Prsident Trump nih Hydroxychloroquine cu coronavirus ralrinnak caah ka din tiah a chim. Sii lei mifimthiam pawl nih a him mi asi lo tiah ralrin nak an chuah cuahmah ko bu ah a din mi hi asi.

Raifanh le Rheumatoid Arthritis zawtnak pawl hramhnak ah hman mi hydroxychloroquine a din lio mi kong cu White House thawng fiang thanhnak ah a chim. Hi sii ka dinnak cu zarhkhat leng asi cang, zeihmanh zong apoi lo tiah a chim i an lau ngaite ti asi. Hydroxychloroquine nih coronavirus a thah kho timi hmuh mi le fianhnak a um rih lo mi asi. Cu leng ah a herh lo in din ah cun lung (heart) ca hmanh ah ral asi tiah sii lei mithiam pawl nih ralrin pek mi asi.

President Trump hi kum 73 asi cang. Cacawn nikhat ni ah tuah mi meeting ah hydroxychloroquine kong cu a hun chim mi asi. “Hydroxychlorocoquine cu mi minung pa zeizah nih dah an din timi hi nan theih ahcun nan lau kho men. Hmailei fong in rianṭuantu pawl nih din asi, kei zong ka din lio cuahmah” tiah a chim.

Hydorxychlorocoquine din a ṭhatnak a ruang na chim kho lai maw tiah an hal tik ah a ṭhahnemnak tampi aum tiah President Trump nih cun a chim. Mipi sin in hi sii a ṭha tiah chimrel mi tampi ka hmuh tiah ati. “Hi sii a ṭhatnak thawng tampi ka theih. A ṭhahnemnak aum lo tiah ti sihmanhsehlaw hi kan din ruang ah sungnak aum lo tiah chim ka duh” tiin President Trump nih cun a chim.

White House um minung cheukhat sin ah coronavirus hmuh an si nain President cu avoi tam naw test a tuah peng ko i zeizawtnak sining hmanh a cuang lo tiah cacawn nikhat ni ah cun fehternak a tuah chap. Cu lengah Zinc in tuah mi vitamin zong ka din i azithromycin zong voikhat cu ka hman cang tiah a chim chap. White House siibawi pawl ruahnak pek thawngin maw na din tiah an hal tik ah “keimah lungtho tein ka din mi asi” tiah President Trump nih ati. White House siibawi asi mi Sean Conley nih cun “President cu a ngandam ko, zeibantuk zawtnak sining hmanh a lang lo” tiah thawngthanhnak ah cun a chim.

US Navy ralbawi nih cun “hydroxychloroquine he pehtlai avoi tampi biaruahnak kan ngei hnu ah a ṭha lomi nak in a ṭha mi a tam deuh lai tuah ruah asi” tiah ati. FDA nih a luancia mi thla ah thanh mi thawngthanhnak ah khan cun hydroxychloroquine cu a him, ṭhahnemnak a ngei ko timi a fiang kho lo tiah an thanh cang mi asi. Covid-19 mizaw pawl in an lungtor mi cung hmanh ah harnak a pek kho tiah thawngtheih mi pawl chirhchan in ati.

Cheukhat mizaw caah a herh ah cun hman ding in FDA nih nawl pek chung asi nain siizung lei nih nawl pek mi silo in mah pumpak tein din mi cu FDA nih a doh i ralrinnak zong a pek mi asi. Hydroxychloroquine din ah a ṭha le ṭha lo timi kongkau dothlatnak an tuah mi zong a lam tanṭim lawng asi rih.

USA ah hin minung 1,500,000 leng coronavirus an ngei cang mi minun 90,000 leng an thi cang. Hi virus khamhnak ding le zeitindah thlopbul ning asi lai timi he pehtlai in sii le zawtnak hramhnak ningcang aum rih lo tiah CDC nih cun ati.

Hydroxychloroquine ruang ah a chuak mi ṭhatlonak kong pawl cu President Trump nih a lak lo i “atu lio ka chim kho mi cu ka zei hmah ati lo, ka dam ṭha” tiah ati. “Ka theih mi a ṭha lo an timi pawl zong hi keimah a ka doh tu pawl nih ningcang tein dothlat mi silo in an chuah mi lawng te asi” tiah Trump nih cun ati. Cozah nih on mi ralkap hlun pawl umnak siizung nih Covid-19 mizaw kongkau dothlatnak an tuah mi ah hydroxychloroquine cu a ṭhahnemnak aum lo leng ah a thi mi hmanh a tam ter chin tiah hmuh asi. President Trump nih cu dothlatnak kha a chim hnawh chan mi tiah ruah asi.

Hydroxychloroquine he pehtlai in a ṭhatnak kong tampi ka ngei. Hi sii kan din ruang ah sunghnak aum lo tiah thawnglatu pawl sin President Trump nih a chim. Siibawi te bal nih cun hydroxychloroquine din ruang ah lung ningcang lo in sinak, mah le mah i thahnak le thin lei zawtnak …tbk pawl a chuak kho tiah a phunphun in a um kho tiah an ti.

Rahfanh sii din mi kong he pehtlai in President Trump le a rem lo ngai bikmi Congress Woman Nancy Pelocy cu CNN nih biahalnak an tuah tik ah President i a kum le a pum sining telh lo in a chim kho hrim lo. “A nih cun kan President asi. Sii lei mifimthiam pawl nih fehternak an tuah rih lo mi pawl cu din ding asi lo. A hlei in a kum le a pum sining zoh tik ah a nih hi tlawmpal zong a thau luan mi asi caah a tuah ding hrim asi lo” tiah ati.

Nikum ah tuah mu kumfatin medical check up tuah lio ah khan President Trump atung cu 6’3” a sang i pumrit 243lb asi caah a pum le a tung tuak tik ah BMI (Body mass Index) 30.4 asi caah tlawmpal a thau luan mi phu ah a tel tiin White House siibawi nih ati.

Cherchan:-)BBC

LEAVE A REPLY

Please enter your comment!
Please enter your name here