Texas chaklei um nun hawi bang ṭha deuh in nun khawh ve ding caah tiah Miles 8,000 leng tlungkal hau mi, covid-19 zawtnak nih an dirhmun ṭhihphoih le virus cu ri khiah mi a ngei lo i inn zong ah zawtnak inn ah hnu tlun pi asi timi thieh ko bu zong ah Sherman,Texas sa chuahnak hmun rian cu i thim a hau ko. 

Rian in inn tlunkal zong ah a bubu in Dallas Area Rapid Transit motor i hrawm in kal asi. A nai tuk in um cu zawtnak a karh chinnak asi tiin ngandamnak lei mifim thiam pawl nih an chim ko nain Tyson eidin chuahnak hmun thlang lei Dallas in an inn tiang cu motor i hrawm in kal asi. NBC 5 nih a dothlatnak ahcun Tyson rianṭuantu 300 leng cu covid-19 positive an si, cu lak ah dozens hi Asia, Myanmar in a ra mi ralzaam an si i Burma tiin theih an si. 

Dallas county um ralzaam a zawmi 70 cu caan sau kal hau mi lam ah motor hmun khat ah i hrawm in kal asi, cheukhat cu an chungkhar pawl covid-19 positive asi mi zong an um tiah ngandamnak zung lei nih NBC 5 sin ahcun an chim. “Mi an chah ngaite, an chah taktak khi asi, hmunhma hme te ah khin minung 12 cit asi” tiah Sherman sa chuahnak hmun in inn tiang motor i hrawm in cit mi kong he pehtlai in Burmese Chin community hruaitu pakhat asi mi Salai Lian nih a chim.

Tyson rianṭuantu zawtnak ngei mi lak ah a tam deuh zawtnak aa chawnh mi pawl hi motor hmunkhat i hrawm ruang ah aa chawn mi an si tiin Lian nih a ti. “Ka thin phang ngai. Atu ning asi ah cun covid-19 zawtnak aa chawn mi tam deuh hmuh te an si kho men” tiah Malaysia lei ralzaam in a rak phan i Chin holh let tu zong asi mi Salai ZT Lian nih cun a chim chap. 

Thawngzamhnak ah cun, Tyson ah rianṭuan 326 le Sherman sachuahnak hmun in rianṭuan 200 leng cu covid-19 zawtnak hmuh an si tiah Texas National Guard nih test an tuah mi in theih asi tiah NBC 5 nih cacawn nithum ni ah thawngthanhnak in theih asi. Cu lak ah rianṭuan tu pakhat cu virus ruang ah a thi tiah company lei le Grayson County nih thawng an thanh. 

Ram chung um mi Tyson rianhmun vialte ah cun rianṭuan pawl ṭhen cheu ding, a chang chang  rianṭuan ter ding le a herh mi hmai huhnak pawl cu timhtuah piak asi. Asinain Sherman, Texas sa chuahnak hmun leng ah cun rianṭuan tu pawl cu hmunkhat te ah DART motor i hrawm in an rak phan tiah NBC 5 thawng la tu pawl nih cun hmuh asi. 

Motor aa cit mi tam dueh cu Burmese community mi pawl an si, nazi tamngai chung U.S 75 lam in kal asi. Van pakhat ah minung 15 tlum asi, Dallas an inn le rianṭuan nak hmun cu tlun kal asi tiah aa cit mi pawl nih an chim. Rianṭuan tu pawl nih DART cit maan cu thla fatin pek asi. Tyson nih hi kong ah hin ṭuanvo aa thlak lo.

Cu motor mawng tu hi “captian” tiah an auh, a mah nih cun inn le rian hmun cu don le thlah peng asi. Covid-19 zawtnak he pehtlai in thianghlimnak zulhphung cu “captain” pawl sin ah kuat asi cu leng ah tonghtham a tam mi thil pawl cu hnawh zungzal ding in forhfial an si ko tiah DART nih NBC 5 sin ah a chim. Transit agency nih cun Tyson lei in siseh a cit mi lei in siseh virus positive a ngei mi an um tiin cun thawngthanh aum rih lo tiah an ti. 

“Harsatnak tampi aum” tiah Salai ZT Lian nih cun a chim. Rianṭuan tu pawl hi an ram Myanmar zong ah namnehnak le biaknak lei hremnak rak ton bal asi. Cu caah ram thar an hun phanh tik zong ah an mah him nak caah tiin chim le rel hi an ngamh lo tiah a chim chap. “Hi nih hin thinphan thla launak tam pi a chuah ter. Virus cu capo asi lo timi zong an theih. Hi virus nih hin a thah kho hna, thinphan dai lo zong in a um ter hna.”  tiah Lian nih cun a chim. 

Grayson county um Tyson rian hmun nih cun an mah company lei nih an si khawh tawk in rianṭuan tu pawl himnak caah tuah asi tiah an zumh. “Keimah hmuhnak ah cun Tyson nih thil sining fiangternak an tuah mi cung ah ka thangṭhat ngai te hna. Timhtuahnak cu thil sining tein an tuah” tiah County Judge Bill Magers nih a ti. 

Thawngzamhnak ah “kan chung tel vialte nih him le hnangam in um ding nawl an ngei. Rian an rak rat tik ah kan bawmh hna i a hnu bik thil sining pawl le thilri pawl hman in an ngandamnak cu kan kilven piak hna” tiah company lei nih thanh asi. Cu leng ah motor hmun khat i hrawm mi kongkau he pehtlai zong in theih cacawn ni li ni ah khan ternak an tuah.

“Rianṭuan chungtel pawl asi mi motor hrawm in aa cit mi vialte cu ralrinnak hmaihuh, takpum checknak, a dang ngandamnak lei zohfel le zawtnak sining khuh le thawchuah har mi …tbk checknak tuah dih an si lai” tiah thawngzamhnak ah cun telh asi. Cu leng ah motor mawngtu pawl zong nih zaanghlei cawi in thianghlimnak pawl tuah ding le hmai huh pawl hman ding tuah piak an si. Motor pawl zong “electorstatic disinfection” tuah an si.

Tyson rianṭuan tu pawl, motor aa hrawm mi pawl caah zeital bawmh kho ding asi hnga maw tiah hlathlainak kan tuah lai, a herh si le motor tam deuh in minung tlawm deuh phorh …tbk tiah DART lei nih NBC 5 sin ah an chim. 

Kha hlan ah an don le thlah mi rak tam ngai dawh asi. Sihmanhsehlaw minung tam deuh inn in rianṭuan asi caah motor 100 leng rianhmun kal tik ah i hrawm in cit asi tawn mi cu atu ah hman lo in chiah sawh an si ko. Ref:) NBCDFW

LEAVE A REPLY

Please enter your comment!
Please enter your name here