Minneapolis khua ah hriamnaam aa ken lo mi minak pa pakhat cu palek nih an tlaih lio ah thi mi kong he pehtlai in mipi lungtling lonak aum caah America khua lian  pipi ah lungduhlonak a langhter tu mipi le palek pawl an hun i tong tik ah buaibainak a cang thluahmah. 

New York, Atlanta le a dang hmun pawl ah buaibainak a hun chuak. White House zong caan zeimawzat mi lut chuak khamh asi. Kum 46 asi mi George Floyd a thihnak nih hin minak pawl palek ruang ah an rak thi mi cung ah an thinhunnak pawl cu a tharchuah ṭhan. 

Atu bantuk lungduhlonak langhter mi hi Minnesota ah a zual bik asi. Minneapolis le Sein Paul khua ah cun zaan leng chuah lo ding nawl tiang chuah asi. Sihmanhsehlaw lungduhlonak a langhter mi hna nih cun nawl zulh lo in an um. Mei tam nawn a kaang, motor pawl zong mei an duah hna i cheukhat hmun kha cu meithat tu pawl zong kal kho lo in an um. 

Rian hmun ah palek thazaang a tlawm mi Minneapolis ah cun thil ri pawl chuh le hrawh …tbk zong muicawl in a lang mi hmuh asi. Zaan ṭim hrawng ah security le palek zeimawzat an rak phan. Minneapolis ah thlah ding mi ralkap zong timh cia ding in Pentagon nih nawl chuah asi. 

Washington DC i White House pawng zong ah a thi mi Mr. Floyd hmanthlak pawl “ka thaw ka chuah kho ti lo” timi ken in mipi nih lungduhlonak cu cacawn ninga ni zaanlei sang ah khan an langhter ve. Atlanta i mipi cheukhat le inn lo pawl humhimnak caah tiah hmun cheukhat cu emergency sining thawng thanh asi. 

CNN thawnglaknak hmun pawng ah lungduhlonak langhter mi cheukhat an rak ra i pawng kam inn le palek motor pawl cu mei an khangh ti asi. New York, Brooklyn ah lungduhlonak langhter mi mipi le palek dengto tein an i tong. Zei thil poh in cheih le mei khangh le palek motor pawl hrawh …tbk cu mipi nih an tuah i palek cheukhat zong hliam an tong. Mi tam ngaite zong tlaih an si. 

Detroit ah kum 19 mino pakhat a thi. Hi kong he pehtlai in palek lei nih dothlatnak an tuah cuahmah. Lungduhlonak a langhter mi mipi lak ah motor pakhat a rak lut i mipi lak ah meithal in an kah ruang ah hi mino cu a thihnak asi. Dallas le palek pawl cu lung in an cheih hnanak Phoenix khua ah cun mithli tlak nak bomb pawl cu palek lei nih an hman ve.

LA le Auckland khua ah cun lungduhlonak a langhter mi mipi nih lam pawl an kham, thla lang awng pawl cu an hrawh hna i “palek pawl cu that uh” timi ca pawl an ṭial tak ti asi. A thi mi minak pa a tlai tu Minneapolis palek cu a rian in phuah asi leng ah hi kongkau he pehtlai in biaceihnak tuah asi lai. Kum 44 asi mi Derek Chauvin cu a ra lai mi cacawn nikhat ni ah biaceihnak zung ah chuah pi asi lai. Ref:-) BBC

LEAVE A REPLY

Please enter your comment!
Please enter your name here