Coronavirus zawtnak ruangah U.S ramkulh tamdeuh cu a herh lo ah leeng chuak lo ding in nawl an chuah. Company tampi nih an riantuantu dinhter a tam. Mah zawn lawng ruat nih thilri tamtuktamtuk in an I zalh cia. Thil cawk duh tik ah thilman a kai ngaingai I, zarkhat voikhat hmuhmi tete in a nung mi caah harnak ngan ngaingai ton a si.

Zawtnak ka ngei sual lai maw? Rian an ka chuah sual lai maw? Rian ka ngeih lo ah zei tin ka um law? Bill vialte zeitin ka pek lai? Zeitin dah hmaizarh ka nun lai? Biahalnak phunphun in mi tamdeuh nifatin khuasak lio a si. Hi lio caan ah bawmtu tampi an um bantuk in, minung thinphan thlalau nak caan ttha la in mi hrokhrol le mi firkhu an vahvaih I rian an ttuan lio caan a si ve.

Zawtnak kongah mitkuh cim lo in kan I ralring ko hna lio ah nitin khuasak tuntuk nak caah mi hrokhawl hna hlen nak kan I ton sual lo nak dingah kan I ralrin ngaingai a herh.

  1. Computer in phone chawnh (Robocalls) na ton ahcun that ko:  Mi hrokhrawl hna nih computer automatic in phone chawnh nak (robocalls) an hman I, Coronavirus nangmah tein na chek khawh nak ding le inn in riantuan khawh nak ding ti bantuk in an in chawnh lai. Phone a rak luh tik ah, number pakhatkhat paoh hmeh piak law minung he nan I chawn lai an in ti lai siloah number pakhatkhat hmet law phone kan in chawn ti lailo tiah a ti lai nain, robocalls Dangdang nih chawnh lam na tong lengmang lai. A ttha bik cu Phone thah piak a si.
  2. Online in Coronavirus mah tein I test nak le a damnak sii zuarh na ton tik ah I zumh hlah. Mi hrokhrawl pawl nih COVID-19 damhnak sii cawk ding in zuarkhawh an in zuam lai, online zong in a si kho I, a mah dawrhmun pakhatkhat zong ah a si kho. I zumh hlah. A tuni tiangah, FDA nih mah tein inn ah I zohkhenh nak COVID-19 seh thilri zuarh le peek sianh a um rih lo.
  3. Thawngpang na theih mi hlathlai ta peng. Mi hrokhrawl le mi hlenhmang hna nih a dik lo mi thawngpang an in peek lai. Mi sinah thawngpang na thanh tthan hna hlan ah na theihmi thawngpang adik le dik lo hlathlai nak tuah ta lengmang.
  4. A ho sinin dah thil ka cawk ti mi tha tein zoh ta. Online thil zuar pawl nih, inn chung thianhlim nak le thil Dangdang a herh mi kan zuar tiah an ti nain a taktak ah an ngei lo. Chim duh mi, zumhtlak lo mi online thil zuarnak in thil na cawk sual ahcun phaisa an in zuh lai nain, na thil a phan ti lailo.
  5. Cozah lei in Phaisa kan in kuat timi Text message cakuat le email cakuat zuum hna hlah. A tu lio ah cun thil sining a fiang thlu rih lo. Cozah sinah check kan laak piak khawh tiah an ti mi paoh cu an lih a si.
  6. Link pakhatkhat na theih huaha lo mi cu on piak hlah. Link deu na hmeh piak sual ahcun na computer le phone chungah virus an in khumh piak khawh.
  7. Centers for Disease Control and Prevention in a siloah sii lei ah a thei mi kan si I, a tu lio Coronavirus kong kan theih dih ti phun in email kuat na ton ahcun zuum hna hlah. www.cdc.gov ah chek ta lengmang.
  8. Thilri siloah phaisa in donations (bawmhnak) na pek tik ah a ho sinah dah ka pek timi I theih ta hmaisa. Minung pakhatkhat nih phaisa (Cash), gift card, siloah phaisa kuat in donation (bawmhnak) an in hal ahcun bawm hna hlah.
  9. Inn kutka an in kingh I, cozah zung lei in zawtnak kong ah kan in chek hna an in ti hna ahcun zum hna hlah. Nan kutka a king mi paoh onh hna hlah uh. Na onh hna hlan ah mi zei dah an si taktak ti theih khawh I zuam. Na zumh hna lo ahcun chawnh lo a tha. Na konglam zei hmanh pe hna hlah. Ngakchia nih kutka an on lo ding a biapi.
  10. IRS ah leiba na ngei ti phun in phone chawnh na ton ahcun that colh ko. IRS nih pumpak phone an chawn hna lo. Email zong an kua lo.

A tu lio ah hi a cunglei ka von langhter mi phun hin phone chawnh, email cakuat le kutka kingh a tam ngai. Abiapi bik cu, na theih lomi le na fian lo mi le na zumh lo mi sinah nanangmah le na chungkhar konglam chimlo a si. Zei tuah lai paoh ah, Cozah zung thanwgthanh nak le media zumhtlak mi thawngthanh nak le community upa a thei deuh mi sinah ruahnak hal dih hnu ah thil tawlrel a that bik lio caan a si.

Mizawn ruahnak ngeilo mi hrokhrawl le mi firkhu nih an in zaangfak lailo caah ralring te in kan um zungzal a herh. Ningzak lo tein na theih lo mi kongah cun a thei deuhmi fuhpanh ko hna. Mi hrokhrawl hna kut aphan cangmi vialte cu ngahtthan ding ruahchan nak a um tuk ti lo.

Cozah thawngthanh le zumhawk a tlakmi thawngthanh mi tete cu mah le si tawk tein rel khawh peng izuam hna usih. Thawngpang dik theihnak thawngin mi hrokhrawl kut in kan him kho ko.

A cung lei ralrin ding tete ka tial mi pawl khi a tang lei buu hna chirchan in kan I fian khawhnak bik in van leh than mi an si.

www.irs.gov

www.cdc.gov

www.fda.gov

www.consumer.ftc.gov

www.usatoday.com

LEAVE A REPLY

Please enter your comment!
Please enter your name here