Dallas, Texas|May 16, 2020| COVID-19 Zawtnak nih vawleicung miphun dihlak fahnak a pek hna I, Chinmi kan sin zongah a phan ngai cang. USA ram Texas ramkulh Dallas veelchum khuasa Chinmi hna chung zong in COVID-19 zawtnak an von karh ngai cang.

Tutan zong ah Dallas ah khuasa mi Salai Za Thawng Lian le Van Bawi Cung hna zongnih an si khawh tawk in ei le din cawk in COVID-19 zawtnak a ngei mi hna sinah pekchanh nak an ngei kho.

Salai Za Thawng Lian le a chungkhar

Salai Za Thawng Lian hi Voi hnih tiang mizaw hna inn ah kal in eidin pek chanh nak a ngei cang. A voikhat nak hi May 9 ah a rak si I, chungkhar dawng 4 sinah, Lai arsa 2 cio a rak pek hna. Amah pumpak tein a cawlcanghnak ahmu mi hawikom cheukhat nih Gofundme tuah dingin ruahnak an pek hnu in, Gofundme tuah hram a thok. “Edin pekchanh nak ka tuahmi kong facebook ah ka tial. Cu ka ca ahmu mi hawile le thei hngaltu cheukhat nih tel kan iduh ve Gofundme tuah law kan rak I tel cio lai an ka ti i, Gofundme ka ser” tiah Salai Za Thawng Lian nih Gofundme a tuahnak kong ah a chim. Fund an pek mi chungin tuni (5/16/2020) innchungkhar (11) sinah edin pekchanh nak a ngeih tthan nak kong zong a chim. Gofundme in pekmi phaisa a taang rih mi in hmailei ah innchungkhar (10) sinah eidin pekchanh nak tuah khawh a si rih lai tiah a zumhnak zong achim chap. Avoihnih nak eidin pekchanh mi hna ah Laiarsa, Ensure, Gatorade, Hand sanitizer, face mask (hmaihuh) le tissue hna an si.

Zeiruangah dah hitin hin mi bawmhchanhnak tuahduh nak a ngeih? Hi biahalnak kongah Salai Za Thawng Lian nih “Ka ngakchiat lio i ka nu a rak zawtfah lio ah innpa, chungkhar, hawikom le khrihfa ttha hna nih rawl an rak chanh tawn. Hi bantuk in kanu cungah thiltha rak tuah hna hlahseh law kanu khi mahtluk a lung a thawng hnga maw timi keimah le keimah biahal nak ka ngei tawn. Ka ngakchiat lio ka rak hmuhtonnak nih hi bantuk in mizaw hna sinah eidin va chanh duhnak thinglung a semnak muru a si. Mizaw hna caah tam hmanh ka tuah kho lo nain ka tuah khawh chun te ka tuah mi khi a si” tiah a chim.

Van Bawi Cung le a chungkhar

Van Bawi Cung zong innchungkhar (7) sinah tuni (5/16/2020) ah eidin pekchanh nak a ngei kho ve hna. A nih a pekchanh mi hna hi Gatorade, Facang, Arti, Chiti, Khachuan tibantuk an si hna. Van Bawi Cung le a chungkhar hna zong an mah pumpak in thilri an zalh I, mizaw hna inn cio te ah an va pek hna. “A cheu cu innka hmaiah kan chiah ta I, kan kal tak ko. A cheu tu cu phone in kan chawnh hna I, inn ka hram ah thilri kan chiah mi kan theih ter ta hna” tiah thilri an va pek chanh mi hna leeng ah an chiah ta nak kong Van Bawi Cung nih a chim.

Zeiruangah dah hi ti hin pekchanh nak a tuah? Van Bawi Cung nih, hi thil hi zei ruangah dah a tuah ti mi biahal nak kong ah, “Hi thil kan tuah mi hi chim awk tlak a si lo. Ka theihhngalh mi ah a zaw mi an um i, leeng an chuah khawh lo ning le an lungretheih ning ka hmuh tik ah mizaw ka theih mi hna pawl ka lungah an chuak. An zawtnak caah zeihmanh ka tuah khawh mi um lo caah ka ti khawh tawk te a si mi eidin pekchanh nak hi ka tuah awk hrimhrim a si timi ruahnak le mizaw hna an zawtnak ah kan in tuar pi hna, dawtu tampi nan ngei ti theihter nak khi a si ko” tiah a chim.

Tuni hi Dallas velchum cu nikhua a chia/ ruah a sur I, eidin pekchanh a kal mi hna hi ruah sur zong nih a kham hna lo. Zohchun tlak taktak mi riantuan nak a si.

A tu lio ah Mizaw hna caah mah le ti khawh tawk cio in a pumpe mi dihlak upatnak pek cio a si. Zapi nih theih loin nifatin a cawlcang mi zong nan tam pi lai. COVID-19 Zawtnak kongah a si khawh tawk in a cawlcang mi dihlak upat nak kan pek hna. An chimttheo bang, “Zeizat ti a biapi lo, thinlung a biapi ti a si”.

#ChintoChin #Inspired

LEAVE A REPLY

Please enter your comment!
Please enter your name here