COVID-19 hi zawtnak tetuai a si lo. Vawleicung miphun vialte a that i, minung thiamsang bik nih a damnak sii an hmuh khawh rih lo mi zawtnak a si. A chek nak hmanh a har tuk rih. Na zawt hmanh ah fawibai ah an in chek duh lailo. A ruang? Cheknak tam an ngei lo. Zawtnak dang na ngeih le ngeih lo an in chek dih hnu lawngah an lunghrin ahcun an in chek lai. Vawleicung thiamsang bik ram U.S koko ah mizaw kan tam bik. 

Ngandamnak lei thiamsang, Ramuk le khuauk bawi, Cozah nawlngeitu hna nih, a herh taktak mi dah lo cu, leeng chuak hlah uh, mibu he um tti hlah u, Pe 6 hlat in um u, Na khuh ahcun na liang cungah khuh, tiah a phunphun in ralrin peknak an tuah. 

Zawtnak a ngei lo mi cu mibu in kan um zongah a poi lo tiah na ruah sual lai. Zeitin dah zawtnak na chek lo mi na theih khawh? A biapi tuk in ralrin an kan pek mi cu: mino deuh le mi thisa ttha deuh cu hi zawtnak an ngei zongah a lang lo nain, an mah nih midang an chawng khawh hna ti a si. Chim duh mi cu, hi zawtnak hrik na ngei ko mi na no deuh ruang le na thisa atthat ruangah aa thei lo mi kha midang up deuh siah, ngakchia a si ah, mino a thisa der deuh mi siah, zawtnak dangdang a ngei mi hna sinah fawitein na chawnh khawh hna. Nangmah cu dam hirhiar in na um ko lio ah mi chambau deuh sinah na zawtnak na pek khawh hna. Hihi a biapi ngai mi a si. 

Cucaah, ka dam ko pat tiah i chok hlah. Inn te ah um ko. A herh taktak mi lawngah um kal. Na um kal caan ah biatak tein i ralring. Birthday zong chungkhar te he lawng hman i zuam ko rih uh :). Hawi le kom he iton i rawl chumhtti, chungkhar cheukhat i fonh in rawlhrawm tti, nungak tlangval i ton in biasawng tlorh tti, ti phunphai cu donghter hrimhrim hna u sih. Pakhat hnih te a herh tuk caan ah i len kai cu phun dang. Appointment na ngeihmi zong thawn awk a tha mi cu thawn ko. 

Hi zawtnak hi zeirel lo in um bak hlah. Minung a zaw mi le a thimi cazin theih ko na buin, zeirel lo um cu khrihfa ziazong a si lo. Mah zawnlawng i ruah nak lungput ngeih a si. Khrihfabu biakinn zongah  ralring te in cawlcangh ah a tha. Minung 10 cung um hlah uh. Pe 6 in i hlat uh an ti mi ttha tein zulh a herh. Biakinn in hi zawtnak a karh ngainak thawngpang zong theih cio dih a si ko. Live in kan umnak hmun te ah Pathian thawngttha kan ngeih khawhnak ding a kan tawlreltu cungah kan i lawm. Ralring taktak in rak kan um piak hram ko uh. 

Hi zawtnak kongah ralring tukin a um mi kan hawikom an siah, kan pastor an si ah, community hruaitu an si ah, soi hna hlah usih. Laimi cu hibantuk ah a ralring deuhmi paoh soi kan hmang. A dawh lo ngaimi ziaza a si. Hi zawtnak hi phaisa le thilri sung hna bantuk menmen a si lo. Thihnak le Nunnak ri ah a um mi a si caah Chimh kan ngaih deuh i, nawl kan zulh deuh hna a herh. Phaisa le thilri cu sungh zongah kawl tthan khawh a si nain, nunnak thaw cu kan kawl tthan kho ti lailo. Kan i ralrin tuk ko buin, kan va ton a si ahcun Pathian lamhruainak va si te ko seh. Chimh ngaih lo ruang le nawl zulh lo ruangin kan ton sual ahcun Pathian hmai zong kan khap lailo. Cozah lei ngandamnak lei hruaitu nih an kan chimhmi, community upa le khrihfabu nih an kan zulhter chinmi hna hi zakhat ah zakhat zulh izuam hna u sih. Chimh ngai lo le zeirel lo phun in a um ter mi kan um ahcun ngol cang u sih. Chimh ngaih le nawlzulh a herh tuk lio caan a si. Hi thil hi, adong zau te ko lai. Kan rian cio a si.

Biakilh: Mi pakhat le mibu i ti hnawhnak si loin, a herh lo mi thil kongah nawl zul loin khuasa mi kan um lo nak ding ruahchan nak he pumpak ruahnak ttial mi a si.

LEAVE A REPLY

Please enter your comment!
Please enter your name here