India, Mizoram Aizawl le Arsam ramṭhen Gohati khu um baibal sianginn ah cacawng lio mi pawl cu Covid-19 zawtnak ruang ah mah umnak ram tlung kho lo in an taang lio asi. Cu lak ah Myanmar in a rak kai mi sianghngakchia 32 lak ah 15 cu ṭhipkhatnak Myanmar lei tlung pi an si lai tiah theih asi. Cu sianghnakchia lak ah Chin, Shan, Kachin, Naga le Kawl miphun an i tel i Covid-19 caan karlak chung sianginn khar le rian ṭuan lo an si caah umnak le eidin nak caah harsatnak tampi aum caah an rak tlung ṭhan mi asi.

Mizoram Chin Community Chairman Vnc Vante nih “Atu Aizawl um sianghngakchia pawl kan thlah hmasa hna lai. Nihin zaanlei ah Chin State cozah nih donnak a tuah lai. Gohati lei pawl cu an rak phan rih lo, tlun a duh mi hi 100 hrawng an um rih. India cozah nih zeihmanh a tawlrel rih lo ruang ah an tlung kho rih lo mi asi” tiah a chim.

Hi sianghngakchia pawl cu Mizoram le Chin State cozah tawlrelnak thawng in lak mi an si i an zapi tein Mizoram cozah nih ngandamnak lei check dih hnu ah Aizawl in India-Myanmar ramri Rikhawdar gate tiang thlah an si lai. Cu gate ah cun Chin State cozah nih an don hna lai i quarantine ni 21 an um ter dih hnu ah a dangdang ṭuanvo ngeitu upa pawl sin ah kal ter an si te lai tiah theih asi.

Chin State, Social Affairs Minister Pau Lun Min Thang nih “kan nih lei in cun timh cia kan si cang. Donnak le an rak phanh tik cun ramri ah qurantaine in um ternak hmun zong timh cia asi. Kan rak tlung duh an ti poh ah cun a herh mi kan tawlrel piak ko hna lai. Atu cu cazin pek mi an um rih lo” tiah ati.

Atu bantuk a taang mi baibal sianghngakchia 32 cu May 16 ah khan Myanmar lei rak tlun ding timhtuah a rak si nain India Central Government lei in nawl peknak aum lo ruang ah atu lawng an rak tlun khawhnak asi. Atu a tlung mi lak ah cheukhat cu sianginn an dih cang caah a rak tlung mi an si i a cheu cu zeitik sianginn on ṭhan asi lai timi theih asi lo caah a rak tlung mi an si” tiah theih asi.

India lei kal i rianṭuan mi pawl he pehtlai in Chin ram chaklei hi Indai he a nai te ruang ah ning cang tein rianhlawh a kal mi hi fiangfai in chim awk a har tiah Chin state Social Affairs Minister nih ati. Asinain Taluk ram ah a phan mi Chin mi 693 le Thailand a phan mi 195 zong Myanmar lei rak tlun an si rih tiah Minister nih cun a chim chap.

Cu leng ah India, New Dehli ah hin Chin ralzaam 3,000 hrawng hi Covid-19 zawtnak khamh caan karlak lockdown ruang ah rian ngeilo in an si caah eidin lei an an chambau ngaite tiin New Dehli hrambunh Chin ralzaam pawl sin in theih asi.

LEAVE A REPLY

Please enter your comment!
Please enter your name here