Myanmar ram ah atu lio Covid-19 zawtnak he pehtlai in ralrinnak tuah le ningcang tein khenkham kho ding in le remdaihnak caah tiin May 10 in August 31 tiang kahdaihnak siseh tiah Kawl ralkap lei nih thawng an thanh.

Sihmanhsehlaw cu lak ah ralhrang timi sining ah chiah asi mi pawl le raldohnak hmunhma cu atel lo ti asi. Cozah nih ralhrang sining ah chiah mi Arakan Army (AA) le kawl ralkap an i doh cuahmahnak hmun pawl ah hin Rakhine ram le Chin ram (thlang lei) in Paletwa an i tel.

Vanlawng in faklakte i kahnak a cang lengmang nak Paletwa hrawng ah cun May 10 khan raldohnak thawngpang adai ngai tiah theih asi. Kawl ralkap nih Kahdaihnak thawngthanh asi ko nain AA le kawl ralkap an dih dohnak hmun asi caah kan i lawm kho hlei lo ee tiah Paletwa ralzaam pawl nih a chim.

“Khua kan um ah cun vanlawng pawl an rak zuang i an kan kah. Inn pawl zong mei an kaang. Kan mah zong kan tli ve, atu hi Paletwa High School -1 ah kan um lio asi. An kan kah tik ah aa hliam mi zong an um len. Atu tiang sii in an i hramh lio asi. Kawl ralkap lei nih cun a khua kan i palh sual tiah an ti” tiah aluan cia mi ni thumli hrawng vanlawng in kahnak ruang ah ralzaam asi mi Daw Aung Htin (nan-wah-chaung khua) nih achim.

Paletwa khua pawng um Meik-Sar-Wah khua pathum, Wat-Mah khua le Pyein-Tein khua pawl zong ah Kawl ralkap lei in vanlawng he kahmi ruang ah khuami 21 an thi i minung 28 zong hliam an tong. Cubantuk kah atong lengmang mi khua pawl hi Chin miphun pawl an umnak khua deuh an si.

Hibantuk tanglei le cunglei he kahnak pawl ruang ah Mii chaung kiangkap aum mi khuami pawl cu an zapi tein Sami khua ah an zaam dih. Curuang ah Sami khau i ralzaam pawl umnak hmun ah hin khuami pawl 2,000 hrawng an um tiah bawmchantu pawl siin theih asi. Sami khua hi Mindat le Matupi khua he an i naih caah bawmchantu pawl zong nih hun phanh kho deuhnak hmun asi.

Chin ram, Paletwa khua pawng ah Kawl ralkap le AA hriamtlaibu karlak fak nawn in raldohnak aum caah April 22 zaanlei sang Myanmar Ecomomic Bank (Paletwa) hauhruang chung ah bomb nih atlak hna ruang ah minug 3 an thi tiah Chin State Government lei nih an chim.

Culawng siloin April 7 khan Paletwa pawng ah ral an i doh, Kawl ralkap lei in vanlawng he kahnak an tuah ruang ah mipi 7 an thi i minung 8 hliam an tong leng ah inn pawl zong an kaang dih tiih Khumi kongkau ṭuanvo ngeitu U Kyaw Nyein (Khumi Affairs Coordination Council-KACC) nih achim.

Atulio Paletwa sining cu hmundang lei bawmhnak thawng in facang tun zeimawzat aphan mi dah ti lo cun eidin le thilri tlunkalpinak hman mi lam Paletwa-Kyaut Taw ti lam cu March thla tein khan phih asi caah eidin lei chambau ngaingai in kan tong. “Facang tun cu aphan cang. Nain facang lawng in cun asi kho dih lo caah adang herhbau mi zong an um len ko. Paletwa khua chung zong ah khuate lei in ralzaan tampi an um. Abik in cun zuuninn ah hin kan chambau” tiah Paletwa khuami asi mi Aeik Tun Min nih atu lio Paletwa sining cu achim. “Paletwa khua ah arak zaam mi hi 3,000 hrawng cu an si lai. Paletwa zong cu ahim lo ca’h mah le khua ah atlung ṭhan mi zong an um” tiah a chim chap.

Paletwa khuakulh chung um nan-chaung-wa, tone-ma-wa …tbk khua oawl zong ah kawl ralkap nih hmunhma an lak caah khuami pawl hi leng zong chuak ngam lo in an um. Cu caah facang maan zong tamlak te akai i adang eidin thilri pawl le sii pawl zong an um pah ti lo tiah khua mi pawl sining cu an chim.

Raldohnak sining in cun April zarhhnihnak khan vanlawng in kahnak an rak tuah tilo mi cu May 8 thok khan ahung chuak ṭhan caah khuami pawl cu tikholh hmanh ah acaan zohbuin tiva ah vakal i kholh asi tiah Aeik Tun Min nih cun ati.

Khua in an rak zaam lio ah zeithilri hmanh lak le ken asi lo leng ah inn cheukhat cu ral ruang ah mei nih akangh hna caah atu arak zaam mi pawl cu hmanding thilri pawl an chambau leng ah umnak hmun zong an herhbau tiah theih asi. Ralzaam bawmchantu pawl nih an lak mi cazin ning asi ah cun Paletwa ah hin ralzaam minung 3,700 le Sami khua ah ralzaam 2,600 leng zapifonh 8,000 deng an um tiah theih asi.

Chin ram, Paletwa hi Rakhine ram he aa pehmi asi i humhimnak ruang ah Sami khua tiang lawng Matupi khua lei in kal kho asi. Furpi ahun phanh ah cun Matupi-Sami motor lam zong hmanawk ahar cang lai caah pehtlaihnak acat sual lai tiah mipi pawl an thin phang ngaingai.

Atubantuk Kawl ralkap lei nih kahdaihnak thawng an thanh ko hmanhsehlaw ralhrang pawl he an i dohnak hmun pawl telhchih asi lo caah raldohnak pawl achuak chinchin sual lai tiah khuami pawl nih an phang ngaingai ti asi. Sihmanhsehlaw, cu thawngthanhnak an tuah ni May 10 khan Paletwa pumpaluk cu hlan lio theih tawn mi raldoh thawng pawl le vanlawng thawng pawl khuaruahhar in an dia ngaingai tiah mipi nih an chim._Cherchan BBC

LEAVE A REPLY

Please enter your comment!
Please enter your name here