Oklahoma| May 21, 2020 |Chin nu Ester Par cu a sianginn kai nak Southeast High School in cacawn kum 2020 ah cathiam bik in sianginn a dih. A mah pumpak kong le a sianginn kainak kong biaruahnak kan ngei kho. (Biahaltu: Bawi Hmun Lian)

Q1. Nangmah pumpak kong? Na nu le na pa? Laitlang lei nan khua? Zeitik ah U.S nan phak?

Esther Par:  Keimah ka min cu Esther Biak Hlei Par.  Ka nu min cu Ni Khen, a ka hringtu ka pa min cu Ni Uk, cun a ka cawmtu ka pa min cu Tum Tling a si. Nau pakhat te ka ngei i a tu kum in kum sarih a tling. Ka khua cu Mie peng Aive a si i, 2011 November ah khan ka nu he US ah kan rak phan. A tu hi Oklahoma ah kan um i Oklahoma Chin Baptist Church ah member kan si.

Q2. Na Sianginn kai nak le valedictorian na hmuhnak kong? (U.S ah sianginn kai taang zeizat in dah na thok? Nan sianginn ah minung pazeizat dah nan si? Laimi dang tah an um ve maw? tbt)

Esther Par: US ah tangli in sianginn kai ka rak i thok. New Jesrey ah tangnga tiang  ka rak kai i OKlahoma ah Middle School le High School ka kai. A tu high school ka kainak, Southeast High School, hi application school a si bantuk in minung tam kan si lo 900 hrawng kan dihlak ah kan si. Sihmanhsehlaw Bawipa nih miphun dang sinah a ka cawsan i Valedictorian ka ngah kho ve. Hi Valedictorian ngah khawhnak dingah tuah khawh kei zuam mi cu pre-AP classes, AP classes, le concurrent classes te pawl kha tampi in lak khawh kei zuam i freshman (taang 9) in senior (taang 12) tiang ah hin ka class vialte ah “A” lawng te ngah kei zuam. Mah ka tuah mi nih hin ka GPA caah a thathnem ngai.

Q3. Valedictorian si ding hin timh ciammam tein maw na zuam mi a si? Asiloah nangmah zuam in na zuam I Valedictorian na ngah mi dah a si?

Esther Par: Valedictorian hi timhciammam tein high school ka rak kai ah hin kei rak i timh ngam lo. Asianin Bawipa sinah thlacamnenh te tuin high school hi ka rak kai i Junior (taang 11) ka kai lio, a donghnak hrawngah pakhatnak ka ngah kha kei theih. Cu hnu tu in, Valedictorian ngah khawhnak hi a hlei deuh in kei zuam hi a rak si.

Q4. Valedictorian si khawh nak ding ah hawi nak in cazoh lei ah caan na pek nak le zei dangdang zongah a hlei in na zuamnak te pawl theih kan duh ko.

Esther Par: Valedictorian ngah khawhnak ding ah, hawi nak in kei zuam deuh nak a um tuk lo. Ca zong hawi hlei in ka zoh kho lo, aruang cu zaan ah part time in rian ka tuan pah. Cun, biaknak lei ah ka caan tam deuh ka hman caah ca tuah ding ka ngeih mi cu sianginn deuh ah hin tuah khawh kei zuam. Asinain class ka lak mi tu kha a sangdeuhmi (advance) class le concurrent tu kha tampi lak khawh kei zuam hna. 

Q5. College kai colh na tim maw? Khoika ah dah kai na timh? Zei bantuk lei dah na kai lai?

Esther Par: College hi Southern Nazarene University ah fall semester in kai colh kei tim. Kai kei thimhnak college hi private christian university a si i Nursing major lak pah in Mission lei zong cawn chih pah kei tim.

Q6. Scholarship na hmuh mi te pawl theih awk a ttha mi um ahcun theih kan duh ko?

Esther Par: Scholarship hi College kai kei timhnak nih $13000 kum khat ah pek ding ka si i Oklahoma Promise timi state nih pek piak dingmi hi kum khat $5600 a si.

Q7. Valedictarion pakhat si khawh nak dingah na nu le na pa le na chungkhar nih an in ttanpi ngai lai tiah ka ruah? Zeitluk in dah sianginn na kai chungah thazang an in pek?

Esther Par: First generation college kai dingmi ka si caah, ka nu le ka pa nih timhlamhnak sangpi ngeih piakin thlacamnak lei in siseh thazaang pek nak leiin siseh an ka ttanpi.

Q8. Hi dirhmun phanh a duh mi hna caah cathiam maw a biapi? ca zuam? Nangmah na ton ning in?

Esther Par: Hi dirhmunh phanhnak ding caah kei nih ka hmuhning ah cun pakhatnak ah thlacamnenh bu tein le Pathian i bochan bu tein sianginn kai a biapi. Cun cathiam a rak piapi ve ko nain zuamnak ngeih bu tein sianginn kai hi an rak herh tuk mi a si.

Q9. Mino te cu na si rih I, Biaknak lei ah mino siloah, Sunday school lei hna ah na teltum kho pah maw? Dawnkhan tu a si tiah na ruat maw?

Esther Par: Biaknak leiah kan nih miphun cu ai pehtlaimi kan si bantuk in kei zong kan biakinn ah worship leader pakhat le CE sayamah a tuan cuahmah mi ka si ve. Ka caan hi tam deuh cu biaknak leiah pek khawh deuh tu kei zuam. Asinain, ka sianginn kai nak lei ah hin cun an ka dawn tiah ka hmu lo.

Q10. Malaysia lei in a ra ve mi na si ti kan theih. Malaysia CSO ah sianginn zong a kai ti kan theih. Malaysia CSO sianginn na kai mi zeitluk in dah na tthathnempi?

Esther Par: Malaysia kan rak phak ah hin, Cheras CSO ah grade-1 ka rak kai. CSO nih hin tampi a ka bawmh, Laica zong ka rak thiam nak a si. Cun Math, Science, le English te hna zong ka cawn hna i US ka phak i sianginn ka rak kai tikah CSO i ka rak cawn mi nih khan an rak ka bawmh ngaingai hna.

Q11. Nangmah pumpak lawng siloin, kan Chin miphun min na that ter. Kan in lawmhpi tuk. High School a kai rih lai dingmi na nau le deuh sin ah na siaherh bia rak kan hrawmh ve law?

Esther Par: Hi bantuk dir hmun a ka phak tertu Pathian sin ah kei lawm. Cun, Laimi tampi zong nih nan ka lawmhpi caah kei lawm tuk. Hi dir hmun phak lai hi ka rak i ruahchan ngam bal lo. Sihmahsehlaw, refugee dirhmun in le Aive khua fa tein a ra mi keimah a ka cawisang tu cu kan Pathian, a ngan tukmi le zeizong vialte a sertu a si. Cucaah, ka nau le sianginn a kai cuahmah mi sin zongah chim ka duh mi cu, zeithil na tuah nak kip ah Bawipa i bochan law, Bawipa sunparnak langhter kha i zuam zungzal ko. Pathian nih a lamkip in nangmah le keimah zeihmanh a si lomi kha a sunparnak langhter dingah a kan hman ve ko. Bawipa sin lawnglawng ah hin fimnak, teinak, le lawmhnak a um.

Q12. COVID-19 ruang I inn ah I erh cio a si lio ah nang zei hna dah na tuah bik?

Esther Par: COVID-19 lio ah inn ah ka tuah bik mi cu ka nau le he caan kan hmang i zuk kan suai, laam thar kan cawng. Cun, Korean Drama zoh nak in le ka hawi le pawl he zaan ah Bible study tuah nak in kei ka caan ka hmang ve.

Q13. Na manh caan ah zei dah na tuah tawn (Na hobby)?

Esther Par: Kei manh caan ah tuah ka huam bikmi hna cu hlasak, laam (dance), le volleyball beng hi an si.

Q14. Atulio ah Chinmi chungin a ho dah na uar (role model zong a si kho) bik i zeiruangah?

Esther Par:  Tulio kan Laimi zohchunhawktlak tampi hna lak ah hin kei nih kei zohchunh bik mi ka role model cu Saya Sailo Thang a si. A ruang cu Pathian nih a hman i, Pathian hmannak thawngin minung tampi nih khmahnak thawngtha an cohlan. Ahleiin mino tete nih an nun an i thleng. Cun, U Sailo cu ngakchia cawnpiak a thiam i, Pathian nih a hmanmi a si.

LEAVE A REPLY

Please enter your comment!
Please enter your name here