Brazil ah coronavirus in a thi mi minung thawng leng ruak vuinak hmanthlak pawl a hun cuang. Hi hmanthlak nih cun South American hi cononavirus nih fak ngai in a den mi ram asi hi a lang. Russia cu vawlei cung ah Covid-19 a zual bik hmun 2nak a hun phan.

Brazil ah mithi a zaza in ruak vuinak hmun pawl cawh cia asi, nizaan ah hin ram chung minung 21,116 cu coronavirus ruang ah an thi cang. Brazil ah hin zawtnak ngei mi 330,000 leng an si bantuk in a zualhma ngai mi ram lak ah 3nak dirhmun a hun phan, South America zong ah a zual bik ram a hun i chuah. Europe ram pawl lonh in Russia cu vawlei cung ah 2nak a zual bik mi ram dirhmun ah a phan, nihin zing tiang ah zawtnak a ngeitu minung 334,882 hmuh an si.

Brazil, Sao Paulo khua hi an zualhma ngai i vawlei leng lei in zohfelnak video nih cu a thluan thluan in ruak vuinak hmun pawl cu Formosa Cemetery ah timh asi. A ruang cu ruah lo tuk in minung an thih sual ah tiah timhcianak an hun ngei cang.

Mr. Ryan nih cun “a fiang mi cu, South Amenrica hi zawtnak a zualhma bik nak hmuh ah a hun i cang. South American ram pawl ah zawtnak ngei mi an karh thluahmah mi hi hmuh kho asi ko. Fiang tein chim ah cun a ram kip nih thin phang cio an si. Cu lak ah Brazil hi fak ngai in a tuar cuahmah” tiah a chim.

Far-right President Jair Bolsonaro cu hi zawtnak pul kongkau a tawlrel mi le ramkhel rian harsatnak thuk chin a chuahter tiah mi tam ngai nih mawhchiat a tong. Ralbawi hlun asi mi Jair Bolsonaro nih minung pakhat le pakhat a hlat tein um (social distancing) a duh lonak, nawl pek lo mi chloroquine hman ding tha peknak le mipi ngandamnak kongkau ningcang tein tuah kho lo in aa tuaihmai mi ruang ah mipi nih an duhnak zong a zorchuk ngai.

Zawtnak a ngei mi le a thi mi taktak hi a tu an thanh mi leng hmanh in asi kho tiah ruah asi bantuk in South America ah a sang bik mi chawleh chawdon nak zong cu a ṭumchuk thluahmah. Hi zawtnak a rak thok ka tein khan Bolsonaro nih ngandamnak lei ṭuanvo ngeitu bawi pahnih cu anti-malarial sii kha chloroquine le hydroxychloroquine bantuk in hman ve ding hramhram in a fial kho hna lo ruang ah rian in a phuah hna. Min thang siibawi thiamthiam pawl nih an kal tak, cu hna pawl aiawh ah ralkap pawl hun ṭuan ter an si.

Cacawn nithum ni ah cun atu lio ṭuanvo ngeitu ralbawi Interim Health Minister Edurado Pazuello nih chloroquine le hydroxychloroquine cu zawtnak fak tuk lo mi pawl ah tam deuh hman ding timi zulhphung a thar cu a hun chuah.

WHO nih cun hydroxychloroquine siseh chloroquine siseh Covid-19 zawtnak hramhnak ding caah hman kho mi asi tiin nawlchuah mi asi lo bantuk in hi zawtnak a khamh kho mi zong asi lo tiah Al Jazeera nih thanh mi in theih asi.

Mike Ryan nih cun “atu lio kan ngandamnak sii-khan le ningcang tein tuahsernak cu Pan America Health Organization nih a tuah, atu lio sii-khan phichuak pawl nih hin hydroxychloroquine kong tling le fiang in hlathlainak an tuah dih hlan poh cu Covid-19 zawtnak thuk le kau in i thlopnak ding caah tha a pe lo” tiah ati. REF:-)DM

LEAVE A REPLY

Please enter your comment!
Please enter your name here