Tyson Sherman,Texas eidin chuahnak ah Covid-19 a ngei mi hmuh an si timi thawng a langh hnu, rianṭuantu vialte himtein rianṭuan khonak le mipi himnak ding caah timhhlamhnak an tuahmi pawl cu Tyson tuanvo Ngeitu nih an hun chim chuah.

Cacawn nithum ni [May 06] sachuahnak hmunlei nih an sin rianṭuantu lak ah mizeimawzat cu Covid-19 an ngei tiin hmuh an si tiah thawng an thanh. Asinain Tyson, Sherman rianṭuantu zeizat dah zawtnak hmuh an si timi cu Company lei nih chim ding an el. Sihmanhsehlaw a hnu bik zawtnak a ngei mi an hmuhnak cu cacawn nithum ni zing asi, ahmasabik an rak hmuh hi a luan cia mi zarhhnih ah asi.

Company lei nih cun khoika in dah hihi an i chawnh ningcang asi timi chimding a har ngai, rianṭuannak hmun ah an i chawnh maw asilole hmun dangdang in dah an rak i chawnh mi asi timi hi zoh le hlat khawh asi rih lo tiah thieh asi. Cubantuk in Tyson ah hmuh mi cases hi Grayson County ah hmuh mi cases 60 chung ah a tel maw tel lo ti zong fiang tein theih asi lo.

“CDC nih chuahmi zulhphung zulh asi bang in, zawtnak hmuh mi pawl cu dinhcaan pek an si, an dam a thiang cang tiin ngandamnak lei zung nih phunphai tein thawngthanh asi hnu ah rianṭuan kho an si te lai” tiin an thanh. “Hi zawtnak a ngei mi he pehtlainak a ngei mi pohpoh zong tha tein theih le chimh an si ko” ti asi.

“Zeitindah an i chawnh ningcang asi ti le zawtnak hmuhmi zat pawl cu ningcang tein cazin khumh asi caah khoika hmun ah dah zawtnak hmuh asi timi nak in mizaw pawl khoika ah dah an um timi kha biapi deuh asi” tiah county ngandamnak lei nih an chim. Tyson, Sherman nih rianṭuantu 1,700 leng rian a pek kho hna i thlanglei Dallas Fort Worth Metroplex tiang um mi an i tel.

Zarhfatin hi buaktlak in eidin 6 million in 8 million pound cu Sherman ṭuanhmun i rianṭuantu pawl nih sersiam le chuah asi. A tam ngaingai mi eidin thilchuahnak asi caah Sherman rianhmun cu hibantuk ngandamnak lei thinphang asi lio zong ah pehzulh tein rianṭuan kho a herh tiah company lei nih an ti. Herald Democrat lei thawngla tu pawl cu cacawn nithum ni ah khan cu rianhmun ah va kal i thawng lak le zeitindah a hlat tein um ningcang asi timi pawl zuklak nak an va tuah.

Tyson rianhmun manager Bill McKeeman nih cun “manager pawl nih a phit tet tuk mi sining hrial kho ding caah rianṭuancaan a thap mi pawl hna kha remhpiak an si. Rianṭuantu pawl an rian an luh tik zong ah ningcang tein le duhsah tein thlah asn si i luhnak le inn pi chung ah a phuphu in umter lo ding tuah asi. Rian hmun chung zong ah zawtnak checkhlat nak cu a hlankan in tuah asi. Rianṭuantu pawl hi rian ah an lut tik takpum a lum mi sining check nak cu tuah hmasa an si. Cuve ṭhiamṭhiam in a leng mi lutchuak zong cu theihternak tuah mi zukcuang bang zawtnak an ngei maw ngei lo tiin check le hlat an si.

“Hibantuk kan tuah mi nih hin chawnhbiaknak lei kan i harh mi zong zeimawzat aa rel deuh ti si. A ruang cu thil sining le thawng thanh tik ah hin holh phunli English, Spanish, Chinese le Burmese in hman si caah hi zukcuang pawl cu vawlei cung zapi hngalh asi” tiin McKeeman nih cun a chim. Rianṭuantu tamdeuh cu thil chuah lei ah an riantam cuahmah lio ah cheukhat cu thianghlimnak lei asi mi zapi nih tonghtham bikmi hmun pawl, cabuai le innka tiang tel in thianh ding ṭuanvo pek an si.

Rianṭuannak ah cun manager pawl le a dang hruaitu pawl cu asi khawh chung in timhlamhnak le thilthar a ṭha mi pohpoh cu tuah asi a ruang cu rianṭuantu pawl pakhat le pakhat an i naihniam tuk in an i ton lo nak ding caah asi. Cheukhat pawl cu zapi ruahnak chuah mi zulh asi i cheuhkhat cu tanglei rianṭuan mi thilsining le ruahnak i cheuh mi in a chuak mi asi. Culak ah ruahnak pakhat cu plastic thaan zaar le khamnak tuah in pakhat le pakhat kar ah ri tuah asi. Hunthok hmasa mi lak ah McKeeman zong cu opaque plastic (thlam lang lo mi) cu ka hman ve ti asi, a cawk zong fawi asinabalte caan sau hining bang kal ding asi ah cun a dang palstics (a thlam lang mi) phun zong thel ding timhtuahnak kan ngei ti si.

A dang ralrinnak caah tuah mi pakhat cu, hmaikhamnak (face shields) cu rianṭuantu pawl sin ah pek dih asi cun pakhat le pakhat pe 6 hlat in rianṭuan asi. MacKeeman nih chimnak ah cun hi bantuk ralrinnak thilri pawl hi Tyson ngeihchiah thilri lawng te le a minung thazaang in hman asi tiah ati.

“A luan cia mi March in khan hloptlo ngai in timhlamhnak kan ngei” tiah Tyson case ready operation vice president Mark Gordon nih a chim. “Hi cung ah asi khawh chung in a tha bik sining phan kho ding kan i zuam cuahmah ko” tiah ati.

Zawtnak pul a thok lio ah khan “bawmhchannak lei ah kan i pha zo lo, PPE pawl zong a chambau sihmanhsehlaw company lei nih cun hi zawtnak lak zong ah rian cu biatak tein ṭuanchuahnak kan ngei” tiah McKeeman nih cun a ti. “A hramthok ah cun a rak har ngai, kan sin thil a cang mi ruang ah hin kan lau ngai nain company lei in bawmhchahnak thawng in ṭha ngai in kan hun tawlrel kho. Kan herh mi cu tlamtling in kan ngei kho asinain caan har a rak si lo tinak bal cu asi lo, tahchunnak ah sanitizer (ti hau lo mi kut ṭawlnak …tbk)” tiah a chim chap.

“Zaraan cu, Tyson nih fimthianak lei in siseh rianṭuantu pawl an himnak ding tuah asi. Rianṭuan hmun kip ah humhimnak he pehtlai in theihternak, hmuhsaknak le muicuang pawl cu tar asi. Thil tam dueh cu a leng phanh zong ah mah ning khan zulh le um asi” tiah Gordon nih a ti. Khapkhatlei ah, ngandamnak lei he pehtlai in a herh ah cun dinhcaan lak ding in rianṭuantu pawl cu forhfial an si.

“Rianṭuan caan ruahpiak thiamnak nih hin an dam lo caan ah inn um kho ding mi an si” tiah McKeeman nih a ti. Rianṭuantu pawl an zawt sual zong ah company lei nih an tinco awk asi mi ruahpiaknak tete cu ruah piak an si caan karlak ṭuan lo phun (disabled) in ruahpiak an si. Ataktak ah disabled asi ah cun 60% lawng ṭuanmaan pek asi nain atu cu 90% tiang pek an si leng ah “waiting periods” zong rel chih an si lo.

Rianṭuan hmun ah tuzarh thok in thawng an thanh mi “Matrix Medical Network he rianṭuan ṭinak an ngei lai caah ngandamnak lei he pehtlai in a herh mi poh bawmhchanh an si lai. Rian hmun pawl ah cun zawtnak check piak kho asi lo tiah an ti nain Matrix le Tyson ngandamnak rawlrel piak mi in cun bawmh kho ansi lai. Cun “Matrix nih hin hmailei zong ah tam deuh in bawmh le check piak kho men” tiah Gordon nih a chim.

Adang an tuah chap rih mi cu, rianṭuantu pawl hi asi khawh chung in nifatin tein rian ah rat ding forhfial an si. Hramthoknak ah March in July tiang an rian ṭha tein aṭuan mi paohpaoh cu $500 chap an si lai. Cuzong cu $1,000 ah karh chap asi i ṭhiphnih in pek an si lai tiah thanh asi.

Gordon nih cun “an zawt ruang ah inn ah aum mi cu hi chapchih mi cu an tinco lai lo cun a dang ruang ah a rian a rak kho lo mi zong an i tel” tiah ati. “Hi kong ah thil dangdang cu a cang lai lo. Thawng zong thanh lo rian zong a ṭuan lo mi pawl ca lawng ah asi” ti asi. Hi chapchih mi leng ah May thla chung a ṭuan mi rianṭuantu pohpoh cu nikhat ah $30 chapchih an si lai. “Nifatin rian an rak ṭuan peng ah cun, hi nih hin tangka tam deuh adih mi chungkhar cheukhat caah nau zohkhenhnak le adangdang an dih mi zeimawzat abawmh kho lai” tiah McKeeman nih achim.

“Angaingai ah cun rian ah rak ra mi rianṭuantu pawl caah asi. Phundang chim ah cun an cung ah lunglawmhnak langhter khi asi” tiah Gordon nih a chim. Covid-19 ruang ah sachuahnak hmun tam ngai cu khar an si chuahmah lio ah Tyson lei in cun hibantuk tlennak le sersiamnak hi an tuah asi. USA Today nih cacawn nithum ni a thanh mi thawng ah cun sachuahnak hmun i rianṭuan

tu 10,000 cu Covid-19 zawtnak an ngei tiah theih asi. Cu lak ah atlawmbik 45 hi cu an nunnak aliam ti asi. Sachuahnak hmun 7 hi cu zawtnak an i chawn caah khar an si tiah thawng theih asi. “Rianṭuan hmun pawl nih rianṭuan tu pawl kilvennak caah tiin CDC/OSHA nih chuahmi zulhphung pawl an tuah kho ah cun a rau hlan ah rian an ṭuan ṭhan ding asi” tiin Agriculture Secretary Sonny Purdue nih stakeholders pawl sin cakuat ah a ṭial.

“Hihi tuah ding in tha kan pek/ kan forhfial hna. Executive Order le the Defence Production Act nih chuahchap mi nawlzulh ding pawl cu a herh ning in tuah asi te lai” tiah heralddemocrat cherhchan in thieh asi.

LEAVE A REPLY

Please enter your comment!
Please enter your name here