Rev. Dr. Thawngling Mualhlun he biaruahnak.

May 28, 2020

Covid-19 zawtnak nih a chuahpi mi harsatnak le lungretheihnak cu vawlei cung khuaza ram kip nih ton cio asi. Hi sining ah kan nih Chin miphun zong cu a ruang pakhat khat tel ah kan tuar heio ve. Cu vialte lak ah biaknak lei he pehtlai in tuah tawn asi mi Pathian thanghatnak zong cu kha hlan tuah tawn bantuk biakinn ah kal i pumh kho lo dirhmun tiang a hun si. Hibantuk sining a phan te lai timi cu rakruah le timhcia cu asi bal hrim lai dah. Cu asi caah Pathian thanghatnak, khrihfa bu chungtel pawl le Pathian rianuantu pawl lak kar pehtlaihnak le a dangdang thil sining pawl theih kho ding in Chin Evangelical Baptist Church (Indianapolis), Senior Pastor, Rev. Dr. Thawngling Mualhlun he biaruahnak kan hun ngei kho.

Caan pek in biaruahnak a kan cohlang tu Rev. Dr. Thawngling Mualhlun cung zong ah CCN lei in lunglawmhnak tampi kan ngei.


Q1. CEBC ah chungtel pazeizat dah nan si? 

Biahalnak nan ka ngeih ve caah ka lawm. Bawipa thawng in kan Khrifabu I chungtel 3100 hrawng kan si. 

Q2. Atu bantuk biakinn ah pumhnak nawl khamh asi mi nih khrihfabu cung ah zeithil pawl dah a chuah ter? 

Kan chan ah ton ballo mi thil asi tik ah, zeitindah kan tuah lai timi a har ngai. Asi nain kan tonmi chung in zeitindah Pathian kan biakning a si lai timi cu a kan ruahter ngai ve. Online pumhnak ah kan i thlenmi nih pumhnak a kan peh ter khawh tiah ka ruah. 

Q3. Hibantuk caan sining ah zeitin dah khrihfabu chungtel pawl nan i hruai ningcang asi? 

Hruainak kong ah Emergency Response Team –ERT kan ser i anmah nih a herhning in an kan hruai. 

Q4. Atu lio caan ah tah khrihfabu chungtel pawl sin ah zeibantuk thazaang peknak dah tuah asi? (baibal cathiang i hrawm ṭinak …tbk)

  1. CINCIK Thlacamnak kan ser colh i cucu a tha ngai tiah ka ruah. Zarhkhat ah voikhat, Monday-Wednesday (72 hrs) thlacamnak hi kan boruak a dih hlan lo kan tuah lai tiah kan i tim. Tuzarh hi zarhlinak a si cang. Minung tam ngaingai an i tel kho i kan i lawm ngai.  
  2. Online live service: Wednesday zan (minung 5 AV tel in) le Sunday chun (minung 9 AV tel in) 
  3. Online Recorded sermon: Tuesday zan le Friday zan. 
  4. Viber group Thapeknak sermontawi: Monday to Saturday (nikhat voikhat ṭialmi sermon, Baibal siangngakchia pawl, evangelist pawl, upa dang tampi kan sawm hna i kan ṭial ter hna) 
  5. Khrifabu thawngthanhnak: A herhning in zanlei sang paoh ah Admin pastor nih tamdeuh cu a kan thanhpiak. 
  6. Cozah le Ngandamnak lei nih an chuahmi news update cu kan leh i Friday paoh ah tuah a si. 
  7. Covid-19 ruang ah harsatnak a tongmi bawmhnak fund kan tuah. Application tein chungtel lawng nih sawk ding. 
  8. Foodpantry kan tuah. Eidin lei harsa mi um sual ah tiah kan timhmi a si. 
  9. Khrifabu sang 12 kan si i sangkip ah ṭuanvo ngeitu pastor, deacon kan i chia hna i anmah nih a herhning in pehtlaihnak an tuah hna. Pastor nih thlacam piak le counseling deuh, deacon nih thlacamnak le herh dangdang zohpinak.. telephone in.
  10. (10) Inn ah thawhlawm kholhnak zarhhnih voikhat kan tuah. Deacon nih an innka ah hmurhuh bu in an thawhlawm cohlannak an ngeih hna. 
  11. (11)Online thawhlawm peknak zong kan tuah cuahmah lio a si.  
  12. (12) CE Director nih CE lei ngakchia chungkhar paoh pehtlaihnak a ngeih peng hna. 
  13. (13)CE chimtu kan sayate/ma nih video clip in cawnpiaknak an ngeih peng hna. 
  14. (14)Sianginn lei herh bau mi paoh kan Church secretary (sianginn riantuantu zong a si chih) nih online in homework le a dang tuahning cang a sikhawh tawk in a bawmh hna. 
  15. (15)Covid 19 zawtnak a ngeimi kan um sual ahcun cozah le ngandamnak zung nih an tining tein zohkhenh ding kan i tim. (Kan Khrifabu ah positive a simi an um pah ko)
  16. (16)Covid-19 zawtnak in a thimi cu cozah le ngandamnak an tining in zulh ding kan i tim. (Bawipa dawtnak thawng in nihin 5/28/2020 tiang ahcun a thimi kan um hraw lo)
  17. (17)Lailei mithi kan ngeih ahcun voidang tawn topinak silo in pastor pakhat nih an inn ah thlacam piaknak kan tuah. 
  18. (18)Kan Khrifabu mithi kan ngeih (sual) ahcun Cozah le Ngandamnak tining tein zulh ding.  

Q5. Khrihfabu chungtel pawl siin tah Pastors caah tiin zeital zanghlei cawinak aum maw? 

Kan ton ballomi a si tik ah zeitindah kan cohlan lai I rianrang in ṭhatdeuhnak kan zuam lai timi cu a har ngai. Asi nain tuah khawh tawk kan I zuam. Pathian sin kuun pah in chungtel mipi sin ah a lamkip in kan luh colh a hau tihi kan fian colhmi a si. Program kan suaimi vialte kha a cawlcanghpi tu le a hruaitu cu pastor te le hruaitu upa hna kan si ko. 


Q6. Biakinn ah mipi rat i Pathian thangṭhatnak aum lo tik ah cu nih hin thawhlawm le cheuhra cheukhat le a dangdang thawh vo tete pekchanhnak lei zeidah a lawh? A zor chuk maw asilole a kai cho dah? 

Pekchanhnak ah phunhnih in a um. Anmah tein biakinn ah rak put ding sisehlaw a zor lei a panh ko lai. Kannih hi zarhhnih ah voikhat in deacon pale pawl le hruaitu hna nih chungtel inn ah kan kholh ter hna. Ṭha tein hrukaihnak he innka hram tiang an va kal I chungkhar nih innka hram ah rak pek a si. Cucaah thawhlawm hi a zor hlei lo, a kai deuh lei hmanh kan si. 


Q7. Hibantuk caan ah hin khrihfabu sin in zeibantuk thazaang dernak phun dah a tam bik asi? 

Kan ton ka ahcun thinphan in a ummi kan tam ngai, a si nain sau a rau lo, thazang thar an la ngai cio. Program a phunphun kan ngeihmi zong nih a kan bawmh ve tiah ka ruah. 


Q8. Khrihfabu lei nih Covid-19 zawtnak kongkau he pehtlai in khrihfabu chungtel pawl sin thawngzamhnak le theih ternak tuah …tbk nan ngei maw?

Kan tuah lengmang. Federal le State, County le Health Dept.  thawngthanhnak, CDC zulhphung vialte thawngthanhnak kan tuah lengmang. 


Q9. Bawipa zaanriah hman he pehtlai in tah zeitin dah tawlrel le hman ning cang asi? 

Bawipa Zanriah cu kan hmang kho lo. Online in kan tuah hnga maw tiah kan ruat pah nain a tak ah a hmual a ngei lo kho men tiah kan ruah caah kan tuah lemlo.


Q10. US ah cheukhat biakinn pawl on ṭhannak ding timhtuah le chimrel asi pah, hi kong he pehtlai in na hmuh ning?

Cozah nih cun an onh pah ko cang nain rai hi a thian rih lo caah pumhnak cu June thlachung cu online in tuah rih ko sih tiah biakhiahnak kan ngei. 


Q11. CEBC tah zeitik hrawng ah dah biakinn ah mipi he pumhnak tuah thok ṭhan ding ruahchan asi?

Atu ning cun a cunglei kan chim bang in, June thla chung cu online tuah ding in biakhiahnak kan ngei. July thla lei tu cu kan ceih rih lo nain tlawmpal cu aa dang deuh te lai tiah cun ka ruah. 


Q12. Biakinn ah pumh ṭhan ding caah zeibantuk timhtuahnak le zulhphung …tbk tuah mi nan ngei maw?

Biakinn pumh ṭhan tik ah kan i timhmi a um pah ko. Cozah le Ngandamnak lei nawl zul in pumh ding cu kan i tim. Ngakchia le a dam deuh lo mi cu inn hngah ter rih ding. Chungkhar khat dah tilo cu lamhlat deuh ṭhutdir ding le nawlzulh ding cu kan i tim.

Q13. Hi bantuk caan har lak ah mipi sin thazaang peknak na duh mi siaherh bia / thawngṭha tawi kan chim kho law kan i lawm ko hnga?

THAPEKNAK: Tulio Covid 19 tlangrai a tlunlio ahhin Bawipa bia in kan I hnemh ding hi a biatuk. Cucaah tawi tein Pathian bia ka rak ṭial ve. 

Bawipa hi kan i dornak a si caah kan phan  ding a si lo. Phang hlah timi hi voi tampi kan hmuh. Phang hlah u tiah aamahkhan a kan pe khotu cu Pathian lawnglawng a si. Cucaah kan dornak Pathian hi fuh peng ko u sihlaw cuhlan kan der zong ah tulio boruak nih Pathian ah dork an thiamter ko she. Amah lawnglawng hi kan himnak cu a si. 

Bawipa nih a bia chung ah hitin a chim: Pathian cu kan i dornak le kan thazang a si, harnak caan ah a kan bawm zungzaltu a si. Cucaah cun vawlei cu i hnin in tlang cu rili chungah tla hna hmanhsehlaw ka thin a phang lai lo; rili tilet cu tho in awn hmanhseh, tlang zong i hnin dih hna hmanhsehlaw ka thin a phan lai lo” (Salm 46:1-3). 

Bawipa nih thil a onhmi cu a kan chimhhrinnak, a kan cawnpiaknak a si fawn. Pathian bia nih, “..Bawipa nih ..fa i a cohlan mi cu a chimhhrin tawn hna…” (Hebru 12:6) a ti bang kha a si. Kan tonmi thilkip ahhin a chimhhrinnak le a cawnpiaknak aa tel peng. Cucu zumtu hna kan hlawknak hnga caah a si. 

Bawipa nih zeithil paoh hi a dawtmi hna caah cun a halei ah a mer zungzal ko. Rom 8:28 ah fiang tein a kan chimh: …zeithil paoh hi a ṭha lei ah a merpiak ko hna… timi hi sullam a ngei tuk. Kan tonmi kip ah a chim duhmi a si. 

Nihin Covid 19 nih a kan tuaitam lio ah zumtu fale hna nih vancung kan Pa auh ve tik ah hi thil ṭihnung le zawtfah thihnak hi vawlei nih amah kan hngalh deuhnak, miphun hna nih amah kan hngalh deuhnak, Khrifabu hna nih amah kan hngalhfian deuhnak, chungkhar le pumpak cio hna nih amah kan hngalh deuhnak ah a kan merpiak hrimhrim ko lai. 

Cucaah ule nau hna, 

Kan thin phang hlah u sih, kan Pa Pathian sin tu ah kuun ko usihlaw thil a onhmi vialte hi a kan chimhhrinnak le a kan cawnpiaknak a si ti ruahbu in a ṭhalei ah a kan merpiaknak tu kha thlacam bu he hngak ko u sih tihi kan sawm duhmi hna a si. 

Bawipa nih thluachuahnak kan pek piak ko seh. Amen. 

LEAVE A REPLY

Please enter your comment!
Please enter your name here