2020 Milu relnak ning ah India hi minung 1.380 billions an um ti asi. Taluk hnu ah India hi vawlei cung ah milu tambik a ngei mi ram an si. India ah Covid-19 zawtnak a hun phan ve tik ah cun Cozah nih rampum huap in lockdown tuah asi ko nain zawtnak an i chawnh ning cang hi a zor ter kho hlei lo. Cu ruang ah minung 118,501 cu zawtnak ngei an si i a thi mi 3,585 an si cang.

India ah a hmasabik zawtnak a ngei mi cu January 30, 2020 ah rak hmuh asi. Nifa tein zawtnak aa chawn mi an karh lengmang bantuk in May 20 nikhat lawng ah zawtnak aa chawn mi 5,611 hmuh asi caah aum bal lo mi thil pakhat ah a hun cang. India i zawtnak aa chawn mi lak ah a cheu hi Mumbai, Delhi, Ahmedabad, Chennai le Pune khua um deuh pawl an si tiah theih asi. May 20 nikhat lawng hmanh ah Delhi khua pakaht lawng zawtnak aa chawn mi 534 an si i rampum huap in a thi mi zapi 132 an si.

Milu 114 million leng an umnak Maharashtra ramṭhen ah May 20 nikhat lawng zawtnak hmuh mi 2,000 leng an si i minung 65 an thi. India Health Ministry lei thawngthanhnak ah cun Maharashtra state ah hin zawtnak a ngei mi 63,624 an si tiah theih asi. A ṭhatnak lei in ruah ah cun zawtnak a ngei mi vialte i zatuak 40 hi an dam ṭhan ti asi.

Maharashtra ramṭhen leng ah Tamil Nadu le Gujarat ramṭhen pawl zong ah zawtnak a karh mi a sang chin thluahmah. Dehli khua ah zawtnak ngei mi 11,088 an um i Tamil Nadu ramṭhen ah zawtnak ngei mi 13,000 an um ruang ah Maharashtra dih in cun mitampi an i chawnhnak hmun a hun cang. Vawlei pumpi huap in cun India zawtnak a karh ning cang hi 11nak a phan. Milu an tam tuk leng ah sifak harsa mi an tam fawn tik ah Covid-19 pul hi cu India caah thil har ngai pakhat ah a hun cang. Ref:-) irrawaddy

LEAVE A REPLY

Please enter your comment!
Please enter your name here