Chinmi tamlak te riantuannak Tyson, Sherman ah May 6 zing, Sherman um eidin chuahnak hmun ah rianṭuantu pawl lak ah Covid-19 zawtnak a ngeimi an um tiah Tyson Company riantuantu pakhat nih fianternak a tuah. Minung pa zeizat setset an si timi cu chim asi lo nain mi tlawmte sinah an hmuh tiah theih asi. Grayson County nih Covid-19 angei mi panga hmuh an si tiah thawngthahnak an tuah hnu Suimilam 24 hnu hrawngah hi thawng hi theih asi. Sherman khua ahcun Covid-19 mizaw zapi minung sawnga leng an si cang. Company lei nih “Grayson County Health Department lei nih ningcaang tein Covid-19 check nak an tuah hnu ah Tyson ah rianṭuan mi cheukhat sinah zawtnak cu hmuh asi.

Thil sining a thleng lengmang bantuk in zawtnak a ngeimi hi pa zeizat setsat timi cu chim khawh asi lo nain an um len lai tiah theih asi. CDC nih chuahmi zulhphung ning tein Covid-19 positive si mi pawl cu caan karlak dinhnak an ngei i damnak tlamtling an hmuh hnu lawngah rianṭuan an thok ṭhan te lai. Positive-azaw tiah hmuh mi he naihniam tein aum kal mi paohpaoh nih theihternak le thawngthanhnak kan tuah dih cang” tiah thawng an thanh. Rainṭuantu pawl humhimnak cu biapibik le pakhatnak ah chiah asi bantuk in ralrin ding le timhtuah ding a herh mi paoh cu rianṭuannak hmunah ṭha tein tuah asi ko tiah theih asi.“Rianṭuan tu pawl an tak a lin maw lin lo check nak le tak pum a lum kik check nak thilri tlamtling he zohfelnak tuah asi. Cun a herhmi hmaihuhnak (face mask) zong pekchanh le kutṭawlnak (hand sanitizer) hmun pawl zong a hlan nak in tam deuh chiah piak asi” tiah cu thawngthanhnak ahcun an thanh chih. Cu lengah “A hlat deuh in um (social distancing) phung zong ning cang tein zulh khawhnak ding caah rianṭuan ningcang ṭhennak, dinhnak hmun pawl ṭhennak, rian thok caan i thilkan ding in tawlrelnak le rianṭuannak hmunah mibu piin luh chuah lo le dinh caan peknak…tbk” in tuah asi pinin ah rianhmun ah hman mi thilri zong thianghlimnak tuah chap zungzal an si. “Company lei nih rianṭuan caan he pehtlai zongin theihthiamnak zeimawzat kan ngeih piak hna i an dam lo sual ahcun inn ah um dingin kan forhfial hna. Caan karlak rianṭuan kho lo tiin ruahpiak thiam an si ko” tiah cu thawngthanhnak ah cun aa tel. “Ngandamnak he pehtlai in zohkhannak tha tein pek cu kan rianṭuan ṭi hawi (Matrix Medical Network) nih tuahpiak asi. Hi MMN nih ngandamnak lei zohkhanh nak leiah rinhchanh ngai mi pakhat an si bantuk in zawtnak check nak le a herh mi bawmhchanhak cu ṭha deuh in tuah khawh asi” tiah theih asi. Ram pumpi huap in ann ṭhannak le ningcang tein a hlat kan tein umnak zulhphung hun tuah cuahmah lio asi fawn. U.S ahcun “Coronavirus zawtnak a hun i thok ah khan a tlawmbik sa thahnak le sa chuahnak company rianhmun 38 hrawng cu an rian an ngol cang” tiah theih asi. May ninga ah chuahmi thawngzaamhnak ah mifim thiam chimnak ahcun “Hi pulrai ruangah hin sa thahnak le sa chuahnak riantuannak a tam bik harnak an tong ti asi. A tlawmbik sa chuahnak hmun 167 hrawng cu zawtnak nih a phanh hna i rianṭuan tu a tlawmbik minung 9,400 cu an zaw. Cu lak ah a tlawmbik minung 45 cu an thi tiah thawngzamh nak le hlatthlainak in theih a si.

LEAVE A REPLY

Please enter your comment!
Please enter your name here