Chief Minister U Phyo Min Thein ho mi Yangon cozah ṭuanvo ngeitu cheukhat nih May 24 ah Botathaung Pura pawng um “Sister Mya Nan Nwe” um hmun ṭhial le Shin Upagupta ti ah chiah nak puai an tuah mi ruang ah mibu ton pumhnak a hun chuak. Hi nih hin atu lio nawl chuah mi phunglam pawl cu an buar tiah mipi siin soiselnak a chuak ngaingai. 

Atu bantuk tuahsernak he pehtlai in Chief Minister U Phyo Min Thei nih cun hihi Botathaung Pura a lam kip in sersiamnak caah tinh in tuah mi lawng asi ko caah nawl le phung kan buar mi aum lo tiah hrilhfiangnak a tuah ṭhan. Cozah nih minung pa 5 leng ton pumh lo ding nawl cu May 31 tiang chuah asi caah atu bantuk mibu he tuahsehnak a ngei mi Yangon ramkulh cozah cu Union cozah nih dantatnak tuah piak ding in chim le rel asi leng ah cheukhat cu Palek zung ah dantat piak ding ca a pe mi zong an um len. 

Covid-19 zawtnak khamhnak caan karlak ah mibu he um ruang ah Cozah dantatnak an tuah len mi zong an um cuahmah ve caah phung ning tein tlukrualnak a um khawh ding kongkau he pehtlai in cheukhat an ruahnak le hmuh ning pawl cu a tang lei bantuk in hal an si. 

Salai Ceu Bik Thawng (General Secretary:

Chin National League for Democracy): Hi kong he pehtlai in kan zohfel lio ko. Phung an buar taktak ah cun an mah lei i tlukrualnak kongkau he pehtlai in biahalnak tuah a hau lai. Phung tang ah rammi vialte tlukrual dih ding asi. Atu cu mipi lak ah mibu tonnak a tuah mi pawl cheukhat cu tlaih asi. An nih tah mibu he tonnak an tuah ve ko ṭung, zeitin dah dantatnak tuah asi te lai. 

Aho a palh aho a dik timi nak in phung tang ah cun zapi tlukrual tein adik mi biaceihnak asi kha duh asi. Cozah asi ruang ah, nawl ngeitu asi ruang ah tiin ruahhlei in ngaihthiamnak pek phun asi ah cun phung hi mithmai zohnak a ngei peng ko lai. Tlukrual nak aum lo mi sining ah cun rammi pakhat sining in ka dai lai lo. 

Monywa Aung Shin (NLD Central Communication Secretary):

kan nih nih covid-19 he pehtlai in nawl chuahnak, zulhphung…tbk pawl kan chuah. Cu pawl cu zulh kho a biapi ngai. An tuah mi puai kha keimah theng nih ka va zoh ve cu asi lo nain thawngpang ning asi ah cun mi zeimawzat an tam pah. Hi kong he pehtlai in amah (U Phyo Min Thein) zong nih hrilhfiangnak a hun tuah. Zeibantuk asi zong ah a theih pek, theih lo pek ah hi bantuk kongkau hi cu aa ralrin ding asi tiah chim ka duh. 

U Khin Maung Mying (Legal Adviser):

Phung ning in cun theihthiamnak pek mi aum lo. Mah le ramkulh nawl chuah mi zoh ah cun zeibantuk sining ah zeitin tuahṭuan kho asi timi telh chih asi nain phung zulhnak, mipi caah tuah awk ṭha lo mi le zeitluk dah a biapi …tbk pawl zohchih a hau. Zeibantuk sining asi tiah chim len zong ah phung ning he cun aa kalh timi cu a fiang. Yangon ramkulh cozah lawng si lo in a dang a ho poh nih an va tuah zong ah. Mipi pawl sin fianternak tuah ṭhan mi cu a dang, phung buar mi kongkau kha zeitin dah an tuah lai timi cu a dang asi ve ko. Ramkulh cozah asi ruang ah Union cozah nih zeitin dah hi kong hi a tawlrel lai timi cu zohchap a hau ko lai. 

Atu bantuk caan ah Daw Aung San Suu Kyi nih hruai in covid zawtnak ralrin ding caah ngandamnak lei rianṭuantu pawl he an i zuam lio le mipi zong thinphang thlalau in an um lio caan ah atu bantuk thil sining cu lungfim cuapṭha caah cun zeitin hmanh in pom piak kho asi lo. Khatlei ah mibu tonnak ruang ah dantatnak a ing cuahmah mi an um lio ah phung ning tein tlukrualnak he cohlan kho ding Union cozah nih zeitin a tawlrel lai timi zoh a hau ko hih.

U Maung Myint (Min Kin, Pyithu Hluttaw Member-USDP):

 Covid-19 zawtnak cu ramkulh le ramṭhen vialte lak ah Yangon ah a tam bik. Phung ning ṭha tein zulh a herh mi hmun hma asi. Cucu Botathaung Pura sersiamnak ding caah tiin Shin Upagupta ti ah chiah le Mya Nan Nwe ṭhial timi pawl cu Pura kongkau he a tlai mi asi theng rua lo ee. Fiang tein chim ah cun a kik lai bang a lum lai bang tuahsernak cu Buddah zumhnak zong asi lo. Cozah nih nawl chuah mi cozah Minister nih a buar mi kha cu zeihlei dah chim ding aum ti. Zeibantuk ruang hmanh ah tuah awk asi lo. 

A taktak ah cun covid-19 ruang ah mah zong nih mi zumh lo, mi zong nih mah zumh lo timi sining a phan. Cu lak ah kha bang mibu siin zawtnak i chawn siseh law loh asi cang. Atu lio caan ah cun mipi lei in ngandamnak lei theih a herh mi tampi an ngei cang caah atu bantuk tuah sernak hi cu phundang in chim ah cun mipi zeirel lo zong asi tinak a lang. 

U Ye Tun (Former Pyithu Hluttaw Member): 

Hi bantuk thil hi cu tuah ding hrim asi lo tiah ka ruah. Atu lio covid caan ah nawl chuah mi pawl zong an dong rih lo. A hlei in biaknak lei puai tuah le tuah lo mi nak in minung 5 leng ton lo ding timi a tel. Atu an tuah mi zong hi Theravada Buddhism puai phun zong asi fawn lo. Hihi tuah lo zong ah a poi lo. Keimah hmuhnak ah cun an palh ngaingai tiah ka hmuh. Mahi cung lei hruaitu pawl nawl peknak in tuah mi zong asi kho men. Hi bantuk fiang ngai in phung buar mi tuah ngam hi dirkamh tu um lo ah cun tuah ngam ding thil asi lo tiah ka tuak. 

Democracy cozah nih phung a chuah ah cun phung ning in a uk a hau. Dictatorsip kan huat ruang ah democracy timi ruahchannak he mipi nih dirkamh mi atu cozah chan ah hibantuk tuah mi cu lungrawk ngai asi. Atu thil hi cung lei nih tuah mi asi ah cun kan ram hmailei caah chim hlei ding hrim aum ti lo. 

U Kyaw Zeyah (Dagon Tsp, Region Hluttaw Member-PPP):

 U Naing Ngan Lin hrim kha Yangon ramkulh Covid-19 Containment and Emergency Response Committee chairman asi cu. Cu caah hi kong hi cu ramkulh nawl ngeitu pawl an si caah Union cozah nih central committee ser i cu nih cun tazacuai kho lawng asi lai. A dang tang lei pawl nih an cozah tazacuai ṭhan ding cu asi kho men lai lo, keimah ruahnak asi. Hi tluk lawmmam asi mi cu central in ramkulh cozah tiang a herh pawl tuah ding asi. Cu bantuk tuah lo ah cun Union cozah ca zong ah zohdawh lo mi thil ah a cang kho. 

Biaknak lei cu chiarih ko law, ngandamnak ca hrim ah hi bantuk nawl chuah caan ah phung buar asi mi cu thil pakhatkhat tuah a hau. Yangon ramkulh zong cu covid-19 ruang ah sung zatlaknak a tam ngai hoi, biapi deuh in chiah ding asi.

Mufti U San Aung (Koraan Awareness Team):

Phung an buar maw buar lo timi cu an mah nih an i theih bik lai. Phung buar mi tuahsernak asi ah cun tuah ding asi lo tiah ka ruah. A dang biaknak pawl tu cu mibu he um ah tlaih le thongthlak …tbk pawl asi. Hun ruah ah cun Buddhism pawl le a dang biaknak pawl karlak ah thleidannak an ngeih tiah ruah asi cun a ṭha lo ngai. 

Zei asi zong ah Chief Minister nih khua kau ruat kho deuh in rak tuah seh law a ṭha tiah ka hmuh. Hrilhfiangnak a tuah ṭhan mi zong ka thieh pah. Hruaitu timi cu ralrin ngaingei a hau. Fiangternak an tuah mi sining kha thil dik cu asi lo. Fiangternnak tuah mi si lo in palhnak huhphengnak caah chim mi a lo. THEIHTERNAK:-) irrawaddy biahalnak chungin tial chap chinmi asi.

LEAVE A REPLY

Please enter your comment!
Please enter your name here