By Zo Tum Hmung

Saturday, March 14, 2020

U.S. Milu Relnak 2020 (U.S. Census 2020) cu March 12 thawkin online (https://2020census.gov/en.html) ah phit a ngah cang. Catlap le phone zongin a ngah. Phit tik belte ah CHIN a simi nihcun CHIN ti ding a si tiah ka ruat. Aruang pahra ka langhter lai, keimah pumpak ruahnak.

  • Biahalnak #9 le #7 ah miphun (race) kong a hal.  Race timi cu  mi pakhat khat nih amah tein a sinaak (person’s self-identification) a langhtermi a si, tiah Milu Relnak nih a ti. Chin miphun a simi mah tein Chin i ti ding a si.

  • Miphun kong a phunphun in a tthen: White, White or African American, African American or Alaska Native, le Asian tiin a tthen. Biahalnak #9 le #7 i Other Asians timi ah CHIN tiin phit ding a si.
Photo Credit: Salai Lairamthang private FB.
  • Rak chuah tak cangmi ram min a hal hrimhrim lo. Hihi a biapi tuk. Burmese ti sual a fawi. Burmese cu Burma timi ram in a ra. Cun, Burmese cu Kawl kan ti. Zumh lo ahcun Daw Aung San Suu Kyi kha va hal ko usih. Kawl nan si lo a kan ti ko lai. 

  • Chinland cu British nih a rak lak lioah amah tein a rak i uk, ram zong a rak ngei. Mirang nih Chin Hills Regulations 1896 in a rak uk. Kawl he a uk tti lo. Panglong Agreement hnu lawnglawng ah Kawl (proper Burma), Kachin le Shan hna he ramkomh (Union) a rak dirh tti. Chin kan sinaak a fiang ngai.

  • Hakha Chin, Falam Chin, Thlanglei Chin asiloah Zomi tiin ti ding a si lo. We Are One In Chin. Hi ti Chin ti loin phit sawsawh sual ahcun U.S. ah kan i tthentthek dih lai. Kan thaazang a der lai. Kan tlau lai.

  • Milu relnak phit hi kan ttuanvo (civic duty) a si. Ttuanvo cu a dik ning tein ttuan a herh. Miphung kong biahalnak a um, kan van a ttha (opportunity) tuk. Kum 10 dan ah voikhat te lawng a tuah. U.S. vawlei ah CHIN a hmun thai cang lai.

  • Ralzaam (refugees) lak tikah U.S. President nih kum fa tein lak zat ding nawlngeihnak (presidential determination) a chuah. Chin an um a theih tuk. U.S. luh tikah Chin in luh a si. Chin tiin phitmi aa palh ee tiah milu relnak zungnih a kan ti sual hmanh ah kan dik ko ee, tiah ralttha tein kan leh ko lai. A kan ti lai ka zum lo.

  • Kan umnak Maryland i Howard County nih Chin a kan ti (County website ah video a um). Governor Larry Hogan zongnih Chin a kan ti, Chin Kum Thar 2019 ah. Kan lung a hmui. 

  • Chin miphun caah atu kan mit nih a  hmuh khawhmi le kan hmuh khawh rih lomi tthathnemhnak tampi a chuahpi lai. (hi kong cu ahnuah kan peh te lai, a herh ahcun).

  • Pathian sermi kan si. Zumtu ttha nihcun bia dik a chim. Chin kan si.

Howard County ah vote pek ding sawmnak ah Pu Zo Tum Hmung chimnak

LEAVE A REPLY

Please enter your comment!
Please enter your name here