Biakinn pawl on ṭhan zokzok timhnak hi a tu lio coronavirus ral sining nih chuah pi mi a hnu bik thli asi. President Trump nih thangṭhatnak hmun pawl hi aum lo ah asi kho lo tiah atu lio pul caan lak ah a hun chim, cu leng ah minung pumpak cio biakinn kal pumhnak nawl Governors pawl nih an pek lo asi zong ah cucu lonhtak lai tiah ati. Zohhlat tu pawl nih cun cu bang tuah kho nak nawl cu US phunghrampi nih nawl a pe lo tiah an ti.

Sihmanhsehlaw caan rau hlan ah Trump nih biakinn pawl on ṭhan ding in nawl a chuah bantuk in ramkhel lei in zeibantuk sining dah a phan te lai ti mi cu cheukhat uktu bawi le thim mi minung pawl nih zoh asi i ramṭhen nawl ngeihnak he i ralkah dawh zong asi. An mah lak i mitam deuh nih mithmai zoh in ramkhel ruang zong ah asi kho men.

Culak ah biapi deuh mi cu, American Islam biakinn le biakṭheng pawl cu pumhnak kan tuah lai maw tuah lai lo timi kong ah buaibainak an tong lem lo. Sihmanhsehlaw khrihfa biakinn pawl caah cun cu pumhnak kongkau cu a hun chuak i phundang chim ah cun US phunghrampi ning asi ah cun zalong tein pumhnak nawl an ngei. Rawldawr le thilzuarnak pawl hmanh ningcang tein zulhphun tang ah on kho asi ah cun khrihfa biakinn zong cu ve bantuk asi ding asi tiah biaelnak a hun chuak.

“A dang tonpumhnak hmanh tuah asi ah cun biaknak lei he pehtlai in hmunkhat thangṭhatnak cu khenkham kho asi lo” tiah Mat Staver, Liberty Counsel i conservative legal group chairman nih ati. “Biakinn pawl cu a hlat tein um ṭhut le thianghlim tein um i thangṭhatnak tuah kho asi ko, fiang tein chim ah cun cheukhat biaknak hmun si lo mi nak in cun a ṭha deuh ko lai” tiah ti asi. Mah pumpak biakinn kal i thangṭhatnak tuah nawl pek asi rih lo ah cun US phunghrampi remhnak-I chungtel leng chuah khonak nawl cu a buar asi tiah Staver nih cun a chim chap. “US phunghrampi remhnak-I ah cun dirter chungnak aa tel lo” tiah a ti.

Liberty Counsel nih cun rampum huap in biakinn le zumtu pawl nih ton pumhnak thok ṭhan ding in May 3 ah khan forhfialnak a tuah cang. Cu leng ah biakinn pawl nih on ṭhannak an tuah tik ah humhimnak zulhphung pawl zong a hun thanh chih. Cu zulhphung pawl lak ah a bik cun hmaihuhnak (mask) tuah …tbk le hlasaknak tuah lo ding ti khi asi. A ruang cu hlasak lio thachuahnak nih hin virus a hun i chawnh ning kha a zual ter ti asi. “Inn ah pumhnak tuah timi cu a hme tuk leng ah khenkham tuk asi. Azei poh phunkhat ning in tuah dih phun asi.” tiah Staver nih cun a ti.

Atu lio pawngkam i zumhnak he a nung mi caah cun atu lio hi biakinn kan herh deuh caan asi tiah a chim chap. Biakinn pawl zong nih zeitin tuah ah dah mipi caah a ṭha bik lai timi cu cozah sawhkalhnak tel lo in an mah tein biakhiahnak an tuah a hau. Inn tampi cu muilang pumhnak le luhchuahcolh mi phumnak … tbk in hi zawtnak pul lio ah phumnak caan hman asi. Asinain a ṭhawngmi zumhnak nih zarhdonghnak caan phumpak biakinn phanhnak cu zeihmanh nih kham kho lo.

“Zapi zaraan hrihfa caah cun zarhpi ni ah tonpumhnak cu kan pupa chan in tuah cang mi nawl asi cang” tiah Bruce Morrill, Roman Catholic hruaitu le Vanderbilt Divinity School in theological cawnnak lei thiamsang nih cun ati. “Khrihfa caah cun a muru pakhat asi i atu lio caah zong ah cu sining aum ṭheio ko” tiah ati. Cu ve bantuk cun phunglam, bawipa zaanriah hman le zulhphung nih cun zumtu pawl karlak ah pehtlaihnak asi.

“A thinphang cuahmah mi Pathian rianṭuan tu pawl zongnih pumhnak thok ṭhan ding le mipi hun ton ṭhan lai ding cu Khrih thawng in timi zumhnak he an thok ṭhan a hau ve bantuk in Bawipa zaanriah hman caan ah cun mitsurhang le changreu hun hrawm cu a hau” tiah Morrill nih cun Roman Catholics rianrang pumh a herh ningcang cu a chim.

Bawipa zaanriah hman caan i mitsur hang le changreu hman hi Khrih thisen le pum in a ra tiah Roman Catholics nih cun an zumh bantuk in Catholic thangṭhatnak ah cun biapi ngai mi asi. Hi nih hin zumtu pakhat le pakhat karlak ah pehtlaihnak a hun ṭhawng chin i thlarau lei thazaang asi leng ah zumtu le Pathian karlak pehtlaihnak asi.

Episcopalians le Lutherans tel in a dang biaknak bu pawl nih cun Bawipa zaanriah hman ning cang a phunphun in an tuah cio ve. Zumtu tam deuh cu Bawipa zaanriah zong a thla in an hmang kho ti lo a ruang cu kha bantuk a bu in pumhnak aum kho lo caah asi. Biakinn pawl hi mipi tonnak hmun asi bantuk in pumhnak cu chungkhar changtu ah a hun cang. Mipi nih a hlat tein um kal caan asi lio ah chawva lei harsatnak, khuaruah har lungrethihnak ton caan ah biakinn cu kha sining in i mer ṭhan khonak ding le thazaang lak khonak hmun asi.

Thildang pakhat aum rih mi cu atu bantuk pumpak in biakinn ah pumhnak nawl khamh asi tik ah biakinn pawl caah thawhlawm pawl a zor. Hi zawtnak pul nih a chuah pi mi chawva lei harsatnak cu church chungtel asi mi nih an tuar ve mi asi tiah Charles Zech, Villanova University in Bawipa zaanriah kongkau tawlrel tu thiamsang nih cun a chim. Pumhnak aum lo ah cun bawmhchanhnak zong caan sau a um kho cawk lai lo. Catholic biakinn pawl hi an tuar khun tiah a chim chap.

“Biakinn pawl nih an chungtel pawl cu thawhlawm thawh ding in zarhfa tein forhfialnak an tuah” tiah Zech nih cun a chim. Thawhvo thawh ding le biakamnak tuah ding in fial khi an si lo. An siantawk thawhlawm thlak khi asi ko. Asiko nain zumtu pawl biakinn an phan lo caah thawhlawm an pe ve lo khi asi. Cucu biapi ngai mi asi i cheukhat biakinn caah cun zumtu pawl thawh mi chung in tangka lut an ngei ve mi khi asi.

US ah Catholic biakinn 12,000 leng cu federal cozah sin in chawva tlawmpal bawmhalnak nawl an hal hna tiah Pat Markey, Diocesan Fiscal Management Conference in ttuanvo ngei tu nih cun a chim. Cu lak ah 6,000 hrawng cu avoi khatnak Paycheck Protection Program tang ah pek an si i a dang 3,000 hi avoi hnihnak bawmhnak ah khan an hmuh cang tiah May thla tok ah DFMC ca chuah mi in theih asi. Cheukhat biakinn nih cun mipum rat kho lo tel hmanh ah online in pek ding in forhfialnak an tuah. Sihmanhseh law cu batnuk a thawh taktak mi hi cu an tlawm ngaingai tiah Zech nih cun a chim.

Cheukhat pastors nih cun Pathian zumhnak thawng in biakinn on ṭhan ding an nam cuahmah. North Carolina, Raleigh um South Hill Baptist Church in Rev. Brain Lowman nih cun biakinn lei humhimnak ṭuanvo ngeitu pawl le khrihfa upa pawl he ton in Biakinn kong ah Pathian duhsak nak cu an kawl. Baibal cathiang um bantuk in biakinn in ṭhan ding cu biakhiahnak an ngei.

“Pathian a kan fial bantuk a mah thangṭhatnak caah hmunkhat rat cu atu lio zawnak a karh caan le harsatnak caan ah hin kan ṭih ding asi lo” tiah Lowman nih cun bumi sin ah ca ṭial. Louisian, Baton Rouge i Life Tabernacle Church pastor Tony Spell, ramṭhen hruaitu pawl nawl zulh lo in bupi pumhnak a tuah tawn tu nih cun “bumi pawl cu hla thiang saknak le laam nak in thlarau nih a kan tlak, kan damnak caah asi” tiah ati. “Cathiang nih a kan ti mi cu damlonak sin zong ah ṭhutum ding asi i cu hna cu damter an si lai. Cu bantuk ṭhiamṭhiam in tuah asi lai i zawtnak kan i chawn lai timi thinphan nak aum ti lai lo” tiah a chim chap. Spell nih “siibawi pawl ka doh mi hna asi lo. Asinain a bumi pakhat cu cancer in a dam thiang” tiah ati.

Biakinn tamdeuh nih cu on ṭhannak ding an timhtuah cuahmah nain cheukhat cu hawi he i dang in biakhiahnak an tuah ve. Episcopal Diocese of North Carolina le Southern New England Conference of the United Church of Christ hi biakinn ṭhutnak pawl ah bupi pawl don rih lo in saudeuh hngah aa tim mi biakinn an si. Covid-19 zawtnak i chawnh, zawtnak ruang ah siizung phan mi le a thi mi pawl hi a zor ngaingai cang tiah ti awk a ṭha rih lo tiah bu hnih ning te nih an ti. Mipi caah ṭha deuh in ralrinnak ngeih a hau rih ko tiah an ti.

 “Zeitik ah dah pumpak in biakinn phanh pumhnak kan tuah kho lai timi kong biakhiah kho nak ding caah kei mah le khua um pastor 20 hrawng cu Physician pakaht he ton biaruahnak zarh fatin kan ngei peng” tiah North Carolina i the United Church of Chapel Hill in Senior Pastor Rev. Cameron Barr nih cun a chim. Atu caan ah cun pumhnak tuah rih lo ding tiin biakhiahnak an ngei. An pawngkam ah hin zawtnak a zorchuk mi le rang tein test tuah nak an ngei kho rih lo leng ah tonghthamnak a ngei mi pawl dothlatnak zong ningcang tein an tuah kho rih lo.

“Biakinn na rak rat ah cun hla na sa kho lo, bawipa zaanriah na hmang kho lo asi lo le abu in tonnak na tuah kho lo. Tihang thlum tu cu kan in dinh ko lai” tiah Barr nih ati. Hi zawtnak pul cu zumtu pawl caah a har ngai. Mi kip nih ton cio asi tiah a chim chap. Sihmanhsehlaw a mah le a bumi hna nih nawl ngeinak le zulhpung pawl an tuah kho lo nain an zumhnak cu phun dang lei ah an hun kal pi. Cucu midang caah thil ṭha tuah le pakhat le pakhat himnak ding caah an si khawh tawn in an i zuam cu asi. Ref:-CNN

LEAVE A REPLY

Please enter your comment!
Please enter your name here