Taluk ram he ramrih saupi aa peh leng ah milu 97 millions asi mi Vietnam ram ah Covid-19 mizaw 300 leng lawng an um i a thi mi zong um asi lo. Thla khat leng a rau hnu ah zawtnak a ngeithar mi zong um asi lo caah atu cu khenkham mi pawl cu on piak ṭhan asi thluahmah cang.

Milu tampi an i chawn i mitampi an nunnak a liam chuahmah mi hawidang ram pawl he an i dannak a ruang cu a hlankaan tein thimhtuahnak caan zabui mei can lawng aum timi kha Vietnam nih hin a rak fiang i cu caan ṭha cu a hun i lak kho manh caah asi tiah mifimthiam pawl nih an ruah.

Vietnam nih cun adih heu a tlawm i santlai asi ko nain minung thazaang tampi hman asi ve. Ramdang pawl nih Vietnam i a tuahser mi hun i zohchun le i cawn ding tu ah cun a caan tlai tuk cang.

“Hmuh bal lo mi zawtnak thar le ṭih a nung mi hibantuk virus pawl a hun chuah ah cun atu bantuk fak nawn in nawlchuahnak hi a ṭha” tiah Vietnam he ngandamnak lei rianṭuan ṭi mi Dr. Portlet (Harvard University) nih cun ati. Kan ram ah Covid-19 nih a kan phanh te tik ah cun zawtnak a va zual tuk lo hmnah ah ram i ngandamnak lei sining nih hin a chei lai lo timi cu Vietnam nih ahun i fiang ngai caah a hlan kan in timhtuahnak le fak ngaiin rengh kha a ṭha bik tiah biakhiahnak an rak ngei.

January 2020 ah khan Vietnam ah zawtnak a ngei mi pakhat hmanh hmuh a rak si rih lo. Cu lio ahcun Wuhan hmanh ah a thi mi minung 2 lawng an rak si rih. Cu lio caan tein cun Vietnam nih hi zawtnak thar ralrin ding caah fakngai in rengh le nawlchuahnak pawl he hi coronavirus ral khamhnak ding a rak thok cang.

January 23 ah khan a pakhatnak mizaw cu hun hmuh asi, Hochiminh khua aum mi a fapa sin ah a va tlawng mi apa siin rak hmuh asi (Wuhan ram pal pah in a rak phan mi asi). Mizawt pakhat an hmuh thok in khan timhtuahnak rak ngeih cia mi pawl cu thok colh a rak si.

“Rangtuk le tuan tuk in cu thil pawl an tuah tik ah ningcang lo tuk asi tiin rak hmuh sual kho a fawi nain a taktak ah cun hihi a rak herh ngaingai mi asi timi kha a lang” tiah  Hochiminh khua um Harvard University Health Research Dept. director Professor Guaitret nih ati. An nih hi atu bantuk chawnh a hmang mi zawtnak pawl khamh kho nak ding caah cozah he rianṭuan ṭi mi aphu an si.

Hawi ramdang pawl nih a thla in caan lak i tuah asi mi tlunkal mi khenkhamnak, zawtnak akarh ning cang pawl ṭha tein zohfelnak le Taluk ram he an i pehnak ramri pohpoh le a biapinak hmun pawl ah ngandamnak check nak …tbk pawl cu Vietnam nih a hun thok kho colh. January thla dih Chinese New Year hlan tein khan sianginn pawl cu May thla tiang khar siseh tiah nawl chuah asi. Zawtnak a ngeimi pawl dothlat le khomhsuat kho nak ding caah mino tampi thazaang cu a hman i raldoh bang in ṭan a la.

“Vietnam cu pul tawlrel ning ah hmuhtonnak a ngei cia bal cang mi ram asi” tiah Prof. Tret nih cun a ti. Kum 2003 ah khan SARS le H5N1, 2010 ah khan Measles le Dengue Fever dohnak pawl arak tuah bal. “Ramṭha pawl nak in Cozah he mipi he hibantuk zawtnak doh ningcang hmuhton mi tampi an rak ngei cang i an i biatak. Zeitin dah ṭanlak asi lai timi an i fiang tiah a chim chap. March thla laifang hrawng in khan ramdang in a rak tlung mi le zawtnak a ngei mi he tonghthamnak a ngei mi poh cu cozah nih ni 14 a dang tein a um ter hna.

Qurantaine hmun pawl hi a ṭha, a thiang pi cu sihmanh hlah seh law adih mi vial te a tam deuh cu Cozah nih pekpiak asi. Vietnam hi a him bik tiah a ruah ruang ah Australia in a rak tlung mi nu pakhat nih “zaankhatnak ah cun pher pakhat lawn gaum. Chantling le puan hmanh aum lo” tiah BBC sin ah a chim. Ni lin khuasa lak ah Fan te hmanh aum lo ti asi.

Zawtnak a ngei mi a chuek cu an zawtnak sining kha a lang lo caah khan lunghrin mi tampi cu a dang tein chiah kho hi a biapi tiah Prof. Tret nih cun a chim. Cu bantuk Qurantaine in um ter an si lio caan ah a zaw mi he zaw lo mi he tiah virus test tuah asi. Hibantuk test tuah rak si hlah she law atu an hmuh mi Covid-19 mizaw lak ah 40% hrawng hi i zawtnak an ngeih asi hnga lo” tiah a chim chap.

“Zawtnak sining lang lo in zawtnak a rak ngei mi pawl khenkham kho nak ding caah cun atu Vietnam nih tuah mi lam pakhat lawng aum” tiah Prof. Tret nih cun a chim. Cu leng ah “An mah kha hibantuk rak tuah si hlah seh law hmun kip ah an vak lai i zawtnak pawl cu kha ning khan i chawnh dih a va si hnga” tiah ati chap.

Covid-19 ruang ah aho hmanh an thi lonak a kong he pehtlai in hrilhfiahnak cu a tanglei bantuk in asi.

Ramdang in a rak tlung mi tam deuh asi mi sianghngakchia, vawlei cung hmunkip khual tlawng tu pawl, chawkhel tu pawl tamdeuh hi mino an si a ngandam mi an si.  Cu caah an mah tein hi zawtnak hi an tei kho ko. An mah ruang ah kum upa pawl le rualchan pawl harnak an ton ter duh hna lo. Cu bantuk asi caah cozah lei zong nih mitlawm deuh caah cun tlamtling tein sii le aii pawl he zohkhenhnak he ṭha tein a tuah piak kho hna.

Vietnam ah rampumpi lockdown tuah asi lo nain hmun le khua thim in lockdown cu tuah asi. February thla chung ah khan Hanoi khua chaklei Sanloi ah minung zeimawzat te zawtnak a ngei mi an hmuh ruang ah cu pawngkam aum mi minung thawng leng cu lockdown an tuah colh hna. Cu ve bantuk in cun khualipi pawng um Haloi sang i minung 11,000 le siizung rianṭuan tu pawl le mizaw pawl zong tuah an tong ve. Zarhhnih chung an dam thiang maw thiang lo timi a fiang hlan lo poh cu a ho hmanh luhchuahnak nawl pek an si lo.

Zawtnak ngei mi an hmuh chap asi le cu bantuk lockdown cu a thok in an tuah ṭhan. Cu bantuk asi caah hmunhma tam deuh ah cun virus test tuah hau lo in zawtnak cu khamh cia arak si. A hramthok ah khan cun ral atam ngai mi tuahsernak tiah ruah arak si nain a taktak ah cun thil ṭha a rak si” tiah Prof. nih cun ati. “Zawtnak a ngei mi kha ṭha tein khamh kho an si” tiah a chim chap.

Atu bantuk tlamtling khonak ding caah abiapi bik cu mipi teltumnak asi. Cozah nih mipi sin ah ṭha tein pehtlainak le hrilhfiahnak a ngei i mipi pawl an i biatak ding in a tuah kho tuah Prof. nih cun a chim chap. Zawtnak a hun i thok ka in khan zeitindah mah tein runven le khamh kho asi lai timi cu SMS in mipi sin ah kuat dih asi. Atu pul cu mipi nih an theih i ralrin khonak ding caah tiin ral a rak tho lio i rak hman mi hmanthlak pawl le “kan zapi ral cu doh uh sih” timi thawngzaamnak pawl cu hman ṭhan asi.

“Kan ral cu kan doh ṭi hna lai timi nih khan zapi hmun khat tein ṭuanrial ding asi” timi lungput a chuah ter. Vietnam cozah nih nawlchuahnak he hi thil hi a tuah ko nain cucu a herh mi asi caah an si khawh tawk in an i zuam asi. Tlamtlingnak zong an hmuh caah mipi humhimnak ding caah zeipoh an tuah mi asi tiah hmuh asi caah mipi zong nih nawl ngeihnak an ngei” tiah Prof. Tret nih a chim.

Khuaruah har in zawtnak a ngei mi an tlawm tuk ruang ah Cozah nih chuahmi cazin pawl hi zumhawktlak asi ngaingai hnga maw tiah lunghrinnak zong a chuak len. Sihmanhsehlaw sii lei mifimthiam pawl le a dangdang sin ruahnak hal asi tik ah hi kong cu lunghrin ding aum lo tiah mi tam deuh nih cun an ti. Prof. Tret a ṭuannak hi Chawnh a hmang mi zawtnak hramhnak Siizung ah an umnak asi. “Thawngthanhnak tuah lo mi mizaw pawl, hmuhthieh lo mi mizaw pawl le cozah nih thieh lo mi mizaw pawl va um sual hna seh law cu pawl cu hibantuk siizung ah an rak phan hnga. Atu cu kha bantuk pawl hmuh an si lo” tiah Prof. nih a ti.

An nih phu nih hin virus test 20,000 hrawng an tuah. A phichuak cu cozah nih chuah mi he khan a khat tiah an ti. “Cozah thieh manh lo mi mizaw va um sual hna hmanh seh law cucu zawtnak sining a lang lo mi an si ruang ah asi lai tiah zakhat ah zakhat ka zumh” tiah a chim chap.

Vietnam lutlai hruaitu pawl i cung le tang hruainak phunlam ruang ah hin nuhrin covo buarnak hna aum sual hnga maw timi thinphannak cu aum len. “A hlat nawn in um le hmun dangdang cio in um ding timi biatak tuahser asi tik ah Vietnam nih hman tawn mi pawngkam innpa chakthlang pawl sining kha ṭuanvo ngei tu pawl nih zoh le hlat i cunglei ah thawngthanh cio asi” America ram um nuhrin covo kongkah zohhlat tu Fel Robertson nih cun a chim.

“Nuhrin covo an buar lai timi lunghrinnak cu aum lo. Cozah nih thawngla tu pawl a hip hna ti zong thieh asi lo” tiah a chim chap. Vietnam ram an tuahsernak zoh tik ah a hlankan tein ralrin nak ngeih hi zawtnak asi hnu i thlopnak in a ṭha deuh zungzal leng ah a dihheu mi zong a tlawm deuh tiah Prof. Tret nih cun ati.

Ref:BBC

LEAVE A REPLY

Please enter your comment!
Please enter your name here