Suimilam 24 chung US ah minung a tambik an thih asi. America ram cu lockdown khenkhamnak zeimawzat hun ṭhumh piak asi cuahmah lio buin nikhat chung ah minung 2,909 an thi tiah World Health Organization (WHO) nih a thanh mi cazin ah a lang.

USA cu nikhat chung ah minung tambik athi mi cazin ah a hun lut ve i minung 2,900 leng cu coronavirus ruang ah an nung nak a liam i lockdown khenkhamnak pawl zong USA nih zeimawzah a ṭhumh piak lio asi  tiah WHO cazin thanh mi ah hmuh asi.

A luancia mi zarhhnih chung ah khan States tam deuh cu dawr pawl on ṭhannak, restaurants, mall, museums le libraries pawl on ṭhan an si nain US cu covid-19 zawtnak ngeimi 1.1 million leng hmuh an si I a tlawmbik minung 67,173 leng an thi cang.

WHO nih chuah mi cazin ning in cun US cu nikhat chung (cacawn nili ni in cacawn ninga zinglei nazi 4 tiang) ah minung 2,909 an thih,  a thi mi zapi fonh hi 55,337 an si cang tiah thanh asi. Covid-19 zawtnak America a phanh thok in nihin tiang ah nikhat chung athi mi zat a tambik a lai tiah WHO nih cun a chim.

Asinain, The Daily Mail nih zohfel tawn mi cazin 1PointAcres.com ning asi ah cun mi tam deuh an thih hi April 15 ah khan minung 2,524 an thi. Cun cacawn nili ni ah khan 2,239 le cacawn ninga ni ah khan 1,872 an thi ti asi. Cu caah cacawn ninga ni tiang thi mi zapi fonh ah hin 65,708 an si cang. Atu zarhpi ni tiang ah hin cun US ah a thi mi hi a tlawmbik 67,173 hrawng an si cang. Cu caah WHO nih hin zeibantuk lei hoi in dah cazin a lak timi hi a fiang lo ngai.

Federal zulhphung nih a thanh nak ah cun a thi mi cazin hi ni 14 peh tein a ṭum thluahmah caah a tu bantuk in lockdown tuah mi pawl zong ṭhumh asi tiah theih asinain Texas le a dang US khua pawl nih cun an khuaram on ṭhannak lei deuh an hun timhtuah cuahmah ko.

Atu bantuk nikhat ah a thi mi a tambik thawng theih sihmanhseh law Texas khua cu cacawn ninga thok in lockdown nawlchuah mi pawl ṭhumhthlak piak an si cang lai, fiangfia tein covid-19 zawtnak ngei mi a tlawm le tam fiang lo buin US khua ngan bik le a tlai bik on ṭhannak tuah mi khua zong asi.

Thil dawr, eidin dawr, muicawl zohnak, malls, museums le libraries pawl cu Lone Star state ah on ṭhan kho an si lai nain zeimawzat cu khamh asi rih ṭhiamṭhiam lai caah an ṭuan kho mi i 25% (cheu li cheu khat) lawng nawl pek an si rih. Mipi ti lionak, bar, gyms, ṭamhnak dawr, massage dawr, bowling alleys le video game arcades le tattoo dawr tbk cu khar an si rih lai. Greg Abbott, Texas Governor nih cun ralrin nak he pehtlai in “khua mi pawl nih aa hlat tein um kal phung zulh peng kan hau rih lai” tiah a ṭial, ngandamnak he pehtlai mi zulhphung pawl zulh a hau rih ti asi. “Hmai huh (mask) huh hrim ding ti cu asilo nain midang pakhat cio an nunnak caah ral asi hnga ding khamh kho i zuam ding in forhrial kan duh hna” tiah Abbott nih a chim.

US President thimnak thla 6 lawng a duh cang bantuk in ram economy sining zong ningcang lo in aum lio asi, culak ah cun US ram on ṭhannak kong he pehtlai in mipi sin ah thawngthanh mi cu i cawhkalh le fiang lo ngai in President Donald Trump thawng a thanh. Cozah nih a chuah mi zulhphung pawl he pehtlai in thapeknak a tuah bantuk in stay-at-home nawl chuah mi pawl lakpiakṭhan ding ah mipi duhnak lanhter mi pawl zong cu tha a pek hoi hna.

Lockdown nawlchuah mi cu Democratic Governor nih lakpiak ṭhan ding kong he pehtlai  in Lansing, Michigan um mipi nih an duhnak an lanhter mi cung zong ah President cun a hun thlak ve. “Governor Gretchen Whitmer nih tlawmpal cu ruahpiak an hau, remhdaihnak tuah a hau. Hi hna hi miṭha an si nain an thin a hung. A hlanlio an nunning kha an duh ṭha, himnak a hau! Va tong hna law biaruahnak ngei hna, cun an duhnak tuah piak le thil sining kha cuatlai thiam”tiah Twitter ah cun a ti.

White House aiawh biachimnak nawl ngeitu Kayleigh McEnnay nih ahmasa a chim nak ah cun Trump nih hin “him tein ram on ṭhannak aduh” tiah cacawn ninga ni ah khan a chim. “State kip nih thilsining cazin zoh in chuah mi zulhphung ning khan on ṭhannak tuah ding in forhfialnak a tuah. Asi nain a bik in nawl ngeitu cu State an si ko” tiah McEnnay nih a chim.

Mifimthiam pawl nih ram on ṭhannak he pehlai in rianrang tuah awk asi lo tiah chimh asi ko nain lockdown nawlchuah mi pawl lakpiak ṭhan ding in Americans 1000 leng pawl lamcung chuak in duhnak langhter asi. North Carolina, California, Colorado, Delaware, Florida, Illinois, New Jersey, New Mexico, New York, Tennessee le Washington tiin states tam deuh ah langhternak an tuah cuahmah.

Calfornia Governor Gavin Newsom nih cheukhat zulhphun cu a hun remhpiak hna I rili kam cheukhat cu on ṭhan asi. Newsom nih rili kam pawl luhchuak nak nawl a khamh ṭhan lio caan ah New York Governor Andrew Cuomo nih cun “zawtnak a karh bik hmun New York state um sianginn vialte cu a taang mi cacawn caan zong khar asi lai” tiah thawng a thanh.

Zawtnak tambik a karh nak hmun asi mi New York le New Jersey hmunhma pawl zong ah covid-19 zawtnak a ngei mi hi a zor thluahmah. Asinain rampumpi huam nifatin mizaw thar a karhchap mi hi 30,000 hrawng a hun phan cuahmah hoi.

“US nih tuah mi lockdowns phun hi zawtnak i chawnh lo nak caah cun a za khan asi ko” tiah Center for Global Development in Jeremy Konyndyk nih a ti.

“Sihmanhsehlaw mah nih hin zawtnak cu a ṭumchuk ter hlei lai lo. Zulhphung le nawl chuahchap mi um lo ah cun atu sining tein hin caan zeimawzat umkal beh hi kan fawi te” tiah WHO’s Independent Oversight and Advisory Committee chungtel asi mi Konyndyk nih cun a chim.

LEAVE A REPLY

Please enter your comment!
Please enter your name here