a chungkhar, kan minung sining le ramkulh caah phung ning tlukrualnak pakhat cu hmuh asi lai tiin zumh asi” tiah a chim. Governor Tim Walz zong nih dothlatnak he pehtlai in “kan mipi nih hmuh an duh mi sining a hun phan cang. Phung ning tlukrualnak aum rih ko timi langhter caan asi” tiah ati. Mayor Jacob Frey zong nih “tazacuai chap mi kongkau he pehtlai in ka lung tling ngai” tiah ati. 

Floyd a thihnak ruang ah palek zung lei nih tuahtawn mi sining le miphun thleidannak kong kau pawl ruang ah ramphum huap in duhlonak langhternak tuah le buaibainak pawl a chuak. New York, LA le Washington DC …tbk khuapi tiang cu buaibainak cu a rak phan, dai tein duhlonak langhtertu an um ve bang in buaibai le thil hrawh mi tuahsernak zong an um len. 

Minneapolis le St. Paul khua um inn le lo za leng cu mei khangh le hrawh an tong. Vanpang pawl zong ah Graffiti zuk an thai. Minnesota ah um mi Human Rights zung zong nih Floyd thihnak kong he pehtlai in rammi pawl covo kong he pehtlai in Minneapolis palek zung cu dothlatnak tuah an thok cang tiah theih asi.

LEAVE A REPLY

Please enter your comment!
Please enter your name here