Palek rianṭuantu pawl cung an thinhungnak langhter ding in minung le minung thleidannak kan pom lo timi langhternak a hun i nolh ṭhannak khenkham awk ah US khua ngan deuh pawl ah zaanlei chuah lo ding (curfew) nawl chuah asi buin May 31 ni zaanlei sang cun White House a leng lei in duhlonak langhternak a tuah tu pawl cu palek lei nih mithil tlaknak bomb pawl in an cheih hna. Zaan 6 rau in hibantuk buaibainak tha pe tu vialte cu President Trump nih ningcang lo in thil tuah tu pawl an si tiah ati hna bantuk in duhlonak langhtermi hna le palek pawl karlak zong ah buaibainak le i hnorsualnak a karh chap thluahmah. 

Mei khangh le midang thil chuh le hrawh …tbk pawl a tuah tu mipi cu ṭhencheu kho an i zuam hna lio caan ah mithli tlaknak bomb pawl, pepper spray le meikhu bomb pawl hmang in White House pawng dum hmete pakhat pawng ah cun buaibainak cu a hun cang thluahmah ve. “White House leng um raldohnak hmun pakhat bantuk asi” timi ca le meikhu lak le mei lak ah thil sining a lang mi video pakhat cu Democrat Party in Strategic and Counselor Adam Parkhomenko nih Twitter ah a tar. 

Duhlonak langhtertu pawl nih lam sining zulh ding tar mi pawl le plastics pawl cu hmun khat ah khomh in lam laifang ah mei an khangh. Micheukhat nih an pawng kam hmun um US thantaar cu lak in mei chung ah an peih chih. Adang nih an pawng um thing ṭeng pawl lak in mei chung ah an peih chih. Cuka hmun pawng um tikholhnak hmun le zung pakhat zong cu meialh ni a kulh dih. Cu lio caan ah cun meithat tu pawl cu White House kapkhat lei um St John’s Episcopal ah a kaang cuahmah mi mei an hmih lio caan asi. 

Governor Muriel Bower nih nawl chuah mi zaan 11 hnu leng chuah lo ding timi nih atu buaibainak cu a khamh kho hlei lo tiah Politico thawng laknak nih ati. Palek pakhat nih hruhru hranghrang in an tlaihmi ruang ah minak pakhat a thi mi kongkau he pehtlai in mipi an thinhunnak pawl hi ningcang deuh le thil sining tein kal ding caah American hruaitu pawl nih an ram mi pawl cu nawl asi. Zaan lengchuah lo ding nawl cu Los Angeles, Hoston le buaibainak hrampi asi mi Minneapolis …tbk ah cun chuah asi. Atlawm bik kha 40 hrawng ah zaan lengchuah lo ding nawl chuah asi. Mipi kongkau ah a cawlcangmi Martin Luther King leirawi aa hauh kum 1986 hnu ah atu bantuk hruaitu pawl nih mipi buaibainak ruang ah zaan lengchuah lo ding nawl an chuah mi hi avoi khatnak asi tiah New York Times thawngzamhnak nih cun ati.

A hlei in zohfel a tong mi buaibainak cu St Paul kha ah asi i highway lam cung ah duhlonak an langhter hlan ah minung thawng leng cu Parliament inn leng ah tonnak an ngei. “Kan sin ah minak fa, minak u, minak hawikom an um. An mah thih cu kan duh lo. Hibantuk sining hi kan lung dong. Atu chan ah cun cubantuk thil aum bal lo, namnehnak nih a kan simh cang” tiah cu duhlonak langhternak ah aa tel ve mi kum 31, minak nu, Muna Abdi nih a chim. “Amah a nun kho rih nak ding tuah ka duh” tiah a fapa kum 3 minung te cu sawh in a chim.

Duhlonak langhtertu pawl hna hmai ah cun palek zaleng le National Guard pawl cu ṭunavo khinh an si. Hmunkhat an hun phak ah Truck pakhat cu mipi lak a hun ra tluahmah caah mipi cu an tli len. Cu dih cun mipi nih cu truck mawngtu cu an zuanhnawh i an tuk an velh, siizung ah kalpi asi i atu tiang ah cun a thi a lo thawng cu theih si rih lo. New York, Miami le Washington DC bantuk khua ngan pipi ah buaibainak cu a ngan ngaingai leng ah White House pawng dum pakhat ah mibu a hun si ruang ah ṭuanvo ngeitu palek pawl nih hmunhma an lak colh. Washington DC Governor nih zaan lengchuah lo ding caan cu zaan 11:00 in zingka 6:00 tiang nawl a chuah tiin The New York Times nih a ṭial. May 29 zaan an buai lio caan ah khan President Trump cu White House hmun vawlei tang hmun ah a rangnak in an kal pi colh ti asi.

A laun cia mi caan chung ah khua ngan deuh ah buaibainak ngan a chuak lo nain Philadelphia um sang pakhat ah cun mi thil chuh a mangh mi pawl nih dawr pawl hrawh le thil fir cu an tuah. LA um Santa Monica hmun rili pawng dawr pakhat ah mi thil chuh mi aum caah mipi pawl cu dawr chung in an tli dih tiah theih asi. Kum 30 hrawng a rau cang mi Rodney King cu palek pawl nih an tuk/velh ruang ah a rak buai bal mi LA cu ṭuanvo ngeitu pawl nih May 31 zaan lei 4:00 in zing tiang leng chuah lo ding nawl chuah asi. “Ralrin tein um uh. Tuan tein tlungkal uh. Inn ah um uh. Miphun hoih in tlukrualnak he pehtlai in meikhangh le mi thil chuh phun lei kal a duh mi pawl siter mi ning in kan kal lo a hau. Kan bawm uh.” tiah LA Governor Eric Garcetti nih ati. 

May 25 ah Minneapolis palek pakhat nih a kut hren cia cang mi minak pa pakhat, George Floyd cu vawlei ah a bawh buin a hnawng cu a khup in a nenhchih i cubantuk hrennak ruang ah athi mi video nih cun hriamnaam ken lo mi minak pawl ṭuanvo ngeitu pawl nih ningcang lo in thil an tuah mi nih mipi thinlung cu a hun sawh ngai te. Thawhchuah kho asi lo mi kong chim in aa nawl ko hna bu ah Minneapolis palek Derek Chauvin nih a hnawng cu min 9 hrawng a nenh dih hnu ah George Floyd cu a thaw chuah aum ti lo.Derek Chauvin cu dotthumnak mithattu tiin baiceih ding asi i June 1 ah avoikhatnak biahal asi lai. Cu leng ah kha thil a can lio i a mah he ṭuanvo ngei ṭi pawl 3 zong an rian in phuah an si, biaceihnak hmun tu cu phak pi an si lo. 

Thil sining ningcang tein a um kho ṭhannak caah nawl ngeitu Tim Walz nih Minnesota ramkulh I National Guard pawl cu ṭuanvo a pek hna. Hi ṭuanvo cu an caan chung ṭuanvo lak ah a ngan bik asi fawn. May 30 zaan Minneapolis ah palek pawl nih mithli tlaknak bomb le meikhu bomb pawl hmang in zaan lengchauh lo ding timi nawl zulh lo tu pawl zong tlaih an si. Tim Walz nih zaan lengchuah lo ding nawl cu May 31 ah a hun karh chap i hibantuk lio caan ṭuanvo ngeitu vialte cu a thangṭhat hna. “Ningcang tein an tawlrel kho, minung nunnak pakhat hmanh liam sual lo tein le thil rawkral mi a tlawm kho chung tlawm ding in an tuah kho” tiah ati. “Zahan zaan Minnesota state, Minneapolis an phanh le cangka in an tuah ser mi paw he pehtlai in kan National Guard pawl cu ka thangṭhat hna” tiah President nih twitter ah a ṭial. “Hmun dang pawl zong nih caan a tlai hlan ah an hman ve ding asi” tiah ati.

National Guard 5,000 hrawng cu states 15 le khuapi Washington ah ṭuanvo pek an si i Hihnu 2,000 zong timhcia tein an si tiah Ministry of Defense nih a chim. Atu bantuk National Guard pawl ramchung ah biatak tein hman hi a tlawm ngai, miphun sining le chawkhel dirhmun aa tlau tuk lio caan duhlonak an rak langhter lio 1967 kum le 1968 kum buaibainak sining pawl zong a hun tharchuah ṭhan. President Trump nih ningcang lo in thil tuah mi kong ah kehlei hoih pialsual ning cu sual a phawt i Antifa timi phu zong ningcang lo in thil tuah tu phu ah telh asi lai tiah ati. “Antifa le atu buaibainak he aa pehtlai mi phu pawl nih timh chiammam tein tuah mi cu ramchung thli hruhrang tuah asi. Phung ning in tuah an si lai” tiah Attorney General William Barr nih ati. 

Sihmanhsehlaw fak ngai in hip le tawlrel ding in forhfialnak a tuah lengmanh tu Trump nih cun hi thil sining hi ṭha deuh lei kal ding in a bawm kho hlei lai lo tiah Atlanta Governor Keisha Lance Bottoms nih ati. “Kan ram caah a biapi mi thlennak sining pakhat ah kan phan. A chim relmi pawl nih hi sining a zual ter chin nak lawng asi lai” tiah CBS sin ah a chim. Biachim i ralrin ding in Trump cu forhfial tu an tam thluahmah leng ah President ruahnak petu lak zong ah hi kong he pehtlai in an hmuh ning aa dang thluahmah tiah thawng pawl nih a chim. 

November ah tuah ding mi President thimnak caah Trump a zuam dingtu Joe Biden cu miphun sining thleidannak duhlonak langhternak puai ah a va kal. “Temh in nak a tuar lio mi ram kan si. Hi nih a kan hrawh ding cu asi kho lo” tiah a ṭial i Delaware hmun um minak chungkhar pakhat he an biaruah lio hmanthlak he twitter ah Joe Biden nih a tar chih. George Floyd a thihnak nih America ram leng tiang buai nak a hun chuah pi i minung zaleng cu London um American Embassy hmai ah duhlonak an langhter ve. “Hika hmun ah ka phan, zeiruang ah dah ti ah cun ka lung a rawk caah asi. Mah thil hi ka lung a dong. Zeitik ah dah a dih te lai” tiah cu hmun ah aa tel mi Doreen Pierre nih ati. 

Germany ram zong ah England pumpalulh chuih thiam asi mi Jadon Sancho nih Paderborn he an i celh mi puai ah Borussia Dortmund lei in goal 3 a sut khawh duh hnu ah a angki a hlim i “Justice for George Floy” timi ca cu a langhter.

Ref:-)) South China Morning Post, Irrawaddy, Clashes near the White House as America’s turmoil deepens (Photo cerdit:-) the new york times.

LEAVE A REPLY

Please enter your comment!
Please enter your name here