Rakhine ram ral ruang ah a thi mi mipi lei silo in Kawl ralkap lei in a dir caah tlangcung miphun kongkau he pehtlai in State Counsellor Daw Aung San Suu Kyi cung ah zulhnak a zorh tiah KNU Concerned Group nih achim. KNU Concerned Group timi hi Cozah he kahdaihnak minṭhut tu Karen National Union(KNU) kha aa dang mi asi.

KNU Concerned Group lutlai hruaitu asi mi P’doh Naw Zipporah Sein nih “Rakhine ram chung Kawl Ralkap le Arakan Army(AA) karlak raldohnak ah Kawl ralkap lei nih mipi cung ah lunghringnak a ngei i ningcang lo in tlaihnak, hremnak leng ah an nunnak dih tiang in tuah le vanlawng in kahnak ruang ah mipi tam lak te hmunkhat ah an thi lengmang mi he pehtlai in daizir tein aum caah atu bantuk in Daw Aung San Suu Kyi cu kan soisel mi asi” tiah ati.

Hlanlio ah KNU hruaitu lutlai pakhat a rak si bal nain atu ah a dang tein aum cang mi P’doh Naw Zipporah Sein nih cun “a mah cozah a hun si hnu ah hin a cung ah zumhnak a zor chuk. Kawl ralkap lei in a humhak hna. Kan hmuh, kan theih. Mipi hi tluk an tuar in mi kong ah chim rel a herh mi pawl pakhat hmanh a chim lo” tiah ati.

“Nu hrin covo an buar mi, khua pawl mei an khangh ruang ah a tli zaam mi hna, vanlawng in kahnak an tuah ruang ah mipi an thi mi pawl hi tuah lo ding asi tiah a chim ding asi. Mipi an tuartuk cang tiah a chim ding asi. Atu cu Dictatorship tha petu ah a hun i chuah” tiah ati.

March in May, 2020 kar ah hi raldohnak ruang ah a thi mi zapi minung 110 leng an si cang i hliam a tong mi zong 90 hrawng an si cang. 2018 raldohnak thok in nihin tiang ah lunghrin ruang ah tlaih i hremnak a tong mi hi minung 200 leng an si i cu lak ah minung 15 hi hremnak temh in ruang ah an nunnak a liam tiah a thi mi hna chungkhar pawl le Rakhine ram MP pawl nih cun an ti.

Tilawng pakhat cung ah Kawl ralkap nih Rakhine ram khua mi minung 5 cu an kut hri ṭem bu in an velh hna lio zuklak mi pakhat cu kan hnuzarh ah khan social media cung ah a rak chuak. Hi minung 5 hi Kyaut-Seik khua, Pone-Nar Kyun in rak tlaih mi an si. Hi thil a cang mi hi a dik taktak mi asi ko tiah Kawl ralkap lei nih an dothlat kho caah hi tuahserhnak ah a tel mi pawl cu biaceihnak tuah i sualphawt an si lai tiah theih asi. Hi kong he pehtlai zong in Myitkyina khua hrambunh asi mi Kachin National Congress Party zong nih duhlonak ca zual an rak chuah.

Union of Myanmar ramkulh chung um miphun pi 8 (Kachin, Kayah, Karen, Chin, Burma, Mon, Rakhine, Shan) nih hin ramkelh lei chambaunak ruah ah remdaihnak caan sau pi tiang aum kho rih lo hmanhseh law kan vawlei, kan ti hmunkhat aa hrawm mi miphun kan si rih caah tu bantuk raldohnak nih a chuah pi mi hremnak pawl nih hin laihlum miphun asi mi karlak ah chungkhar rawkral i an ṭian bantuk lei ah a kal cuahmah tiah an langhter.

Chin ram, Paletwa telh in Rakhine ram raldohnak he pehtlai in April 21 ni Daw Aung San Suu Kyi minṭhut in chuah mi avoi 1 nak ca thanh mi ah “mipi an thihnak le hliam an tonnak cung ah ngeihchiat pinak le hi remdaih lonak hna hi a rauhlan ah an ṭian dih lai cozah nih a zuam cuahmah lio asi” tiah a tel. Asi nain cu ca ah cun “kawl ralkap pawl nih ralṭha ngai in ral an doh mi cung ah lunglawmhnak a langhter” ve caah cu ca cu cohlan kho phun asi lo tiah P’doh Naw Zipporah Sein nih cun a soisel.

AA he alliance asu mi Ta’aung National Liberation Army (TNLA) i thawngthanh lei ṭuanvo ngeitu Major Mai Aik Kyaw zong nih “Rakhine raldohnak ruang ah mipi an tuar mi kong he pehtlai in Cozah lei nih ṭuanvo an lak a herh” tiah ati. “Cozah nih zei cukha a chimnak le remnak tuah mi aum lo, mipi har an tuan mi hi cozah ṭuanvo asi. Remdaih biaruahnak a tlamtling lo ruang i ral a tho mi kha cu phun dang asi ve ko. Mipi har an tuar mi hi cu cozah nih ṭuanvo lak a hau” tiah Major Mai Aik Kyaw nih a chim.

Rakhine ram raldohnak ruang ah mipi an tuarin mi cung ah cozah lei in zeimawzat chim relnak le dirkamhnak, kaphnih ralkap bu lakkar zong ah remhchunnak a um lo caah Rakhine mipi thinlung a kekkuai ngai tiah Rakhine Ethnics Congress (REC), Chairman U Shwe Baw Sein zong nih a chim. “Ralzaam pawl umnak ah a har bik mi cu thli le ruahlak ah him tein um nak, din ti thiang hmuh khonak caah cozah lei sin ah voitam ngaite bawmhnak kan hal hna nain zei an kan leh mi aum lo. Cozah cung ah bochannak le ruahchannak a tlau cang” tiah a chim chap.

U Shwe Baw Sein nih cun “Mipi nih cozah cu a zungzal in a bochan mi asi. A zumh fawn. Sihmanhsehlaw cozah nih mipi cung ah a ngeih mi a lungput cu a dik ve a hau tiah lung awṭawm in ka um. Zumhawktlak cozah asi lo caah lung dong ngaingai asi” tiah ati.

Daw Aung San Suu Kyi lutlai asi mi National Recounciliation and Peace Center (NRPC) nih hin AA tel in Nother Alliance tlangcung hriamtlai bu 4 he hin bilateral ceasefire agreement tuah kho ding in chimrelnak tuah lio asi nain a tlamtling mi aum rih lo. Cubantuk cun March 23 ah khan Ministry of Home Affairs nih AA cu ralhrang an si tiah thawngthanhnak a tuah bantuk in Kawl rakkap zong nih an ci kan hmih hna lai tiah a chim ve._Cherhchan_irrawaddy.

LEAVE A REPLY

Please enter your comment!
Please enter your name here