A tulio ah Myanmar ram ah Vice President a ttuan liomi Pu Henry Van Thio cu CCN nih a inn te ah leeng in biaruahnak tawi kan ngei kho. Vice President Henry Van Thio cu Chinmi chungin Myanmar ram ah Vice President rian a tlai hmaisa bik mi a si. A caan sunglawi CCN le CCN mipi hna caah a kan pek ve caah kan i lawmtuk. Hi ka hmun hin kan lunglawmhnak kan langhter tthan duh. A tanglei ah CCN Presdient Salai Sang Hu Lian nih bia a ruahnak kan van tar. Vice President Henry Van Thio nih media sin ah bia achim a tlawmtuk caah, hi CCN he biaruahnak cu a sunglawi khun i pakhat hmah hrelh lo in rak rel cio dingin kan in sawm hna. Share cio ding zongin kan in sawm hna.(SHL hi Sang Hu Lian ti nak a si i, V. Henry Van Thio cu Vice President Henry Van Thio ti nak a si lai.)

SHL: A hmasa bik ah na chuahkeh nak le na chungkhar kong theih kan duh ko?

V. Henry Van Thio: Ka khua cu Thantlang peng, Tikir khua a si. Ka chungkhar dihlak panga kan si. Kan nu cu Dr. Anna Sui Hluan a si. Fa pathum kan ngei, Jesse Van Buai, Jeniffer Ngun Sui Par le Joseph Van Thio an si

SHL: Vice President na si mi hi zeiruang bik ah dah asi hnga tiah na ruah?

V. Henry Van Thio:  Pathian thawng bak in a si ko. Kei mah lei kam zong in Vice President si ding cu ka ruat lo. MP sawhsawh ding khin ka rak ruah ko. A tangmi lam can vialte zong hi amah Pathian nih tuanvo alak ko lai ti hi ka zumh.

SHL: Tutiang na rian tuannak ah zei dah na lungsi bik?

V. Henry Van Thio:  Zalonnak ( freedom ) hmuh mi asi. Tahchuhnak, hlan ah cun kan Kawlram cu duhpaoh luh chuah khawh hmanh a rak si lo. A tu cu ramdang zong in zalong te in tlun kal khawh asi cang. Cun, kei mah nih ka tlaihmi khualtlawnnak ( Tourism) lei hi vawlei cungah a tthan rang bik pakhatnak 2019 chungah kawlram nih kan ngahmi hi a si. Zatuak 40.2% in a tthang.

SHL: Vice President si hi na ruahning nak in a fawi maw? Siloah ahar deuh dah?

V. Henry Van Thio:  Tuan bal bak lo a si tik ah ka ruahning nak in a fawi deuh, ahar deuh ti hi chim awk a um lo. Lungthli hmenh in ruah lo mi a rak si tik ah chim awk ahar ngai.

SHL: Vice President na tuannak ah Laimi kan nunphug he zeidah a har  tiah na ruah? Tahchunhnak ah, khualtlung mileng kong hna ah? 

V. Henry Van Thio:  Laimi nih Vice President zong kan tuan bal mi a si lo tikah a har le har lo chim awk a um lem lo aruang cu Vice president tuan a ning a cang zong kan theih bal lo mi arak si tik ah kan mah le kan Lai nunphung te in khualtlung mileng chuaklut in kan um ko.

SHL: VP nih hin rian zeizat dah na tleih? Cun Budget teh zeizat dah an in pek hna?

V. Henry Van Thio:  Kanram Budget nih a chei khawh tawk asi ko. Zeizat theng hmannak nawl na ngei ti a um lem lo.

SHL: Kan Chinram hi na duh ningtluk in athang maw? Mipi lei kam in zeidah kan tuah aherh mi a um?

V. Henry Van Thio: Kan Chin ram cu mah duh ning ti cun si lemlo e. Mah duh ahcun kan lam hna khi Concrete in sermi lam si dih seh. Cun, electric mei zong ceu dih seh, telephone pehtlaihnak zong ngah dih seh ti ka duh. Nain, ram sining nih a tlinh lo ruangah a si ko. Cun, kai lunghmuih ngaimi pakhat cu Falam airport( Surbung ) le  Lailenpi airport zong hi kei mah pumpak in Wunci ( ministers) hna sin le ka cungum bawi hna sin ah ka chimhna. I, Lailenpi airport zong cozah hnatlak pinak zong hmuh a si. Cun, Surbung Airport hi kei mah nih budget ka chiah mi asi.

SHL: Kan Chinram caah zeidah abiapi bik ah na ruahmi a si?

V. Henry Van Thio: Lam, tanglam ( motor ), cunglam (Vanlawng) khual tlawnnak. Cun, thinglung put ( mental ) lei, nuncan ziaza, fim thiamnak hna hi an si.

SHL: 2020 thimnak ah na tel ti lai maw? Na tel ti lo ah zei dah tuah na timh?

V. Henry Van Thio:  Tel le tel lo ding biakhiahnak tuahmi a um rih lo. Pathian nawl si ko lai. Cun, cunglei nawl zong a si lai. Ram rian in ka dinh hnu ahcun, cinthlaknak le satil zuatkhalhnak lei hi ka huammi si. Laitlang ah  dai tein um ka duh. Cun, 2020 thimnak hi NLD nih a tei hau tiah ka ruah. Aruangcu inn tthing kha um kan duh i kan vun ithial tikah thiangte in thianh hlimhnak kan tuah ta. Mah bang khan NLD nih term hnih tal apeh khawh a si ahcun tampi a vun tha hnga. Aruang cu cozah tlaih le cang ka in a rannak in ai remh kho lo mi a tam tuk.

SHL: NLD party hi micheu nih kawl party tiah an ti mi hi nang zeitindah na ruah?

V. Henry Van Thio:  NLD cu kawl party a si lo. Tlang cungmi vialte kan tling si. Kawl lawng te cu si hna seh law kawl party an ti mi zong kha a hman ko hnga. Tahchunhnak ah Lai party cu lai lawng te an si ban tuk in lai party ti a si ko. kawlram chung a um mi vialte Democracy uknak a duhmi vialte party a si. Kan duhmi Democracy hi NLD lawng nih atuah khawh.

SHL: Chinram hi fimcawnnak lei ah a chiabik ramkulh kan si. Zeital nan ruahmi a um maw? Cun pawcawmnak lei ah sifak bik ca zin ah kan um. HiHi nan ruah tuanmi aum maw?

V. Henry Van Thio: Kan chin ram ca ah tampi kan izuam ko. Fim cawnnak lei ah hin aherh bak ve mi cu a cawng lio mi zong nih biatak te in zuamnak an ngeih a herh ve i nu le pa lei zong in thazang pek thiam ngai ngai a herh ve. Cu lo ah cun cozah lei lawngin izuamnak kha san atlai tawn lo. Mah pathum a kal ti khawh lawngah fim cawnnak a thangcho deuh hnga.

SHL: Paletwa ah AA le Ralkap ikahnak ruangah mipi hartong tampi an um. Hi hi a donghnak dingah nan itimhtuahmi aum maw?

V. Henry Van Thio:  Kan ti khawh chungin daihnak um dingin kan izuam cuahmah ko.

SHL: CND hi zungkhar ni ah tuahpiak awk kan tha lo maw? Tuah dingah zeidah kan tuah hmasa aherh?

V. Henry Van Thio:  CND cu zungkhar ni ah kan tuah la ti ah cun tuah khawh zong si ko lai, nain kan ram hi zungkhar ni a tam tuk le tu cozah kan vun tlaih hnu hin kan vun sawh deuh rih. Cun, CND ni zungkhar ni kan tuah ahcun tlangcungmi dang nih an hal cio lai le zungkhar ni a tam ngai ngai hnga.

SHL: Thein Sein chan in thokmi kah deihnak cu NLD nih cozah atlaih hnu in arian tuanning a fum. Thein Sein chan ah rian tuanning a rang deuh tiah micheu nih an ti. Hi kongah zeitin dah bialeh na duh hna?

V. Henry Van Thio: Hi kong cu kei mah nih ka tlaihmi asi lo caah ka chim awk si lem lo. Ka palh kho mi si le.

SHL: Ei hmuarnak in zeitluk in dah nan doh? Abik in chin ram ah?

V. Henry Van Thio: Ei hmuarnak cu ttihciah te in kan theihmi cu kan doh bak ko. Nan vun theih ko lai NLD party chung in wunci ( minister ) pawl zong rian phuahmi an um ko khah.

SHL: Kawlram mi ramdang ah a um cangmi kir than a duhmi caah ram mi si nak nan ruah mi aum maw?

V. Henry Van Thio:  Aw, um e. PR ( Permanent Resident card ) vun sawk hna seh law duhpaoh luhchuah khawh a si cang. Kum 5 chung ca in sok khawh a si. Mah khan tattan sauter (Renew) than khawh a si. A rak kir mi cu inn thawngsuh cazin tiangin kan tuah piak hna lai.

SHL: Tu lio ah biapi ngai in na buaipi a um el maw?

V. Henry Van Thio: Kan ibuai pi mi atam lengluang chim cawk dingah a har ngai.

SHL: Security nih an in congh peng lai va si kaw, na harh caan a um tawn maw?

V. Henry Van Thio: Har caan ti cun aruah awk ka thei lem lo. An mah le an rian te kha an tuan ve si ko le, a caan ah cun za lawng te hna um duh ah cun tlawmpal cu siarem lo can cu a um ve.

SHL: Ramdang um Chinmi nih zeidah kan ram caah kan tuah aherh?

V. Henry Van Thio: Thiamnak, fimnak, hna hi kan ram caah an tha. Mah hi vun kan phurh uh law a tha. Tangka in nan phurh ah cun chik khat te ah a dih kho mi si.

SHL: Zeidah na ( hobby ) na huammi asi? Sport lei hna na tuahmi aum maw?

V. Henry Van Thio: Bawlung te hna ka rak chuih pah ve. Cun boxing lei zong hi ka rak thiam pah ngai. Tennis te hna zong ka tu pah ko.

SHL: Social media hna na hmang pah ve maw? FB, Instagram, Twitter etc

V. Henry Van Thio: Facebook hi a caan cun ka hman pah ve tawn.

Sangh Hu Lian:  Caan na kan pek le kan ilawm tuk.

Bonus: Vice President Henry Van Thio nupi Dr. Anna Sui Hluan, U.S a rat lio ah CCN nih interview kan rak tuah mi kan van tar chih.

LEAVE A REPLY

Please enter your comment!
Please enter your name here