Amarillo, Tx um Tyson cawsa chuahnak hmun ah cun Covid-19 zawtnak an i chawn cuahmah hna, hihi Texas sa chuanak hmun lak ah a hnubik theih mi virus a karh bik hmun pakhat ah a cang. Cu hmun ah rainṭuantu pawl le Observer tonbiaruahnak ah an chim mi cu “company lei nih rianṭuantu pawl caah coronavirus in khamh kho ding kongkau he pehtlai in chambaunak tampi an ngei, kan zawt ko bu zong ah rianṭuan hau peng kan si. Rianṭuan tu pakhat cu a thi zong a thi” tiah rianṭuantu pawl nih an chim.

A luanciami cacawn nili ni chun ah hi rian hmun cu zei zawtnak hmanh a um lo tiah mipi sin thawngthanhnak rak tuah mi asi. Sihmanhsehlaw rianṭuantu pawl nih an chimnak ah cun a luan cia mi March thladih lai hrawng in coronavirus hi a rak um cang ti si, cu lio ah cun Tyson nih minung pakhat lawng Covid-19 zawtnak a ngei tiah test a si tiin rianṭuantu pawl sin ah thawngthanh nak a rak tuah. Company nih hin rianṭuantu pawl caah hmaihuhnak (respiratory masks) cu April thla laifang tiang ah tlamtling tein a kan pek kho lo tiah an ti. Rianṭuantu John Atwood nih chimnak ah cun “kei hi April thla dih ah khan Covid-19 positive ka si tiah a lang i inn ah quarantine in ka um” ti asi. A nupi zong cuka hmun ah rianṭuanmi asi ve caah test an tuah ve i thawngfiang an hngah lio asi.

(Atwood’s a min hi kan thlen mi asi, a dang rianṭuantu pawl zong an min kan thlen hna, a ruang cu thawngzaam tu sin ah hiti bia an chim mi cu Tyson nih lehrulhnak an kan tuah sual lai tiah an phang caah asi.)

Atwood nih chimnak ah cun Tyson nih khan tuan tein virus khamhnak le humhimnak pawl rak tuah seh law ka rak zaw lai lo. “Tuan tein hin timhlamhnak an rak ngeih awk asi i, rianṭuantu pawl sin zongah thawngfiang in an kan thanh ding arak si” tiah achim. “Tuan deuh kan zapi test rak tuah i positive pakhat an rak hmun hnu khan cun rianhmun hi rak khar ding asi cang” tiah ati.

Coronavirus zawtnak tilet nih hin sachuahnak hmunhma pawl tamlak tein a rawkralter bangin Texas ah cun rianṭuantu thawng leng cu pakhat le pkhat i nai tein rianṭuan asi leng ah personal protective equipment(PPE) zong a luancia mi thla tiang ah tlamtling in an hmang kho lo ti asi. Ramning huap ah cun, sachuahnak rianṭuantu pawl minung 5,000 cu zawtnak nih a tlunh hna i atlawmbik minung 20 cu an thi. The Panhandle hmun hrim kha ramchung ah Covid-19 a karh khunnak hmun pakhat ah a hun cang. Amarillo,Tx in chaklei asi mi, Moore County ah hin a tlawmbik rianṭuantu 240 (JBS cawthahnak hmun ah rianṭuanmmi pawl) cu zawtnak an ngei tiah hmuh an si. Potter county, Amirillo,Tx ah biapimi khua ngan pakhat, cu zawtnak a ngei mi 1027 an si, hining in zoh ah cun milu 117,000 um asi caah minung pakhat cio zawtnak i chawnh ning zoh ah cun a tambik a chawn mi dirhmun ah an phan. Potter pawngkam um hmun dangdang pawl zong ah tam lak tein an i chawn i zawtnak ngei mi hi nifatein an karh cuahmah ti asi.

Federal le state in ṭuanvo ngeitu pawl zong a luancia mi zarh ah khan an rak phan i testing tuah kho chapnak le Covid-19 a karh mi khenkham kho ding an i zuam. Amarillo, Tx rianṭuanhmun ah a ṭuan mi pohpoh cu virus test nak an tuah hna. Asinain Texas Department of State Health Services nih cun Tyson ah hi bantuk zawtnak a karh mi kongkau dothlatnak tuah asi lai maw asilailo dah timi an chim duh lo, Amarillo i public health department ah halcahp awk ti asi. Cu bantuk in nawlngeitu health department zong nih cun hikong he pehtlai in chimrel ding an el, ramchung zawtnak hmuhmi zapihuap i 41% lawng hi sachuahnak rianṭuan hmun he a pehtlai ti lawng in an chim.

Tyson rianṭuannak hmun ah cun “company lei nih tlamtling tein Covid-19 humhimnak tuah ding ah zarh tampi rau in chambaunak an ngei” tiah rianṭuantu pawl nih an chim. Tahchunnak ah: Rianṭuantu pawl cu an tak 100.4 degrees leng a lin ko bu zong ah sa chuah, sa tan …tbk cu tuah ṭhiamṭhiam asi tiin Lee Flynn, zawtnak a ngei kho men tiah zohfel mi, nih cun a chim. “Tyson nih atu ah cun rianṭuantu pawl sin ah PPE a hun pek cang hna nain hmaihuh (mask) i huh ding tu cu a thlahthlam pah” tiin a chim. “Mi tampi cu hmaihuh (mask) an hmang lo. Hmaihuh lo in rian na rak phanh zong ah apoi lo, rian na ṭuan kho ṭhiamṭhiam ko” tiah a ti.

Texas i hmun dang um Tyson rianṭuantu asimi pawl nih thlisining kongkau chimphuannak an tuah hnu ah Atwood le Flynn nih chim mi pawl cu biatak ngaingai asi tihi a fiang chin. Shelby county ah hin a tlawmbik minung 56 Covid-19 zawtnak a ngei mi rianṭuantu an um. An mah zong nih cun “Tyson lei hrim nih hi virus rianṭuan hmun ah aum timi kongkau he pehtlai in thawngthanh an chambau leng ah khua caan sining he a tlak in rian an ṭuan lo, PPE thilri pawl zong duhsah in an kan pek lehlam” tiah an ti. Shelby county ah hin atu tiang ah Covid-19 zawtnak ngei mi minung 144 an si tiah theiha si bantuk in Texas nichuah lei ah cun zawtnak a karh bik hmunhma pakhat ah a hun cang. Hmundang Washington, Iowa le Kansas …tbk ah a um mi Tyson sachuahnak rianṭuan hmun pawl zong cu Covid-19 nih a hun ṭhuat tluahmah hna.

Tyson lei aiawhtu nih cun Texas rianṭuan hmun ah Covid-19 zawtnak an i chawnh ningcang thil sining dikthlir cu chimrel an duh lo i “kan rianṭuantu pawl ngandamnak le humhim nak cu pakhatnak ah kan chiah, ṭuanvo a nganbik ah kan i khinh mi zong asi” ti lawng in an chim. Cu leng ah Tyson lei in hin a herh mi zulhphung, timhlamhnak asi mi rianṭuan caan phialkaan ter “rianṭuantu pawl i hmuhtonnak zorter” le “an dam lo ah cun inn ah um ding” tiin zawtnak i chawnh lo ding ralrin asi. Amarillo rianṭuan hmun ah a ṭuan mi pawlpoh poh cu ṭuanmaan a hleichap mi $500 le nikhat ah $30 pekchap an asi. Rianṭuantu pawl umtu ning fiangfai lo an si ko bu ah President Trump nih chuah mi Uknak he pehtlai in nawlchuah mi ah cun US sathahnak hmun pawl cu pehzulh tein on le ṭuan ding ti asi.

Amarillo, Tx i Tyson rianṭuantu pawl nih “kan rianṭuan hawi a tlawmbik pakaht cu coronavirus ruang ah a thi. Maung Hla Thein cu BSA siizung ah kal pi asi i amah cu virus angei tiah hmuh asi, April 16 ah khan a thi” tiah Observerhe tonbiaruahnak ah cun an chim.

Flynn cu refugee le immigrant tambik (minung 4,000) rian an ṭuannak cu hmun ah cun a phungmen holhletu a ṭuan piak hna. Amah nih a chimnak ah cun “atu lio sining in cun coronavirus i chawnh asi sual lai tiah rianṭuantu pawl nih ṭihphannak an ngei ngai te” ti asi. Micheukhat, Flynn bantuk pawl cu, mah tein i khamh kho nak ding caah ṭuanmaan hmuh lo in dinhnak nawl tu an lak. Flynn ca’h cun a tlai zong a tlai cang kho men, cacawn nihnih ni telephone in biahalnak kan tuah lio hmanh ah a thawchuah aa harh ngai cang. A khuh ngaingai fawn i a tak zong lin ngai 101.7 degrees a phan. 

Amarillo Tyson i riantuan mi paohpaoh Covid test an tuah lio pi a si. Tu zarhte nii tiang tuah a si lai i covid test aa tuah lo mi rian ttuan nak ah luh kham a si cang lai. Test i negative mi lawng rian ttuan a ngah cang lai tiah CCN Team pakhat sinin thawngtheih asi.

LEAVE A REPLY

Please enter your comment!
Please enter your name here