Covid-19 zawtnak aa chawn mi a zorchuk deuh mi ram pawl nih zawtnak ralrin ding in nawl chuah mi le zulhphung pawl tuan tuk ah ṭhumh asi ah cun avoi hnihnak zawtnak aa chawn mi a sang bik dirhmun a phan kho mi asi tiah World Health Organization (WHO) nih cun ralrin peknak bia a chim. 

Atu lio vawlei cung ah covid-19 zawtnak a karh ningcang hi avoi khatnak ti let lawng ah asi rih tiah WHO Health Emergencies Programme, Executive Director Mike Ryan nih May 25 ah tuah mi online thawngthanhnak ah a chim. Ram tam deuh ah hi zawtnak a karh mi a zorchuk nain Central America, South America, South Asia le Africa ah covid-19 zawtnak a karh chuahmah lio asi tiah thil sining pawl a hun chim. 

Zawnak pul pawl hi avoi hnihnak tilet bantuk an i cang tawn caah atu avoi khatnak tilet a ton cang mi hmun pawl cu tu kum dih lei ah hin zawtnak tilet a nolh kho men tiah Mike Ryan nih cun hrilhfiangnak a tuah. Avoi khatnak zawtnak tilet dir ter ding caah nawl chuah mi zulhphung pawl tuan tuk ah ngol asi ah cun zawtnak a karh ningcang cu rianrang in a karh ṭhan kho mi ral aum tiah a chim. 

Europe le North America ah mipi hngandamnak le pakhat le pakhat aa hlat tein um, zohfelnak, virus test le zawtnak a karh mi zorchuk ding caah thuk le kau in thlurtinh pawl pehzulh tein tuah ding asi i zawtnak a karh ning a sang bik asi colh lo ding in tawrel a hau tiah Mike Ryan nih cun a chim. 

May thla cung ah khan Europe ram pawl le America nih cun covid-19 zawtnak khenkhamnak lockdown zulhphung pawl cu dorh deuh ding in timhtuahnak an ngei thluah mah. Luhchuah le tlungkal khenkham in lockdown tuah asi ruang ah vawlei ram kip chawkhelnak ah zualhma ngai in sungh zatlaknak a rak chuak. May 26 zing lei cazin tiang ah cun vawlei ah covid-19 zawtnak a ngei mi 5.5 million leng an si cang i cu lak ah a thi mi 346,000 leng le a dam thiang mi 2.3 million an si tiah theih asi.

Ref.BBC, Reuters ,AFP

LEAVE A REPLY

Please enter your comment!
Please enter your name here