Ministry of Health and Sports thawnzamnak nih Hakha ah Quarantine chiah mi kum 18 nute sin ah Covid-19 zawtnak hmuh asi caah a chungkhar le amah he pehtlaihnak a ngeimi pawl zong virus check an si lai tiah Chin State Minister of Social Affairs, Pau Lun Min Thang siin theih asi. “Atu cu siizung ah kan chiah cang. A nih cu Isolation Room ah kan umter lai.

Cun a hnulei konglam pawl hlat a hau lai. Kalay lei lam in a rak ra ti asi. Kalay in Hakha, Hakha ah cun sau a um lo. An khua Tiphul ah a tlung tiah kan theih. Hmun dangdang hna a kal maw, midang a ho he dah tonnak a ngei tbk kan hal a hau. A chungkhar pawl kha cu lengchuak lo, ningcang tein um kalter an hau. Cun amah he pehtlaihnak a ngei mi paohpaoh hlat i Quarantine chiah an hau. A hmasabik Case-1 lio kha virus check kho a rak har ngai. Atu hnu hi cu a har tuk ti lo. Cucaah amah he pehtlaihnak a ngeimi poh cu Swap Test kan tuah colh dih hna lai. Amah tu cu a ngandam ko” tiah Social Affairs Minister nih cun a chim. Hakha ah hmuh mi Covid-19 mizaw (Case-150) hi Taluk Ram ah umpitu rianṭuanmi asi i Taluk ram in Myanmar ram chung Muse khua cu March 20 ah a rak phan, March 21 ah Mandalay lei a tlung, cu dih cun Mandalay-Kalaymyo cu March 24 ah Shwe Mandalar Express cit in a tlung. March 25 ah Kalaymyo a phan tiah theih asi. Kalaymyo i Taungzalat Sang um theihhngalh inn ah March 23 in April 5 (zing) tiang a ṭhum. Cu dih cun Hakha lei ah Taunzalat Mortor in April 5 zing ah a tlung i zaanlei ah Hakha a phan ti asi. Hakha in cun cu a citmi motor kha a hlan chap i Tiphul a inn tiang a lan tiah theih asi. April 16 Tiphul Khuabawi thawngthanhnak in Hakha khuathar Na-Ta-La sianginn ah April 16 thok in Facility Quarantine chiah asi. Cu Facility Quarantine chiahnak hmun ah hin minung zapi 12 an um (Pa-8, Nu-4). Australia lei in a rak tlung mi Facility Quarantine chiahnak hmun lio mi Pa Ling nih “atu tiang cu Cozah lei ṭuanvo ngeitu pawl nih zei an chim mi aum lo. Covid-19 mizaw tu cu an kal pi. Nu le pa hmun dangdang ah chiah kan si caah amah tu cu ka thei lo. Ka thin tu cu a phang lo. A leng lei in sualnak ngeimi bang zeibang an kan zoh mi tu cu ka lungsiarem lo” tiah ati. Atu hmuh mi Case-150 hi Chin ram kulh chung hmuhmi Covid-19 mizaw lak ah paruk nak asi, a dang Covid-19 mizaw 5 hi Tedim khua in an si. Myanmar rampumpi huap in hin Covid-19 positive hmuh mi 150 an si i a nuunak liam mi 6 an si cang tiah thawngtheih asi.

LEAVE A REPLY

Please enter your comment!
Please enter your name here