Covid-19 zawtnak a thiang dih rih lo zong ah Ministry of Health and Sports telh in Ministries pariat he zulhphung pawl chuah in rianṭuan asi lai tiah Union Election Commission (UEC) nih thawng a thanh. General Election cu timh cia bantuk in November thla chung ah tuah asi lai tiah UEC chungtel asi mi U Myint Naing nih June 4 ah tuah mi thawnglatu pawl he tonnak ah a chim. 

“Kha hlan kan rak tuah caan November thla chung ah asi lai. Aa thleng mi zeihmanh aum rih lo” tiah U Myint Naing nih ati. Atu lio thil sining ah Covid-19 zawtnak zong ningcang tein kan kilven kho leng ah thimnak tuah ding nithla zong aa duh rih ko caah thil sining zohchun bu in November thal chung tuah kho asi ko lai, aa theng mi aum rih lo tiah ati. Sihmanhsehlaw zeitik nil e caan ah dah tuah asi lai timi cu fiang in chim kho asi rih lo, ramkhel bu pawl mipi an suatkhomh kho nak caan le zapi caah caan rem asi ding zoh chun in thimnak tuah ding ni le caan cu thanh asi te lai tiah U Myint Naing nih cun a chim.

“Zeitik hrawng dah aa rem lai, zapi caah khua caan ṭha asi ding mi ni thim dih hnu ah thanh asi te lai. Ramkhel bu pawl nih mipi an khomhsuat kho ding caan asi biapi. Zapi caah aa rem bik caan kan thanh te lai”tiah ati. Tutan thimnak tuah caan cu covid-19 zawtnak aum caan he aa ton asi ah cun mipi suatkhomh le biaruah caan …tbk he pehtlai in “Zulhphung thar pawl zong aum chap kho men. Cucu hawi ramdang pawl zeitin dah thimnak an tuah timi zoh chun in an tuah cio mi kha zulh ve asi te ko lai.” tiah U Myint Naing nih cun ati. 

Covid-19 zawtnak sining zoh chih in Ministry of Health and Sports (MHS) tel in ministries pariat he hmunkhat rianṭuan ding in tawlrel lio asi tiah theih asi. “Zeibantuk in dah mipi sin pehtlai asi lai. Covid-19 zawtnak aum lio caan asi tik ah tluang tein thil a kal khawhnak ding caah tiah khahlan kum pawl he aa dang in bu pakhat kan ser lai. MHS tel in a dang ministries pawl he tiin tawlrel asi lai. Zeibantuk sining ah  zeibantuk zulhphung dah zulh asi lai …tbk, abik in MHS cu an um a herh. An mah he pehtlai dih hnu ah an mah nih nawl chuah mi zulhphung pawl cu ramkhel bu pawl zapi sin ah thanh in ṭuan asi lai” tiah U Myint Naing nih cun a chim. 

General Election tuah ding mi caan he pehtlai in khahlan 2010 kum ah khan thimnak tuah lai thla 2 le ni 24 aa duh ah thanh asi, 2015 kum ah khan thla 4 a hlankan in thanh a rak si. “Khoika hmun pawl ah dah thimnak tuah asi lai, Pyithu Hluttaw thim hmun, Amyothar Hluttaw thim hmun, ramkulh thim hmun le tlangcung miphun thim hmun pawl thanh hmasa dih hnu ah General Election cu zeitik ah tuah asi lai ti mi kan thanh” tiah U Myint Naing nih a chim. 

National League for Democracy (NLD), Central Communication Committee chungṭuan asi mi Monywa Aung Shin nih cun “Kan nih cu UEC nawl kan zulh lai cun rampum huap in kan i zuam khawhnak hmun poh kan i zuam dih lai. UEC nawl asi ko, an mah nawl zulh in ṭuan dih kan hau tiah ka ruah” tiah a chim.

Source: 7Day News, Photo: irrawaddy

LEAVE A REPLY

Please enter your comment!
Please enter your name here