Congo ah Ebola zawtnak thar a chuak ṭhan tiah UNICEF nih a ti. Ebola zawtnak an i chawnh ṭhan ruang ah kum 15 mino nute telh chih in minung 5 an thi, zawtnak a ngei mi minung 9 an um tiah UNICEF nih June 1 ah a thanh. A zualhma ngai mi mizaw pakhat le a dang mizaw pathum cu Wangata siizung, Mbandaka khua ah congh hramh lio an si tiin UNICEF nih thawngzamhnak a tuah. 

A luan cia mi May 18-19 ah khan minung a thi mi cu an um nain Ebola zawtnak ruang ah asi timi cu nizaan lawng ah fianternak tuah asi tiah UNICEF lei nih an ti. Hi hlan ah Mbandaka  khua ah Ebola zawtnak ngei mi paruk an um tiah WHO lutlai Dr. Tedros Adhanom Ghebreyesus nih twitter ah a tar bal cang. 

Congo ram nichuah lei ah Ebola zawtnak an i chawnhnak hi 2018 kum khan aa rak i thok, nihin ni tiang zawtnak a karh chin lo ding in an i zuam cuahmah lio asi rih. Cu lio ah cun minung 2,243 cu an thi i 3,406 cu zawtnak an ngei tiah WHO nih thawng a rak thanh. Coronavirus zawtnak le vawlei ram kip nawn a rak si mi  Measles zawtnak tamdeuh a hun i chawn mi khamh le hramh kho lio caan ah caan sau asi mi i a buaithlak ngai mi Ebola zawtnak aa chap mi nih hin a donghnak bik sining a phan tiah WHO thawngzamhnak ah cun thanh chih asi. 

Ebola virus hi palaak (bat) hmang in i chawnh asi, hi thil hi Congo ram caah zawtnak aa karh ning a thar asi kho tiah ruah chan asi tiah WHO lei nih an chim. 2014 in 2016 kar Africa nitlak lei ram pawl asi mi Liberia, Sierra Leone le Guinea ah Ebola virus an rak i chawn hna ruang ah minung 28,000 leng zawtnak an rak ngei i minung 11,000 leng an rak thi.

Source: CNN

LEAVE A REPLY

Please enter your comment!
Please enter your name here