Covid-19 mizaw a hmasabik hmuhnak Kaptel khua, Tedim pengkulh cu lockdown tuah asi caah Kaptel khua bochan in eidin cawk asi mi Hriangawi khua cu eidin ngeih ti dawh an si ti lo tiah theih asi.

Kaptel khua ah Volunteer in rianṭuan tu Dr. Bawi Lian nih “Hi khua hi Kaptel he miles 2 hrawng lawng an i hlat. Khua phanh khawhnak lam hi lam hnih lawng aum. Tedim in Kaptel khua tan in kal mi lam le Tedim in Laitui (miles 16 hrawng hlat) cu Laitui khua in cun miles 13 hrawng kalchap ahau mi khi asi. Chimduhmi cu Kaptel ah hin eidin pawl abik in cawk deuh asi” tiin a Facebook account ah a ṭial.

Dr. Bawi Lian Mang nih chimnak ah cun “Kaptel khua lockdown si caah pawngkam um Hriangawi khua zong eidin um ti lonak zarh 2 leng asi cang” tiah ati.

“Eidin pawl aum ti lo nak hi a luan ciami zarh 2 khan asi cang. An khuabawi zong thil cawk ding ah a rak ra nain dawr ngei pawl he naih tein chawnh le cawk asi lai caah cawk si lo in hika Kaptel khua nih hmuh mi bawmhnak chung khan kan cheuh hna. Lockdown caan a dih deng cang caah a hlei mi kha hun i hrawm ve khi asi. Mahbelte atu lockdown caan an hun karhchap caah ei ding zong an ngei ti men lai lo” tiah a chim.

Atu bantuk Hriangawi khua eidin chapbau mi hi “Cozah rianṭuan tu pawl nih thil sining ṭha tein thawngthanhnak lei an chambau caah asi” tiah Hriangawi khuabawi U Dokhan Tuang nih a chim. “Kaptel ah thil kan va cawk hnik nain lockdown asi cah zeitin hmanh in kal kho asi lo. Cun khuami pawl zong nih cozah lei thawngthanh kan chambau pah rua. Uktubawi pawl zong cu zei an kan rel piak lo ti cu asi dih lo nain a biapi ah chiah asi rua lo. Atu lio caan cu chawva lei zong in chambau caan asi. Kan khua hi Kaptel ah thilcawk deuh asi tawn. Atu lio cu tangka ava um hmanh ah luhchuah kho asi lo caah harsatnak tampi kan tong” tiah ati.

Chin State Minister of Social Affairs, Pau Lun Min Thang nih “Kan mipi caah kan si khawhtawk in kan bawmhchanh ko hna. Nihlawh rianṭuan tu pawl zong eidin kan phawt ko hna. An chambaunak adikthlir in cun kan thei dih lo. Cu caah zaapi zong nih khuabawi hmang in thawng thanh a herh ve” tiah chin world cherchan in thawngtheih asi.

LEAVE A REPLY

Please enter your comment!
Please enter your name here