Vawlei cung khuaza ramkip nih ton chaumah mi Covid-19 zawtnak cu kumzabu 21 chan minung nih tonmi lak ah aharbik zawtnak pakhat tiah ruah kho asi bantuk in Cozah kip zong nih hi raiṭha lo dohkhonak ding alamkip in i zuam cuahmah lio asi.

Covid-19 zawtnak thawnhkehnak hmasabik Taluk ram cu zawtnak doh ningcang adot dot in pathum a ngei i cu doh ningcang adotdot cu vawlei cung ramkip nih theih kho ding in United Kingdom ah um mi Taluk cozah aiawh rianṭuantu Ambassador Liu Xiaoming nih chimphuan nak a tuah.

Pakhatnak ah, vawlei cung khuaza ramkip um minung vialte ngandamnak caah cun mah tein runven a hau. Taluk ram nih Covid-19 raldohnak ah hin President Xi Jinping le cozah ṭuanvo ngeitu hruainak zulh buin a ṭha bik tuahsernak a ngeimi ram asi. Covid-19 raldohnak ah cun rampumpi huap in a ṭha bik caah kan i zuam.

Taluk nih thazaang chuahnak ah hin zawtnak a karh ningcang cu zakhat ah zakhat khamh kho asi rih lo nain zeimawzat abiapimi sining pakhat tiang cu kan khamh kho. Taluk nih hibantuk a tuah kho caah ram sining zong ningcang tein hun kal kho pah dawh asi. Taluk cozah nih nawlchuah mi ningcang tein mipi nih zulh asi i mah tein run venkhonak kan rak I zuam caah asi.

Cu sining zeimawzat hun lonh kho hnu ah cozah nih adot hnihnak cu hun thok kho a zuam. Cucu Covid-19 dohnak he pehtlai in ramdang pawl siin zumhnak hmuh kho ding khi asi. Covid-19 dohnak hi Taluk cozah nih tuah lio mi thil pakhat asi bantuk in hi zawtnak ruang ah chawva lei sunghzatlaknak cu domhtlaih kho ding in Taluk ram nih a hun i zuamnak asi.

Vawlei cung huap business pehtlaihnak le small business vialte thok ṭhan kho nak ding a hun i zuam ṭhan bantuk in minung ngandamnak caah santlai ding mi business pawl zong tuah kho ding in ruahchan asi.

Taluk ram hi Covid-19 zawtnak thlihrang lak ah cawntlak thil ṭha pawl tampi hmuhton asi i cu pawl zong cu ramdang hawi sin ah phawzaamnak rak tuah asi. Minung pawl him le ngandam tein nun khawh ding, ningcang tein zawtnak khamh kho ding tibantuk cu theihternak kan tuah kho.

Zohfelnak he mizaw zohkhenh ding timi thlurtinh he central cozah le khuakip cozah pawl hmunkhat ṭuanrel nak ngeih asi. Rampumpi zong nih hi zawtnak thawhkehnak Wu Han khua cu zohfel le bawmhnak tuah a rak si.

Covid-19 zawtnak dohnak i hmailak ti awk tlak asi mi Wu Han khua ah sii lei ṭuanvo ngeitu pawl zapi 42,000 nih rathnawh le mizaw zohkhenh asi. Cu bantuk asi caah Taluk nih Covid-19 zawtnak cu zeimawzat khamh kho asi i ram sining zong  ṭhat lei a hun panh kho ding in hun i zuam kho nak asi.

A donghnak dot cu vawlei cung um ram kip he ṭuanrel ṭi kho hi asi. Vawlei cung ramkip he hmunkhat ṭuanrel ṭi lo ah cun hi raldohnak hi tei kho ding asi lo. Atu lio ah hin Covid-19 zawtnak a um lo nak ram timi hi a um lo ti awk khan khan asi. Taluk zong nih hi Covid-19 rai dohkhonak ah ṭuanvo khinh in zapi hngalh in ṭuanrel chuamah asi.

Hi zawtnak asi ningcang, zawtnak rungrul sining cu vawlei cung ram kip nih thieh khonak ding caah ram 15 in sii lei mifimthiam pawl cu phu 17 ṭhen in ṭuanvo peknak cu World Health Organization(WHO) he kan ṭuanti kho. Cu leng ah United Kingdom tel in ram 150 leng in sii lei mifimthiam pawl he biaruahnak le theihternak tuah cuahmah asi.

Minung 1.4 billions umnak Taluk ram cu Covid-19 zawtnak nih chuahpi mi harsatnak nih a tlak lio asi ve ṭhiamṭhiam. Asinain sii le ai, zawtnak i khamhnak thilri le a dangdang herhhai pawl zong ramdang sin phawtzaam nak a tuah cuahmah lio asi.

Taluk nih WHO ah USD 50 millions pekchanhnak a tuah bantuk in ram kip cozah pawl he ṭuanrel ṭinak, ram ṭhangcho lio pawl le ngandamnak lei zohkhenh ding thazaang der mi ram pawl sin zong ah bawmhchanhnak tam ngai te a tuah cuahmah lio.

A luan cia mi caan chung ah Taluk ram he pehtlai in ningcang lo le zohchia mi sualphawtnak a um bantuk in Taluk ram nih hin WHO hi a chak a tlaih tiah zong chim le rel asi. Taluk nih ngaihthiam hal le liamcawi an duh caah asi.

Thilsing taktak hlathlai lo in ningcang lo soisel le sualphawt zong hi ramkhel virus phunkhat asi ve. Hi sualphawtnak nih hin harnak lonh kho ding ah dawnkhan tu cu a va si hlei lai lo. Hi vawlei cung rai tei khonak caah cun ram kip he hmuankhat ṭuanrel ṭi nak leng in lam dang aum lo.

Taluk ram President zong nih Covid-19 zawtnak doh khonak caah lam ṭha bik a chim phuan cang. Hi zawtnak doh ding ah Taluk cu ram kip he hmuankhat ṭuanrel ding in timhcia asi cang. Vawlei cung ram vialte kan ṭuan ṭi ah cun muihnak a tlau lai i ceunak kan hmuh kho te cang lai.

(China Ambassador to UK, Liu Xiaoming nih ṭial mi “China has valuable lesson for the world in how to fight Covid-19” timi capar cu a ṭha a rem ning in leh ṭhan mi asi.)

LEAVE A REPLY

Please enter your comment!
Please enter your name here